.
Subramanyam Dogiparthi …. కె బి తిలక్ , జగ్గయ్య వంటి వామపక్ష భావజాలం ఉన్నవారు 1950s , 1960s లో సామ్యవాద , సమవాద సినిమాలను ప్రారంభిస్తే తర్వాత కాలంలో మాదాల రంగారావు , టి కృష్ణ , పోకూరి బాబూరావు , ధవళ సత్యం , వేజెళ్ళ సత్యనారాయణ , బి నరసింగరావు , దాసరి నారాయణరావు వంటి వారు ఎర్ర సినిమాలను తీయడం ప్రారంభించారు . బాగా ఎర్రగా తీసిన ఘనత మాత్రం ఆర్ నారాయణమూర్తిదే . అత్యంత సాధారణ స్థాయి నుండి సినీ ప్రస్థానాన్ని ప్రారంభించిన ఎర్ర నారాయణమూర్తి ధైర్యంగా ఎర్ర సినిమాలను వదిలాడు .
1990s దాకా వచ్చిన ఈ ఎర్ర సినిమాలు ఈ శతాబ్దంలో ఆల్మోస్ట్ కనుమరుగయిపోయాయనే చెప్పాలి . చిత్రం ఏమిటంటే యువతలో కూడా ఈ ఎర్రతనం బాగా పోయింది . యాభై ఏళ్ళ నా సుదీర్ఘ ఉపాధ్యాయ ప్రస్థానంలో అన్ని రంగుల విద్యార్థి సంఘాలను చూసాను . ఒక విద్యార్థి నాయకుడిగా 1968-74 ప్రాంతంలో ప్రత్యక్షంగా విద్యార్థి ఉద్యమాలలో , గొడవల్లో పాల్గొన్నాను . ఎంతో మార్పు వచ్చింది యువతలో . నా ఇల్లే వైకుంఠం నా బొందే కైలాసం తరం ఇప్పటి యువతరం .
Ads
1990 లో వచ్చిన ఈ అడవి దివిటీలు సినిమాకు కధా రచయిత , స్క్రీన్ ప్లే రచయిత , నిర్మాత , దర్శకుడు ఎర్ర నారాయణమూర్తే . పదునైన మాటల్ని వ్రాసింది కె బి ఆనంద్ . వంగపండు ప్రసాదరావు , సిరివెన్నెల సీతారామ శాస్త్రి పాటల్ని వ్రాయగా విద్యాసాగర్ సంగీత దర్శకత్వాన్ని వహించారు . వందేమాతరం శ్రీనివాస్ , వంగపండు ప్రసాదరావు , లలితాసాగరి ఉత్తేజకరంగా పాడారు .
పరుచూరి బ్రదర్స్ కధలు ఎలా అయితే అటు తిప్పి ఇటు తిప్పి దుష్టశిక్షణ శిష్టరక్షణ మీద నడుస్తాయో అలాగే ఎర్ర సినిమాలు సామాజిక ఆర్థిక రాజకీయ దోపిడీ చేసే పెత్తందార్లు , వారి బారి నుండి నోరు లేని జనాన్ని రక్షించే విప్లవకారుల మీద నడుస్తాయి .
ఈ సినిమా గిరిజనుల హక్కులు , వాటిని కబ్జా చేసే ఓ MLA , అతని హోం మినిస్టర్ బావ , మినిస్టర్ కొడుకు అఘాయిత్యాలు , వాటిని ఎదుర్కొనే క్రమంలో నక్సలైటుగా మారే ఫారెస్ట్ ఆఫీసర్ చుట్టూ నడుస్తుంది . ఫారెస్ట్ ఆఫీసరుగా పురాణం సూర్య , MLA గా రాళ్ళపల్లి , మినిస్టరుగా రావుజీ , అతని కొడుకుగా సాయికుమార్ తమ్ముడు రవిశంకర్ నటించారు .
నక్సలైటు దళం నాయకుడిగా ఎర్ర నారాయణమూర్తి తన టిపికల్ నటనలో మునిగిపోయాడు . సినిమాలో చాలా ప్రధానమైన పాత్ర స్పెషల్ యస్పీగా దేవదాస్ కనకాలది . నక్సలైటుగా మారిన ఫారెస్ట్ ఆఫీసర్ తండ్రి పాత్ర ఆయనది . విధిబధ్ధుడిగా , తండ్రిగా సంఘర్షణకు గురయ్యే ఎమోషనల్ సీన్లలో చాలా బాగా నటించాడు . క్లైమాక్సులో తానే అడవి దివిటీగా మారిన సీనులో ఇంకా బాగా నటించాడు . ఆయన భార్యగా అత్తిలి లక్ష్మి బాగా నటించింది .
కాసేపే కనిపించినా ముఖ్యమంత్రి పాత్రలో హరిబాబు (subject to correction) బాగా నటించాడు . నక్సలైట్లు , పోలీస్ ఆఫీసర్లే కాదు ; సున్నితమైన శాంతిభద్రతల సంరక్షణలో ఓ ముఖ్యమంత్రి కూడా ఎలా సంఘర్షణకు గురవుతారో బాగా చూపించారు .
ఇతర పాత్రల్లో శాంతిలత , రాజు , పి యల్ నారాయణ తదితరులు నటించారు . సహజంగానే అడవి నేపధ్యం ఎక్కువగా ఉంటుంది కదా ! ఎక్కడ షూట్ చేసారో కానీ బాగానే ఉంటుంది నేపధ్యం .
సినిమా యూట్యూబులో ఉంది . రాజకీయ , సామాజిక , ఆర్ధిక న్యాయం వంటి అంశాల మీద స్పృహ ఉన్నవారికి బాగానే ఉంటుంది . ఈ సినిమా పరిచయం ముగించే ముందు నా మాట ఒకటి మిత్రులు వినాలి . హింస , అప్రజాస్వామిక , రాజ్యాంగ విరుధ్ధ మార్గంలో ఏ ఉద్యమం తన ధ్యేయాలను సాధించలేదు అనేది నా నిశ్చిత అభిప్రాయం .
నేను పరిచయం చేస్తున్న 1239 వ సినిమా , #తెలుగు_సినిమాల_సింహావలోకనం #సినిమా_స్కూల్ #సినిమా_కబుర్లు
Share this Article