.
మనుషుల్ని సెకన్లలో ఆవిరిగా మార్చేసే అత్యాధునిక ఆయుధాలు వచ్చాయా..? అవి ప్రయోగిస్తే మందలుగా జనం అప్పటికప్పుడు ఆవిరైపోతారా..? ఆనవాళ్లు కూడా లేకుండా అదృశ్యమై పోతారా..? ఆశ్చర్యంగా ఉంది కదా చదవడానికి… బాగా ప్రచారంలోకి వస్తున్న ఓ వార్తలోకి వెళ్దాం ముందుగా.,.
గాజాపై ‘థర్మోబారిక్’ బాంబుల ప్రయోగం… ‘యుద్ధంలో ఇజ్రాయెల్ అమానవీయ ఆయుధాలను ఉపయోగిస్తోందట… ఈ సమాచారం ప్రపంచవ్యాప్తంగా సంచలనం సృష్టిస్తోంది… ఈ ఆయుధాల ధాటికి మానవ శరీరాలు ఆవిరైపోతున్నాయన్న వార్త విస్మయం కలిగిస్తోంది…
Ads
గాజాపై జరుగుతున్న దాడుల్లో ఇజ్రాయెల్ అత్యంత ప్రమాదకరమైన ‘థర్మోబారిక్’ (వాక్యూమ్) బాంబులను ప్రయోగిస్తోందని అల్ జజీరా నివేదిక సంచలన విషయాలను వెల్లడించింది… ఈ బాంబులు పేలినప్పుడు గాలిలోని ఆక్సిజన్ను పూర్తిగా పీల్చుకుని, సెకన్ల వ్యవధిలో 3,500 డిగ్రీల సెల్సియస్ ఉష్ణోగ్రతను సృష్టిస్తాయి… ఇంతటి భీకరమైన వేడికి మనుషుల శరీరాలు క్షణాల్లో కాలిపోయి ఆవిరైపోతాయని, ఘటనా స్థలంలో కేవలం రక్తపు మరకలు లేదా చిన్న మాంసం ముక్కలు తప్ప మృతదేహాలు కూడా దొరకడం లేదని నివేదిక పేర్కొంది…
గాజా సివిల్ డిఫెన్స్ విభాగం లెక్కల ప్రకారం, ఇప్పటివరకు 2,842 మంది పాలస్తీనీయులు ఈ బాంబు దాడుల వల్ల ‘ఆవిరైపోయినట్లు’ గుర్తించారు… ఈ దాడుల సమయంలో ఎంతమంది ఉన్నారో లెక్క గట్టి, దాడి తర్వాత లభించిన శరీర భాగాలతో సరిపోల్చినప్పుడు ఈ దారుణమైన నిజాలు బయటపడ్డాయి… వీటికి అమెరికా సరఫరా చేసిన MK84 (హ్యామర్) వంటి బాంబులను ఇజ్రాయెల్ ఉపయోగిస్తోందని నిపుణులు చెబుతున్నారు… సామాన్య పౌరులపై ఇలాంటి విచక్షణారహిత ఆయుధాలను వాడటం అంతర్జాతీయ మానవతా చట్టాల ఉల్లంఘనే అని మానవ హక్కుల సంఘాలు హెచ్చరిస్తున్నాయి…
అలాంటి ఆయుధాలు లేవనీ చెప్పలేం, గాజాపై ఇజ్రాయిల్ భీకర దాడులు, ఆధునిక ఆయుధాల ప్రయోగం ఉండదనీ చెప్పలేం… అది ఏదైనా చేయగలదు, ఏ ఆధునిక ఆయుధమైనా తయారు చేయగలదు… ఐతే ‘మనుషులు ఆవిరైపోవడం’ సాధ్యమేనా..?
