మల్లన్న దేవుడికి 4500 ఎకరాల అడవి… నీ కొండలు నువ్వే కాపాడుకో…

Chalasani Srinivas……….. ఇది చాలా ప్రాముఖ్యత గల వార్త

శ్రీశైలం దేవస్థానానికి చెందిన 4500 ఎకరాల అటవీ ప్రాంతాన్ని తిరిగి దేవాలయానికి అందజేయడం. కానీ తెలంగాణలో కొన్నిపత్రికల్లో తప్ప ఆంధ్రప్రదేశ్ లో ఉన్న ముఖ్యమైన నాలుగు పత్రికల్లో ఈ వార్త నాకు కనపడలేదు, బహుశా ఏ మూలన్నా ఇరికించారేమో తెలియదు. టీవీలు సాధారణంగా నేను చూడను గనుక వేశారో లేదో తెలియదు. సోషల్ మీడియాలో ఒక్కటంటే ఒక్క పోస్టూ లేదు.

ఆంధ్రప్రదేశ్ రాష్ట్ర ప్రభుత్వం దీని మీద చర్యలు చేపట్టిందని, మంత్రుల గ్రూపు దీనిపై తగు చర్యలు తీసుకుని, వెంటనే దేవస్థానానికి దఖలుపరచమని చెప్పిందని, అగ్రిమెంట్ చేసి, వెంటనే కేంద్రానికి ఆ సమాచారం పంపమని కూడా వార్తలు వచ్చాయి. ఆస్తి విలువ ₹ 2000 కోట్లు ఉంటుందని ఒక అంచనా వేస్తున్నారు. కానీ ఆస్తి కాదు అదొక బాధ్యతగా దేవస్థానం, భక్తులు భావించాలి.

ఈ బాధ్యత తీసుకున్న తర్వాత దేవస్థానం చెట్లు పెంచే కార్యక్రమాలు పెద్ద ఎత్తున చేపట్టాలని కోరుతున్నాను. శ్రీశైలం దారిలో చాలా చోట్ల పేరుకి అడివే గానీ కొట్టేసిన చెట్లు, మొండి కొండలు కనబడుతున్నాయి. అక్కడ కూడా మొక్కల్ని పెంచాల్సిన బాధ్యత దేవస్థానం చేపట్టాలి, దానికి భక్తులు సాయం చేయాలి. పర్యావరణాన్ని కాపాడటం కూడా ఈ భూమాతకి, మానవాళికి మనం చేసే సేవ కింద వస్తుంది. మానవ సేవయే మాధవ సేవ అన్నారు కదా