.
Subramanyam Dogiparthi …. నిన్న ప్రేమ ఖైదీ సినిమా తర్వాత ఈరోజు మరో అందమైన ప్రేమ కధ ఈ ప్రేమ యుధ్ధం . సినిమా అంతా యుధ్ధమే . ప్రేమ యుధ్ధమే . దూకుడు సినిమాలో అనుకుంటా సమంత అన్నట్లు ప్రేమించిన అమ్మాయి దక్కాలంటే యుధ్ధాలు చేయాలి , సాహసాలు చేయాలి పాతాళభైరవి లోని డింభకుడి లాగా .
అనుపమ ఆర్ట్స్ బేనరుపై తెలుగు , కన్నడ భాషల్లో ఒకే సారి నిర్మించబడిన ఈ సినిమా తెలుగులో నాగార్జున , అమల ప్రేమ జంటగా నటిస్తే కన్నడంలో రవిచంద్రన్ , అమల నటించారు . దేవరాజ్ కూడా రెండు భాషల్లో విలనుగా నటించాడు . అతనికి తెలుగులో ఫుల్ లెంగ్త్ విలన్ పాత్ర ఇదే మొదటిది అనుకుంటా .
Ads
రెండు భాషల్లోనూ యస్ వి రాజేంద్ర సింగ్ బాబే దర్శకత్వం వహించారు . బేసిగ్గా ఆయన కన్నడ దర్శకుడు .
అందుకనే తెలుగు సినిమాలో కూడా కాస్త కన్నడ వాసన కనిపిస్తుంది . ముఖ్యంగా సాంకేతిక వర్గం , కొందరు నటీనటులు . హంసలేఖ పేరుతో సంగీత దర్శకుడిగా పాపులర్ అయిన గంగరాజు కూడా బేసిగ్గా కన్నడ సినిమాల సంగీత దర్శకుడే .
భారతి కూడా ప్రధానంగా కన్నడ నటీమణే . అన్ని దక్షిణాది భాషల్లోనూ నటించింది . ఈమె తన ఈ పాత్రను రెండు భాషల్లోనూ నటించింది . సినిమా షూటింగ్ కూడా ఎక్కువగా బెంగళూరులో జరిగినట్లుగా ఉంది .
ఈ సినిమా పేరు చెప్పగానే సినిమా ప్రియులకు , సంగీత ప్రేమికులకు గుర్తుకొచ్చే సుమధుర గీతం స్వాతి ముత్యపు జల్లులలో శ్రావణ మేఘపు జావళిలో పాటే .
బెంగుళూరు క్రికెట్ స్టేడియంలో కృత్రిమ వర్షంతో తొమ్మిది రోజులు షూటింగ్ జరిపారట ఈ పాటకి . ఎంత మధురంగా ఉంటుందంటే సినిమాలో చాలా సీన్లలో ఈ పాట మ్యూజిక్కే బేక్ గ్రౌండ్లో వస్తూ ఉంటుంది . థియేటర్లో నుంచి బయటకొచ్చాక కూడా ఈ పాట మ్యూజిక్ చెవుల్లో గింగురుమంటూ ఉంటుంది . హం చేసుకుంటూ వస్తారు .
ఈ దృశ్య శ్రవణ ప్రేమ కావ్యం కధ టూకీగా ఏందంటే మోహన్ బాబు కళా వ్యాపారి . అతని ట్రూపులో భారతి డాన్సర్ . తన వందో ప్రదర్శనలో తాను వివాహం చేసుకోబోతున్నానని , అందువలన నృత్యాలకు వీడ్కోలు చెపుతున్నానని ప్రేక్షకులకు ప్రకటిస్తుంది . ఆ ప్రకటనకు కోపం వచ్చిన మోహన్ బాబు నాట్యం చేయకుండా ఎలా బతుకుతావో చూస్తానని సవాలు విసిరి , ఆమె భర్త గిరిబాబుని అతని తాగుడు , ఇతర బలహీనతల ఆధారంగా దిగజారుస్తాడు .
వారిద్దరి కొడుకు నాగార్జున మంచి డాన్సర్ , గాయకుడు . అతనికి పోటీదారుడు విలన్ దేవరాజ్ . ఇరువురికి కళా స్పర్ధ . ఇద్దరికీ మిత్ర బృందం . చక్కగా కొట్టుకుంటూ ఉంటారు . దేవరాజ్ చెల్లెలు అమల నాగార్జునకు వీరాభిమాని . ఆ అభిమానం ప్రేమగా మారుతుంది .