వార్తలో చెప్పినట్లు మనుషులు పూర్తిగా “ఆవిరైపోవడం” అనేది శాస్త్రీయంగా అసాధ్యం… 3,500 డిగ్రీల సెల్సియస్ స్థాయిలో థర్మోబారిక్ బాంబులు అధిక వేడిని పుట్టిస్తాయి నిజమే, కానీ మానవ శరీరంలోని ఎముకలు అంత సులభంగా ఆవిరి కావు… అత్యంత శక్తివంతమైన పేలుడు జరిగినప్పుడు కూడా కనీసం బూడిదో లేదా చిన్న ఎముక ముక్కలో మిగులుతాయి. “ఏమీ దొరకకుండా ఆవిరైపోయారు” అనడం అతిశయోక్తి మాత్రమే… లేదా అంత తీవ్ర నష్టాన్ని కలిగిస్తాయి అని చెప్పడానికి ఓ వర్ణన మాత్రమే…
మనుషుల శరీరంలో 70% నీరు ఉంటుంది… థర్మోబారిక్ బాంబు సృష్టించే ఆ వేడికి శరీరంలోని నీరు మరియు కండరాలు (Soft Tissues) క్షణాల్లో మాడిపోతాయి లేదా బూడిదవుతాయి… కానీ, ఎముకల్లో ఉండే కాల్షియం ఫాస్ఫేట్ కరగడానికి లేదా ఆవిరి కావడానికి ఇంకా ఎక్కువ ఉష్ణోగ్రత, ఎక్కువ సమయం కావాలి…
-
సాధారణంగా శ్మశాన వాటికల్లో (Crematorium) కూడా ఎముకలు పూర్తిగా బూడిద కావడానికి గంటల సమయం పడుతుంది… బాంబు పేలుడులో ఆ వేడి కేవలం కొన్ని సెకన్లు మాత్రమే ఉంటుంది…
శాస్త్రీయంగా చెప్పాలంటే, అణు బాంబు (Nuclear Bomb) పేలిన కేంద్ర బిందువు (Ground Zero) వద్ద మాత్రమే మనుషులు తక్షణమే ఆవిరైపోయే అవకాశం ఉంటుంది… సాధారణ బాంబులు లేదా థర్మోబారిక్ బాంబులతో అది అసాధ్యం…
అల్ జజీరా MK84 బాంబుల గురించి ప్రస్తావిస్తోంది… అయితే ఇది థర్మోబారిక్ బాంబు కాదు… ఇది ఒక సాధారణ 2000- పౌండ్ల భారీ బాంబు… ఇది పేలినప్పుడు ఏర్పడే భారీ గొయ్యి (Crater) లేదా భవనాలు కూలిపోయినప్పుడు శవాలు శిథిలాల కింద ఉండిపోయి దొరకకపోవచ్చు…
గాజాపై ఇజ్రాయిల్ దాడులకు సంబంధించి ఇంకా చాలా ప్రచారాలున్నాయి…
‘వైట్ ఫాస్పరస్’ (White Phosphorus) వినియోగం
-
ప్రచారం…: ఇజ్రాయెల్ గాజాపై నిషేధిత వైట్ ఫాస్పరస్ బాంబులను వాడుతోంది.
-
నిజం…: హ్యూమన్ రైట్స్ వాచ్ (HRW) , అమ్నెస్టీ ఇంటర్నేషనల్ వంటి సంస్థలు ఇజ్రాయెల్ గాజా, లెబనాన్లలో వైట్ ఫాస్పరస్ను ఉపయోగించినట్లు ఆధారాలను (వీడియోలు, ఫోటోలు) సేకరించాయి…
-
గమనిక..: అంతర్జాతీయ చట్టాల ప్రకారం వైట్ ఫాస్పరస్ను పొగమంచు సృష్టించడానికి (Screening) వాడవచ్చు, కానీ జనాభా ఉన్న ప్రాంతాల్లో మనుషులపై వాడటం యుద్ధ నేరం కిందకు వస్తుంది…
‘ఆర్టిఫిషియల్ ఇంటెలిజెన్స్’ (Lavender & Gospel) ద్వారా లక్ష్యాల ఎంపిక
-
ప్రచారం…: ఇజ్రాయెల్ సైన్యం AI సాఫ్ట్వేర్లను ఉపయోగించి వేలమందిని లక్ష్యంగా చేసుకుంటోంది…
-
నిజం..: ‘లావెండర్’ (Lavender, ‘ది గాస్పెల్’ (The Gospel) అనే AI వ్యవస్థలను ఇజ్రాయెల్ ఉపయోగిస్తున్నట్లు అంతర్జాతీయ ఇన్వెస్టిగేటివ్ జర్నలిస్టులు నివేదించారు… ఇది భారీ స్థాయిలో ప్రాణనష్టానికి కారణమవుతోందని ఆరోపణలు ఉన్నాయి…
3. ‘హలోవీన్’ శవాల వీడియోలు (Pallywood)
-
ప్రచారం…: పాలస్తీనియన్లు నకిలీ శవాలను, మేకప్ వేసుకున్న గాయపడిన వ్యక్తులను చూపిస్తూ ప్రపంచాన్ని మోసం చేస్తున్నారు (దీనిని Pallywood అని పిలుస్తారు)…
-
