.
చైనా సైంటిస్టులు మధుమేహం (సుగర్) వ్యాధిని పూర్తిగా నయం చేశారని ఒక వార్త… నిజమే అయితే ఆరోగ్యరంగంలో విశేష విజయం… ఎందుకంటే..? ప్రపంచాన్ని కలవరపెడుతున్న వ్యాధుల్లో కేన్సర్ మొదటిది కాగా, సైలెంట్ కిల్లర్ మధుమేహం (డయాబెటిస్) రెండోది…
మరీ మన దేశంలో దీని విస్తృతి ఎక్కువ… మన తెలుగు రాష్ట్రాలు మధుమేహ రాజధానులు… అందుకని సుగర్ చికిత్సకు సంబంధించిన ఏ వార్తయినా ఇట్టే ఆకర్షిస్తుంది… సుగర్ రివర్సల్ అనీ, ఫలానా చికిత్సతో మందుల అవసరం ఉండదనీ రకరకాల ప్రచారాలున్నా సరే, వర్తమానంలో నిజం ఏమిటంటే..? సుగర్ అదుపు తప్పకుండా మెయింటెయిన్ చేయడమే తప్ప, పూర్తిగా నయం చేసే చికిత్స లేదు…
Ads
మరి చైనా శాస్త్రవేత్తలు ఏం చేశారు..? వాళ్లు స్టెమ్ సెల్ (మూలకణ) థెరపీ ద్వారా విజయం సాధించారు… షాంఘై చాంగ్‌జెంగ్ ఆసుపత్రికి చెందిన శాస్త్రవేత్తలు ఈ థెరపీ ద్వారా 59 ఏళ్ల వ్యక్తికి టైప్-2 డయాబెటిస్‌ను పూర్తిగా నయం చేశారు… ఆ వ్యక్తి గత 25 ఏళ్లుగా మధుమేహంతో బాధపడుతున్నాడు…
-
ప్రక్రియ…: శాస్త్రవేత్తలు ఆ రోగి స్వంత రక్త కణాల నుండి స్టెమ్ సెల్స్‌ను రూపొందించారు… వాటిని ఇన్సులిన్‌ను ఉత్పత్తి చేసే ప్యాంక్రియాటిక్ ఐలెట్ కణాలుగా (Islet cells) మార్చి, తిరిగి అతని శరీరంలోకి ప్రవేశపెట్టారు…
-
ఫలితం…: చికిత్స జరిగిన 11 వారాల తర్వాత అతను ఇన్సులిన్ తీసుకోవడం మానేశాడు… ఏడాది తర్వాత అతను డయాబెటిస్ కోసం వాడే మిగిలిన మందులను కూడా ఆపేశాడు… దాదాపు 33 నెలలుగా అతను ఎటువంటి మందులు లేకుండా సాధారణ జీవితం గడుపుతున్నారని వైద్యులు తెలిపారు…
…… ఇదీ వార్త… ఇది ఒక అద్భుతమైన ఆవిష్కరణ అయినప్పటికీ, కొన్ని ముఖ్యమైన విషయాలు గమనించాలి…
-
పరిశోధన స్థాయి… ఇది ఒక వ్యక్తిపై జరిగిన విజయవంతమైన ప్రయోగం (Case Study)… దీనిని ప్రపంచవ్యాప్తంగా అందరికీ అందుబాటులోకి తీసుకురావడానికి ఇంకా చాలా మందిపై క్లినికల్ ట్రయల్స్ (పరీక్షలు) చేయాల్సి ఉంది…
-
టైప్-1 డయాబెటిస్…: ఇదే తరహాలో ఒక 25 ఏళ్ల మహిళకు కూడా టైప్-1 డయాబెటిస్‌ను నయం చేసినట్లు మరో వార్త ఇటీవలే (2024 చివరలో) వెలుగులోకి వచ్చింది…
-
ప్రస్తుత పరిస్థితి…: ఈ చికిత్స ఇంకా ప్రయోగాత్మక దశలోనే ఉంది…. సాధారణ ప్రజలకు ఆసుపత్రులలో ఇది వెంటనే అందుబాటులోకి రాలేదు…
కోవిడ్ సమయంలో చైనా వ్యాక్సిన్ల ప్రభావంపై (ముఖ్యంగా సినోవాక్ వంటివి) ప్రపంచవ్యాప్తంగా జరిగిన చర్చలు, వివాదాలు చూసిన ఎవరికైనా… ఈ స్టెమ్ సెల్ థెరపీ విజయవార్తల మీద అనుమానం రావడం సహజం… సైన్స్ విషయంలో “నమ్మకం” కంటే “నిరూపణ” ముఖ్యం…
