సీన్ ఒన్
———
ఐ టీ అధికారుల బృందం:- హలో! ఎవరండీ ఇంట్లో? మేము రియల్ ఇన్కమ్ టాక్స్ ఆఫీసర్లం. ఇది మా ఐ డి కార్డు. ఇది నోటీసు. తలుపులు తెరవండి. కిటికీలో నుండే ఎంత సేపు మాట్లాడతారు?
ఇంటి యజమాని:- ఊరుకోండి. మాకు తెలియదా? మేము న్యూస్ ఛానల్స్ చూడమా? మా అమ్మాయి గూగుల్లో కేంద్ర ఆర్థిక మంత్రి నిర్మలా సీతారామన్ ఫోన్ నంబర్ పట్టుకుంది. ఆమెతో కనుక్కుని కన్ఫర్మ్ అయితే తలుపు తీస్తాం.
బృందం:- మీరు కొరివితో తల గోక్కుంటున్నారు. మసబ్ ట్యాంక్ ఇన్కమ్ టాక్స్ టవర్ నుండి నేరుగా వస్తున్నాం. తలుపు తెరవకపోయారో…?
యజమాని:- ఒకసారి అందరూ కిటికీ ముందు మొహాలు కనపడేలా నిలుచోండి. ఫోటో తీసి పోలీసులకు పంపి, వాళ్లు కన్ఫర్మ్ చేస్తే అప్పుడు తలుపులు తీస్తాం.
బృందం:- ఏం? తమాషాగా ఉందా? ఆరేళ్లపాటు పెనాల్టీలతో పాటు కట్టించుకుంటాం. ఇల్లు వాకిలి అమ్ముకోవాల్సి వస్తుంది.
యజమాని:- అయ్యా, మీరు నిజమైన వారయితే- నిజంగా ఎలాగూ గోళ్లూడగొట్టి పన్నులు వసూలు చేస్తారు. నలుపు ఉంటే పట్టుకుంటారు. తెలుపు అయితే వదిలేస్తారు. నలుపును తెలుపు చేసి ఉంటే తెలుసుకుంటారు. కానీ- మీరు నకిలీ అయితే మేము కిడ్నాప్ కావడానికి సిద్ధంగా లేము.
బృందం:- ?????
సీన్ టు
———
యజమాని:- హలో పోలీస్ కంట్రోల్ రూమ్! ఇక్కడ మా వీధి చివర బట్టల షాపులో నలుగురు సఫారీ డ్రెస్సులు, ఖాకీ డ్రెస్సులు కొంటున్నారు. మీరు అర్జంటుగా వచ్చి కిడ్నాప్ జరగకుండా రక్షించండి.
కంట్రోల్ రూమ్:- ?????
సీన్ త్రీ
——–
తాగుబోతు:- ఒరేయ్ బుజ్జి! ఆడు మగాడ్రా! నాలుగు డ్రస్సులు అద్దెకు తీసుకుని ఊరి మధ్యలో కిడ్నాప్ చేశాడంటే… ఐ డి కార్డులు, ఫైళ్లు, నోటీసులు, వెహికిల్స్, నంబర్ ప్లేట్లు.. ఆడు మగాడ్రా!
మరో తాగుబోతు:- నేను కూడా ఇక ఈ చిల్లర దొంగతనాలు వదిలేసి నకిలీ ఐ టీ రైడ్స్ ప్రొఫెషన్లోకి వెళుతున్నా.
మొదటి తాగుబోతు:- ?????
సీన్ ఫోర్
———
ప్రొఫెషనల్ ఫేక్ కోచింగ్ సెంటర్ లో క్లాసు జరుగుతోంది. ఫేక్ మెంటార్ ఔత్సాహిక ఫేక్ విద్యార్థులకు ఫేక్ మెళకువల పాఠం చెబుతున్నాడు.
మన శరీరం, రంగు, భాష, చదువును బట్టి ఏ నకిలీ వృత్తికి సరిపోతామో మనకు మనమే ఒక క్లారిటీకి రావాలి. ఒకసారి నకిలీ ప్రొఫెషన్ ను ఖరారు చేసుకున్న తరువాత ఆ పాత్రలోకి మనం పరకాయ ప్రవేశం చేయాలి. అసలు వాళ్లే మనల్ను అనుకరించడానికి పోటీలు పడాలి.
సీన్ ఫైవ్
———
నేటి వార్తలు:-
అసలు పోలీసులను చితకబాదిన నకిలీ పోలీసులు.
అసలు ఐ టీ అధికారి ఇంటిపై నకిలీ ఐ టీ గ్యాంగ్ దాడి.
అసలు డాక్టరుకు గుండె ఆపరేషన్ చేసిన నకిలీ డాక్టర్…. By…. పమిడికాల్వ మధుసూదన్
Follow Us
Share this Article