నిజం…: సోషల్ మీడియాలో వైరల్ అయిన కొన్ని వీడియోలు (ఉదా: శవాలు కదులుతున్న వీడియోలు) పాతవి లేదా షూటింగ్ సెట్స్కు సంబంధించినవి అని తేలింది… అయితే, దీనిని సాకుగా చూపిస్తూ వేలమంది మరణాలను “నకిలీ” అని కొట్టిపారేయడం తప్పు అని ఫ్యాక్ట్-చెక్ సంస్థలు నిర్ధారించాయి…
4. హాస్పిటల్ పేలుడు (Al-Ahli Hospital)
-
ప్రచారం…: ఇజ్రాయెల్ వైమానిక దాడిలో ఆసుపత్రిలో 500 మంది చనిపోయారు…
-
నిజం…: అమెరికా, ఇతర పాశ్చాత్య దేశాల నిఘా సంస్థల విశ్లేషణ ప్రకారం, అది పాలస్తీనా ఉగ్రవాద గ్రూపు ప్రయోగించిన రాకెట్ గురితప్పి ఆసుపత్రి పార్కింగ్ ఏరియాలో పడటం వల్ల జరిగిన ప్రమాదమని తేలింది… ఇజ్రాయెల్ కూడా దీనికి సంబంధించిన ఆడియో, వీడియో ఆధారాలను విడుదల చేసింది…
వెనెజులాలో మదురో అరెస్ట్ సమయంలో అమెరికా “డిస్కాంబోబ్యులేటర్” (The Discombobulator) అనే పేరుతో ఒక రహస్య ఆయుధాన్ని వాడిందని డొనాల్డ్ ట్రంప్ ప్రకటించడం ప్రపంచవ్యాప్తంగా చర్చకు దారితీసింది… ఆ సమయంలో అక్కడి సైనికులు రక్తపు వాంతులు చేసుకోవడం, ముక్కుల నుండి రక్తం రావడం వంటి లక్షణాలు కనిపించాయని వార్తలు వచ్చాయి…
దీనిని బట్టి చూస్తే, ఇజ్రాయెల్ కూడా గాజా యుద్ధంలో ఇలాంటి అత్యాధునిక లేదా రహస్య సాంకేతికతను వాడుతోందా అనే అనుమానం కలగడం సహజం… ప్రస్తుతం ఇజ్రాయెల్ వాడుతున్న కొన్ని “హై-టెక్” ఆయుధాలు…
ఐరన్ బీమ్ (Iron Beam) – లేజర్ ఆయుధం
ఇజ్రాయెల్ అభివృద్ధి చేసిన అతిపెద్ద సాంకేతిక విజయం ‘ఐరన్ బీమ్’… ఇది ఒక హై-పవర్ లేజర్ డిఫెన్స్ సిస్టమ్…
-
సాధారణ క్షిపణుల ఖర్చు లక్షల్లో ఉంటే, ఈ లేజర్ ఒకసారి పేలితే కేవలం 2 డాలర్ల (సుమారు 170 రూపాయలు) ఖర్చుతో శత్రు డ్రోన్లను లేదా రాకెట్లను గాలిలోనే కాల్చివేస్తుంది…
-
ఇది కంటికి కనిపించని కాంతి కిరణంతో లక్ష్యాన్ని సెకన్లలో కరిగించివేస్తుంది… రాబోయే రోజుల్లో ఇదే ప్రధాన ఆయుధం కాబోతోంది…
AI లక్ష్య సేకరణ (The Gospel & Lavender)
ఇజ్రాయెల్ సైన్యం (IDF) ‘గోస్పెల్’, ‘లావెండర్’ అనే ఆర్టిఫిషియల్ ఇంటెలిజెన్స్ (AI) ప్రోగ్రామ్స్ను వాడుతోంది…
-
The Gospel…: ఇది వేల సంఖ్యలో భవనాలను విశ్లేషించి, ఎక్కడ శత్రువులు దాక్కున్నారో వేగంగా గుర్తిస్తుంది…
-
Lavender…: ఇది వ్యక్తులను ట్రాక్ చేస్తుంది…. దీనివల్ల గతంలో కంటే చాలా వేగంగా లక్ష్యాలను ఎంపిక చేసి బాంబు దాడులు చేస్తున్నారు…
మైక్రోవేవ్ లేదా సోనిక్ ఆయుధాల ప్రచారం
వెనెజులాలో వాడినట్లు చెబుతున్న సోనిక్ (శబ్ద తరంగాలు) లేదా డైరెక్టెడ్ ఎనర్జీ వెపన్స్ (DEW) గురించి ఇజ్రాయెల్ అధికారికంగా ఎక్కడా ప్రకటించలేదు…
-
అయితే, అమెరికా తన మిత్రదేశమైన ఇజ్రాయెల్కు అత్యంత రహస్య సాంకేతికతను అందిస్తుంటుంది…
-
గాజాలోని టన్నెల్స్ (సొరంగాల) లో ఉన్న వారిని బయటకు రప్పించడానికి లేదా వారిని నిశ్రేష్టులను చేయడానికి ఇలాంటి ‘శబ్ద తరంగాల’ ఆయుధాలను లేదా ‘మైక్రోవేవ్’ సాంకేతికతను ప్రయోగాత్మకంగా వాడుతున్నారనే ప్రచారాలు మాత్రం ఉన్నాయి… అన్నట్టు రష్యా దగ్గర కూడా థర్మోబారిక్ వెపన్స్ ఉన్నాయి…
Share this Article