తమరి బొంద, బోకె… ఆలూ లేదు, చూలూ లేదు… ముప్పు పేరు ఒమిక్రాన్ అట..!!

అదుగో ఒమిక్రాన్…. వచ్చె, వచ్చె… అయిపోయింది, అంతా అయిపోయింది, ఇక సత్తెనాశ్… అదుగో రెండు కేసులు, హైదరాబాద్ కూడా వచ్చేసిందట… ఈ నీచ్ కమీన్ మీడియా చేస్తున్న దుర్మార్గం, సమాజాన్ని ప్యానిక్ చేస్తున్న దారుణం అంతా ఇంతా కాదు… దిక్కుమాలిన జర్నలిజానికి అజ్ఞానం తోడయితే ఎంత నష్టమో ఒమిక్రాన్ వార్తలే చెబుతున్నయ్… అన్నింటికన్నా నీచం ఏమిటంటే అప్పుడే రాష్ట్రాల వైద్యారోగ్య బాధ్యులు కూడా ఆ రేంజులో మాట్లాడుతుండటం… కొత్తగా ఆంక్షలు, జరిమానాలు అంటూ బెంబేలెత్తించడం… అరాచకానికి అసలైన నకళ్లు వీళ్లు… ఒకవైపు అంతర్జాతీయ వైద్య నిపుణులేమో ఒమిక్రాన్ ఒకరకంగా ప్రపంచానికి మేలు చేయబోతోంది, పాండెమిక్‌ను ఎండెమిక్ చేయబోతోంది అని విశ్లేషిస్తున్నారు… ఆ కరోనా వేరియంట్‌తో ప్రాణాపాయాలు పెద్దగా లేవనీ చెబుతున్నారు… కానీ మన మీడియా, మన ఆరోగ్య శాఖలు, మన ప్రభుత్వాలు మాత్రం అర్జెంటుగా మళ్లీ లాక్ డౌన్లు పెట్టేసి, కార్పొరేట్ డ్రగ్ మాఫియాకు వేలు, లక్షల కోట్లు సంపాదించి పెట్టాలనే తహతహలో ఉన్నట్టుగా వ్యవహరిస్తున్నయ్… అంతా ఆధునిక ప్రపంచంలోని మిస్-ఇన్‌ఫర్మేషన్ అనే మరో మాఫియా పైత్యం… దీనికితోడు 1963లో ఇదే పేరుతో సినిమా వచ్చింది అంటూ సోషల్ మీడియా చేసే దరిద్రపు ప్రచారం సరేసరి…

వాడెవడో వచ్చాడు, హోటల్‌లో దిగాడు, వాడికి కరోనా, జీనోమో సీక్వెన్స్ చేయిస్తే ఒమిక్రాన్ అని తేలింది అని మొన్నటి నుంచీ తెగచావగొడుతున్నది మీడియా… మిత్రుడు, కరోనాపై నిరంతరం అధ్యయనం చేస్తున్న విద్యావేత్త  Amarnath Vasireddy……  సోషల్ పోస్ట్ ఓసారి చదవండి… మళ్లీ మాట్లాడుకుందాం…

---

పోయిందే ! పోయి పొచ్చి ! It’s gone !

Ads

November 20… బెంగళూరు ఎయిర్‌పోర్ట్‌లో దక్షిణాఫ్రికాకు చెందిన ఒక 66 ఏళ్ళ వ్యక్తి దిగాడు. ఎయిర్‌పోర్ట్‌లో టెస్ట్ చేస్తే అతనికి పాజిటివ్ అని తేలింది. హోటల్‌లో క్వారెంటైన్ కమ్మని చెప్పారు.

22 హోటల్‌కు వెళ్లి, అతని శాంపిల్ సేకరించి, జీనోమ్ సీక్వెన్సింగ్‌కు పంపారు.

ఆయనేమో కరోనా నెగటివ్ అనే రిపోర్ట్ చూపించి, దుబాయ్‌కి 27 న వెళ్ళిపోయాడు.

నిన్న అతని జీనోమ్ sequencing report వచ్చింది. అతనికి ఓమిక్రాన్ అని తేలింది. ఎక్కడయ్యా పెద్దాయన అని చూస్తే ఆయన 27 నే దుబాయ్‌కి వెళ్ళిపోయాడు అని తేలింది. వామ్మో, ప్రైవేట్ ల్యాబ్‌లో దొంగ నెగటివ్ సర్టిఫికెట్ సంపాదించి తుర్రుమన్నాడు అనుకొన్నారు.

ఆయనను నేరుగా కలిసిన 24 మందిని చెక్ చేశారు. అందరికీ నెగటివ్. ఇలా కాదులే అని ఈ 24 మందిని కలిసిన మొత్తం 240 మందిని, అంటే సౌత్ ఆఫ్రికా పెద్దాయనకు సెకండరీ contacts ను చెక్ చేశారు. అందరికీ నెగటివ్.

దీన్ని బట్టి ప్రభుత్వ వైద్యుల బృందం ఆయన సంపాదించిన కరోనా నెగటివ్ సర్టిఫికెట్ బోగస్ కాదు నిజం అని తేల్చింది.

దీన్ని బట్టి తేలింది ఏమిటంటే…

1 . ఆయన వాళ్ళ వూళ్ళో చెక్ చేసుకున్నప్పుడు నెగటివ్. అటుపై బహుశా విమానం ఎక్కే ముందు లేదా ఒక రోజు ముందు సోకింది.

2 . ఆయన బెంగళూరు ఎయిర్‌పోర్ట్‌లో దిగేటప్పటికీ కనీసం వొళ్ళు నొప్పులు కానీ, జలుబు కానీ లేదు. కానీ టెస్ట్‌లో పాజిటివ్ వచ్చింది.

3 . ఏడు రోజుల్లో నెగటివ్ వచ్చింది. ఆయన ప్రైమరీ లేదా సెకండరీ కాంటాక్ట్స్‌కు ఎవరికీ సోకలేదు.

4. అన్నిటికంటే ముఖ్యం ఆయన వయస్సు 66. ఈ సోది ఓమిక్రాన్ ఏదో చేసేస్తుందని ప్రచారం ఏదైతే ఉందో… ఇక మీ ఇష్టం…