వీళ్ళిద్దరి ప్రేమకు భంగం కలిగించటమే దేవరాజ్ పని . నాగార్జునని చంపుతానని చెల్లెల్ని బెదిరించి బొంబాయి తీసుకుని పోయి పెద్ద డాన్సర్ని చేస్తాడు . కొద్ది కాలం తర్వాత వెనక్కు తిరిగొచ్చిన అమల నాగార్జునని తిరస్కరిస్తుంది .
ఇద్దరూ మోహన్ బాబు ట్రూపులో డాన్సర్లు అవుతారు . నాగార్జున వాణీ విశ్వనాధుని ప్రేమిస్తున్నట్లు నటిస్తూ అమలకు స్పర్ధను సృష్టిస్తాడు . స్పర్ధయా వర్ధతే ప్రేమా . అమల మరలా నాగార్జున ప్రేమను కోరుకుంటుంది .
ఇద్దరూ దగ్గరయ్యాక కలిసి ఢిల్లీ వెళ్ళిపోతారు .
అక్కడ టాక్సీ డ్రైవరుగా అంజాద్ ఖాన్ తారసపడతాడు . వాళ్ళను కాశ్మీర్ కూడా తీసుకుని వెళతాడు . అక్కడ దేవరాజ్ , మోహన్ బాబు విడదీయటానికి విఫల ప్రయత్నం చేస్తారు . చివరకు ప్రేమ యుధ్ధంలో ప్రేమికులు విజయులు అవటంతో , విలన్లు పరాజితులు అవటంతో సినిమా శుభాంతం అవుతుంది .
కధ చాలా రొటీనే . ఇద్దరు ప్రేమికులు , ఓ ఆటంకవాది . ఆ ఆటంకాలను అధిగమించి ఒకటవటం . ఆ రొటీన్ కధ చుట్టూ శ్రావ్యమైన పాటల్ని , అందమైన నృత్యాలను కూర్చటమే ఈ సినిమా బాగుండటానికి కారణం . ఆ క్రెడిట్ హంసలేఖతో పాటు ఆత్రేయ , వేటూరిలకు ; వాటిని శ్రావ్యంగా పాడిన బాలసుబ్రమణ్యం , జానకమ్మ , మనోలకు , అందమైన నృత్యాలను కంపోజ్ చేసిన సుందరం , సురేఖ , ప్రకాష్ లకు చెందుతుంది .
హే నేనేరా యువ హీరో అంటూ నాగార్జున , దేవరాజుల మీద పాట , డాన్స్ డాన్స్ డాన్స్ బేబీ డాన్స్ డాన్స్ అనే డ్యూయెట్ నాగార్జున , అమల మీద ఉంటాయి . యోగా యోగ యోగా యోగ ప్రేమ యుధ్ధం ఏడు ప్రాణాల ప్రేమ యుధ్ధం నాగార్జున , వాణీ విశ్వనాధుల మీద చాలా హాటుగా ఉంటుంది .
కాశ్మీర్లో నాగార్జున , అమల మీద బొంబాట్ బొంబాట్ అంటూ సాగే డ్యూయెట్లో అంజాద్ ఖాన్ కూడా గెంతులేస్తాడు కాసేపు . ప్రేమా గీమా జానేదో మాయాలోకంలో ప్రేమే శరణం గఛ్ఛామి అనే నిస్పృహ పాట నాగార్జున మీద బాగానే ఉంటుంది . ఈ పాటలో అమల మీద కొన్ని డాన్స్ షాట్స్ కూడా అందంగా ఉంటాయి .
నాలుగు కోట్ల భారీ వ్యయంతో తీయబడిందట ఈ సినిమా . తెలుగు , కన్నడ భాషల్లో ఏకకాలంలో తీయబడిన ఈ సినిమాకు తెలుగులో డైలాగులను సాయినాథ్ వ్రాసారు . ఒకనాటి హీరోయిన్ భారతి మంచి పాత్రలో కనిపిస్తుంది .
తెలుగు సినిమా తమిళం , హిందీ భాషల్లోకి డబ్బింగ్ చేయబడింది . సినిమాలో అంజాద్ ఖాన్ నటించటం విశేషమే అయినా ఆయన పాత్రను అతి హాస్యంతో అపహాస్యం చేసారు . సినిమా యూట్యూబులో ఉంది . చూడతగ్గ సినిమా . సంగీత ప్రియులకు , రస హృదయులకు , నాగార్జున అమల అభిమానులకు బాగా నచ్చుతుంది . It’s a good audio visual splendour .
#తెలుగుసినిమాలసింహావలోకనం #సినిమా_కబుర్లు #సినిమా_స్కూల్
Share this Article