సంస్కృతం మీద కూడా బీజేపీకే రైట్స్ ఉన్నాయా స్టాలినూ..?

బీజేపీకి అసలు బలం… హిందుత్వ కాదు, సంస్థాగత బలం కాదు… దాన్ని ద్వేషించే శక్తులే దాని అసలు బలం… లేని కిరీటాలు పెట్టి, బీజేపీకి బోలెడన్ని మహత్తులు, హక్కుల్ని ఆపాదిస్తూ… కట్టబెడుతూ… దాన్ని బలోపేతం చేస్తుంటాయి అవి…! మొన్నటికి మొన్న చూశాం కదా గ్రేటర్ ఎన్నికల్లో బీజేపీ గెలిచిపోయే ప్రమాదముందహో అంటూ సెక్యులర్ టీఆర్ఎస్‌ను, వీర సెక్యులర్ మజ్లిస్‌ను గెలిపించడానికి కంకణాలు కట్టుకుని, ప్రచారాలు చేసి, వ్యాసాలు రాసి తరించిపోయిన అతి లౌకిక మేధావులను చూశాం కదా…

నిజానికి హిందూధర్మానికి బీజేపీ ఏమైనా హక్కుదారా..? కాదు… కానీ వీళ్లంతా బీజేపీయే హిందుత్వకు హక్కుదారు అంటూ లేని హక్కుల్ని బీజేపీకి కట్టబెట్టి, దాన్ని సుసంపన్నం చేస్తుంటారు… సేమ్, అలాంటిదే మరొకటి… తమిళనాట ద్రవిడ పార్టీలన్నీ దాదాపుగా నాస్తికమే… అందులోనూ డీఎంకే మరీ కరడుగట్టిన పార్టీ… ఎక్కువగా హిందూ సంబంధ వ్యవహారాలకు విరుద్ధం, మరీ ప్రత్యేకించి ఆర్య సంబంధ భావజాలానికి వ్యతిరేకం… అందులో తప్పుపట్టడానికి ఏమీ లేదు… కానీ, అది కూడా ఈమధ్య ప్రతి అంశానికీ బీజేపీతో ముడివేస్తోంది… రాజకీయం వేరు, దాన్నీ దీన్నీ కలపొద్దు… కానీ డీఎంకే చేసేది అదే…

ఈమధ్య ప్రసారభారతి ఓ ఆదేశం జారీ చేసింది… ప్రతి దూరదర్శన్ ప్రాంతీయ కేంద్రం సాయంత్రం ఏడుంబావు నుంచి ఏడున్నర వరకు సంస్క‌ృత న్యూస్ బులెటిన్ ప్రసారం చేయాలనేది దాని సారాంశం… ప్రాంతీయ కేంద్రాలు అంటే మన సప్తగిరి, యాదగిరి చానెళ్ల తరహా… ఇంకేముంది..? ఈమధ్య కెలకడానికి ఏమీలేవు కదా, దీన్ని పట్టేసింది డీఎంకే… నాన్సెన్స్, సంస్కృత బులెటిన్ పేరిట మాపై సంఘ్ పరివార్ ఆర్ఎస్ఎస్ భావజాలాన్ని రుద్దే ప్రయత్నం చేస్తోంది, ఇది యాంటీ పీపుల్, యాంటీ ఫెడరలిజం, ఆ యాంటీ, ఈ యాంటీ, అంటూ బోలెడు యాంటీలను ఏకరువు పెడుతూ గగ్గోలు స్టార్ట్ చేసింది…

ఆ పార్టీ ఎంపీలు, చివరకు స్టాలిన్ కూడా ట్విట్టర్ వేదికగా రచ్చ రచ్చ మొదలుపెట్టేశారు… చూశారా, దేశంలో ఉన్నదే 24 వేల మంది… తమిళనాడులో ఉన్నది 803 మంది… వీళ్లకు ప్రత్యేకంగా ఓ బులెటిన్ దేనికి..? మీ ఆర్య సంస్కృతిని రుద్దుతున్నారా మామీద..? మరి మా తమిళులు దేశమంతా ఉన్నారు… ప్రతీ రాష్ట్రంలోనూ మాకు ప్రత్యేక బులెటిన్లు ప్రసారం చేస్తారా..? ఇలా మొదలుపెట్టారు…