అయితే, ఈ స్టెమ్ సెల్ థెరపీ విషయంలో మనం కొన్ని కీలకమైన తేడాలను గమనించాలి… కోవిడ్ వ్యాక్సిన్ల సమయంలో చైనా డేటాపై పారదర్శకత లేదనే విమర్శలు వచ్చాయి… కానీ, ఈ మధుమేహం చికిత్సకు సంబంధించిన పరిశోధన పత్రాలు ప్రపంచ ప్రఖ్యాత సైన్స్ జర్నల్స్ అయిన ‘Cell’ , ‘Nature’ వంటి వాటిలో ప్రచురితమయ్యాయి… ఇవి అంతర్జాతీయ శాస్త్రవేత్తల బృందం క్షుణ్ణంగా తనిఖీ చేసిన తర్వాతే ప్రచురణకు అనుమతిస్తాయి…
ఒక్క చైనా మాత్రమే కాదు … స్టెమ్ సెల్స్ ద్వారా డయాబెటిస్‌ను నయం చేసే ప్రయత్నాలు కేవలం చైనాలో మాత్రమే జరగడం లేదు… అమెరికాకు చెందిన Vertex Pharmaceuticals వంటి సంస్థలు కూడా ఇలాంటి ప్రయోగాలు చేస్తున్నాయి… అమెరికాలో కూడా కొందరు రోగులు ఈ చికిత్స ద్వారా ఇన్సులిన్ అవసరం లేకుండా కోలుకున్నారు… కాబట్టి ఇది ఒక దేశానికి పరిమితమైన “మ్యాజిక్” కాదు, ప్రపంచవ్యాప్త సైన్స్ పురోగతి…
ప్రస్తుతం ప్రపంచవ్యాప్తంగా జరుగుతున్న కొన్ని కీలక ప్రయోగాలు… అమెరికాకు చెందిన Vertex Pharmaceuticals ఈ రంగంలో అందరికంటే ముందుంది… స్టెమ్ సెల్స్ ద్వారా ఇన్సులిన్ ఉత్పత్తి చేసే కణాలను తయారు చేసి రోగులకు అమర్చారు… వీరి ప్రయోగంలో 12 మందిలో 10 మంది రోగులు ఏడాది తర్వాత ఇన్సులిన్ తీసుకోవడం మానేశారు…
తాజా అప్‌డేట్ (2026)…: ఈ చికిత్స (Zimislecel) ప్రస్తుతం చివరి దశ (Phase 3) పరీక్షల్లో ఉంది… అంతా సవ్యంగా జరిగితే, 2026 చివరి నాటికి అమెరికా డ్రగ్ అథారిటీ (FDA) నుండి దీనికి అధికారిక అనుమతి లభించే అవకాశం ఉంది…
యూరప్ (ISLET ప్రాజెక్ట్) యూరోపియన్ యూనియన్ నిధులు సమకూరుస్తున్న ISLET అనే ప్రాజెక్ట్ ద్వారా డెన్మార్క్, ఫ్రాన్స్, జర్మనీ శాస్త్రవేత్తలు కలిసి పనిచేస్తున్నారు… వీరి లక్ష్యం కేవలం చికిత్స మాత్రమే కాదు, స్టెమ్ సెల్స్ ద్వారా తయారైన కణాలను భారీ స్థాయిలో (Mass Production) ఎలా తయారు చేయాలో పరిశోధించడం… దీనివల్ల భవిష్యత్తులో ఈ చికిత్స ఖర్చు తగ్గే అవకాశం ఉంది…
స్టెమ్ సెల్ థెరపీలో అతిపెద్ద సమస్య ఏమిటంటే… శరీరం కొత్తగా అమర్చిన కణాలను “శత్రువు”గా భావించి నాశనం చేయడం (Rejection)… దీనిని అడ్డుకోవడానికి రెండు రకాల ప్రయోగాలు జరుగుతున్నాయి…
Gene-Editing (CRISPR)…: CRISPR Therapeutics వంటి సంస్థలు స్టెమ్ సెల్స్‌లో జన్యు మార్పులు చేస్తున్నాయి… దీనివల్ల ఆ కణాలు శరీర రోగనిరోధక వ్యవస్థకు కనబడకుండా “అదృశ్యం” అవుతాయి…
Encapsulation…: ఇన్సులిన్ ఇచ్చే కణాలను ఒక చిన్న రక్షణ కవచం (Device)లో ఉంచి శరీరంలో అమర్చడం… ఇది కణాలకు రక్షణ ఇస్తుంది కానీ ఇన్సులిన్‌ను బయటకు విడుదల చేస్తుంది…
ఇంజక్షన్ల ద్వారా ఇన్సులిన్ ఎక్కించుకోవడంకన్నా శరీరంపై అతికించుకునే ప్యాచులు వంటి చికిత్సను సరళతరం చేసే ప్రయోగాలు ప్రస్తుతానికి సాగుతున్నాయి… మొత్తానికే వ్యాధికి చికిత్సను కనుగొంటే మాత్రం అది ఆరోగ్, వైద్య రంగంలో విశేష విజయమే..!!
Share this Article