ఇలాగే ఊడ్వడం ప్రాక్టీస్ చేయి తల్లీ… ప్రధాని పదవికి తోవ చూపించవచ్చునేమో…

Nancharaiah Merugumala………..   గుడి వాకిలి ఊడిస్తే అధికారం రాదు చెల్లీ,‘ సత్తా’ చేతికొచ్చాకే దేశాన్ని ఊడ్చుకోవాలి..! ===================================================  ఒకప్పటి ‘ప్రిన్సెస్‌’ ప్రియాంకా గాంధీ వాడ్రా శుక్రవారం ఉత్తర్‌ ప్రదేశ్‌ రాజధాని లఖ్‌నఊలో వాల్మీకులు నివసించే లవకుశ నగర్‌ వాల్మికి ఆలయం వాకిలిని తెల్లటి పూచికపుల్లల చీపురుతో ఊడ్చారు. ఉత్తరాదిన వాల్మీకులు అంటే పారిశుద్ధ్యం పనిచేసే కులస్తులు. ప్రతి వాల్మికినగర్‌ లోనూ ఈ కులం వాళ్లే నివసిస్తారు. వారి కులం (వాల్మీకి) అన్ని ఉత్తరాది రాష్ట్రాల్లో ఎస్సీ జాబితాలోనే ఉంది. వారి కులదైవం రామాయణం రాసిన వాల్మికి మహర్షి. వాల్మికి ప్రశాంతంగా కూర్చుని రామాయణం రాసిన సొంతూరు లాహోర్‌ ‘దురదృష్టవశాత్తూ’ పాకిస్తాన్‌ లోకి వెళ్లిపోయింది. పాక్‌ పంజాబ్‌ రాజధాని లాహోర్‌ లో రావీ నదీ తీరంలో వాల్మికి రామాయణం రాశాడనేది ఎప్పటి నుంచో ఉన్న అక్కడి ప్రజల నమ్మకం. అందుకే అక్కడ వాల్మికి స్మారకార్ధం గుడి కట్టారు. ఇప్పటికీ అది సురక్షితంగా ఉంది. ఈ ఆలయంలోని వాల్మికి విగ్రహం రోజూ పూజలందుకుంటోంది. ఆయనను పూజించేది ఎక్కువగా ఎవరంటే– మన యూపీ, పంజాబ్, హరియాణాలో ఉన్న వాల్మీకుల కులంవారైన అక్కడి హిందూ పంజాబీలు. హిందువులుగా ఉంటే భద్రత, ప్రాణాలుండవనే భయంతో వారిలో ఎక్కువ మంది కైస్తవం పుచ్చుకున్నారు. ప్రాణ రక్షణ కోసం ‘ప్రభువు’ నీడన చేరారే కాని దాదాపు వారంతా ఆచరణలో హిందువులే. తమ కులదైవం వాల్మికి గుడికి క్రమం తప్పకుండా పోతుంటారు. రామాయణం రాసిన తమ తోటి కులస్తుడిని నిత్యం ఆరాధిస్తూ తరిస్తుంటారు. పాకిస్తాన్‌లో కూడా వారు ఎస్సీ తరహా హోదాలో ఉన్నారు. రెండు తెలుగు రాష్ట్రాల్లోని రెండు అనుసూచిత కులాలవారు, కొన్ని ఆదివాసీ కులాలవారు, అనేక కులాల బీసీలు రికార్డుల్లో హిందువులుగా, ఆదివారం ‘ఆచరణాత్మక క్రైస్తవులు’గా ఉన్నట్టే పాకిస్తాన్‌లోని వాల్మీకులు భద్రత కోసం క్రైస్తవం ముసుగులోని హిందువులుగా బతుకుతున్నారు. అంతేగాని కోటా ప్రయోజనాల సమస్య వారికి లేదు. అంటే ఇండియా, పాకిస్తాన్‌ ప్రజల అలవాట్లు, తెలివితేటలు, బతికే తీరులో పెద్దగా తేడాలు లేవు. ఇస్లాం, హిందూ అనే ఆకుపచ్చ, కాషాయ రంగు గొడుగుల కింద ఉన్నా హిందూస్తానీ, పాకిస్తానీ భాయూ–భాయీ చాలా విషయాల్లో…

ఇంకో ముఖ్య విషయం ఏమంటే, క్షత్రియ రాజకుటుంబంలో పుట్టిన రాముడి జన్మభూమిని వందలాది సంవత్సరాల పోరాటం, విధ్వంసకాండతో విముక్తి చేసిన హిందుత్వ శక్తులు, విశాల హృదయాలున్న హిందువులు కూడా ఇప్పటి దళిత కులంగా పరిగణించే వాల్మిక కుటుంబంలో పుట్టిన రామాయణ సృష్టికర్తను విస్మరించడం గర్హనీయం. ఆయన జన్మస్థలాన్ని, పవిత్ర రావీ తీరంలోని ఆయన ఆలయాన్ని, ఇద్దరు బిడ్డలను చంకనేసుకుని సీతాదేవి నడయాడిన పశ్చిమ పంజాబ్‌లోని ఇతర ప్రాంతాలనైనా పాకిస్తాన్‌ నుంచి విముక్తి చేయడానికి ఎవరూ  ధైర్యం చేయకపోవడాన్ని’ ఏమనాలి? కనీసం లాహోర్‌లోని వాల్మికి ఆలయాన్ని సందర్శించే ఆసక్తి ఉన్నవారికి బస్సు ప్రయాణం ఏర్పాట్ల గురించి కూడా ఎవరూ మాట్లాడరు. ఆయోధ్యలో రాముడికి భవ్య మందిరం నిర్మిస్తున్నారు హిందువులు. మరి, కౌసల్యా దశరథ పుత్రుడి పేరుకు శాశ్వతత్వం కల్పించిన వాల్మికి ఊరు లాహోర్‌ ను రెండు భారత–పాకిస్తాన్‌ యుద్ధాల సమయంలో ‘విముక్తి చేసే’ అవకాశం వచ్చినా ‘భారత హిందూ పాలకులు’ ఆ పనిచేయలేదు. ఇంతకూ ప్రియాంకకు సంబంధించిన అసలు విషయం ఆరంభంలో ఒక వాక్యంగా మాత్రమే రాసి, దాన్ని సాగదీయడం మరిచిపోయా…