తనలోని కోపాన్ని క్రమేపీ కంట్రోల్ చేసుకుంటూ… మంచి స్నేహశీలిగా తనను తానే ఆవిష్కరించుకుంటూ కొద్దిరోజులుగా బిగ్‌బాస్‌లో దూసుకుపోయి, ఒక దశలో రన్నర్ అప్ అవుతాడు అనిపించుకున్న సొహెల్ ఒక్కసారిగా తన అవకాశాల్ని తనే చెడగొట్టుకుంటున్నాడు… కీలకమైన తరుణంలో ప్రేక్షకులు పెదవి విరుస్తున్నారు… అఖిల్, అవినాష్, అభిజిత్‌లతో వ్యవహరించే తీరుకూ అరియానా, హారిక, మోనాల్‌తో వ్యవహరించే తీరుకూ నడుమ తేడా చూపకపోతే ఎలా..? లేడీ కంటెస్టెంట్లతో మన ధోరణిని ప్రేక్షకులు జాగ్రత్తగా అంచనా వేస్తారు… అది మరిచిపోయాడు సొహెల్… మన వాదనలో లాజిక్ ఉన్నా సరే, ప్రజెంట్ చేయడంలో జాగ్రత్త అవసరం…
బిగ్‌బాస్ ఆటలో కీలకం ఇదే… ఆటను అర్థం చేసుకోవడం, అనుగుణంగా ఆడటం, అదును దొరికినప్పుడు చెలరేగిపోవడం… కానీ సొహెల్ బండి రివర్సులో పోతోంది… అదే అరియానాకు తనకూ తేడా… ఆ బక్క పిల్ల ప్రస్తుతం షోను దడదడలాడిస్తోంది… ఒక్క ముక్కలో చెప్పాలంటే అందరినీ డామినేట్ చేసేస్తోంది… చివరకు అభిజిత్ కూడా సైలెంట్…
Ads
నిన్న మోనాల్‌కు క్లాస్ పీకితే… ఆ దెబ్బకు ఠారెత్తిపోయింది ఆమె… వెక్కివెక్కి ఏడ్చింది… ఫెయింటయి కుప్పకూలుతుందేమో అన్నట్టుగా శోకాలు పెట్టింది… తను ఈ ఆటకు పనికిరానని మొత్తుకుంది… అరియానా దెబ్బ ఇలా ఉంటుందా అని ప్రేక్షకులు విస్తుపోయారో లేదో ఈసారి దెబ్బ సొహెల్ మీద పడింది… సొహెల్‌కు కాస్త నోటిదూల ఎక్కువ కదా, కోపం అదుపు తప్పి అరియానా మీద విరుచుకుపడితే… ఆమె ఎందుకు ఊరుకుంటుంది..? మాటకుమాట సమాధానం ఇస్తూనే… ఏడుపురాగం అందుకుంది… అఖిల్ సోహెల్ ని వెనకేసుకొచ్చాడు… దోస్త్ కదా… ఆమె వదల్లేదు… ఏడుస్తూ డిబేట్ పెట్టింది… దీనితో సొహెల్ బ్యాడ్ అయిపోయాడు… ఆఫ్టర్ ఆల్ ఒక కుక్కపిల్ల బొమ్మ చిచ్చు పెట్టింది…
సీన్ కట్ చేస్తే, సొహెల్ కన్ఫెషన్ రూంలో తేలాడు… ఓపిక పరీక్షలో గెలిచి, గోల్డ్ మైక్ ద్వారా ప్రజలకు సపోర్ట్ చేయాలని అప్పీల్ చేశాడు… హఠాత్తుగా నిన్న మోనాల్ ఏడ్చినట్టే ఈరోజు సొహెల్ ఏడుపురాగం ఎత్తుకున్నాడు… ఆరియన పట్ల తన వ్యవహార ధోరణికి ఒకరకంగా పశ్చాత్తాపం ప్రకటించాడు…
ఇలా రెండుమూడు రోజుల ఆటను అరియానా హైజాక్ చేసిపారేసింది… ఇప్పుడామె పాపులారిటీలో హారికను, మోనాల్‌ను దాటేసింది… పైగా అవినాష్ ఫ్యాన్స్ వోట్లు కూడా రేపు కలుస్తాయి… అఖిల్ ఫ్యాన్స్ వోట్లు మోనాల్, సొహెల్ నడుమ చీలిపోతాయి… అభిజిత్ వోట్లు ఏమీ హారికకు ట్రాన్స్‌ఫర్ కావు… సో, సిట్యుయేషన్ అరియానాకు అనుకూలంగా మారుతోంది… హారిక పులుసులోకి జారిపోయినట్టే కనిపిస్తోంది… అనగా ఎలిమినేషన్‌కు దగ్గరవుతున్నట్టుగా ఉంది…
నిజానికి ఈ లెవల్‌కు వచ్చాక… టాప్ ఫైవ్‌లో ఉన్నా ఒకటే… బయటికి వచ్చేసినా దాదాపుగా ఒకటే… హారికకు వచ్చే నష్టం పెద్దగా ఏమీ ఉండదు… కానీ ఫైనలిస్టుగా పేరు, చివరివారం రెమ్యునరేషన్ మాత్రం కోల్పోతుంది… ఎలాగూ విజేత ఎవరో తేలిపోతున్నట్టుగానే ఉంది… బహుశా రన్నరప్ ప్లేసు వైపు అరియానా వేగంగా అడుగులేస్తున్నట్టుగా ఉంది… అఫ్ కోర్స్, అది కూడా చివరివారం ఆటతీరుతో తేలుతుంది… కానీ ఈలోపు తను ఫైనలిస్టుగా తన పేరు ఖరారు చేసుకున్నట్టే కనిపిస్తోంది…!!
Share this Article