పెద్దన్న అమెరికాకు మళ్లీ చేతులు మూతులు కాలక తప్పదేమో..!!

అమెరికా నుండి యూరోపియన్ యూనియన్ కి ముప్పు ఉంది కానీ రష్యా నుండి కాదు – జెర్మనీ MP సహ్రా !

జెర్మనీ పార్లమెంట్ మెంబర్ సహ్రా [Sahra Wagenknecht] అమెరికాని ఉద్దేశించి తీవ్రమయిన వ్యాఖ్య చేసింది. యునైటెడ్ స్టేట్స్ ఆఫ్ అమెరికా ప్రపంచంలోనే చాలా ప్రమాదకరమయిన దేశం అంటూ వ్యాఖ్యానించింది 2016 లో. ఎందుకు..?

CIA దాని అనుబంధ సంస్థలకి ఓ అలవాటుంది ! ఫాల్స్ ఫ్లాగ్ ఈవెంట్ [False Flag Event ]… నాజీ జెర్మనీ నుండి పుణికి పుచ్చుకున్నాయి CIA, పెంటగాన్లు … ఇది మొదటి ప్రపంచ యుద్ధం కాలం నాటి నుండీ ఉంది. ఫలానా దేశం వల్ల మనకి ముప్పు ఉంది అంటూ మొదట గోబెల్స్ ప్రచారం చేయించేవాడు. 1939 లో పోలాండ్ దేశాన్ని ఇలాగే ఆక్రమించుకుంది జెర్మనీ ఆపరేషన్ ‘’హిమ్లర్’’ [Operation Himmler] పేరుతో! ఇలాంటి నెపంతోనే జపాన్ మంచూరియాని ఆక్రమించుకుంది కాస్త అటూ ఇటూ అదే సమయంలో[Mukden Incident].

గల్ఫ్ ఆఫ్ టోన్కిన్ [Gulf of Tonkin ]

1964 లో దక్షిణ చైనా సముద్ర తీరంలో అంటే ఉత్తర వియాత్నాంకి చెందిన సముద్ర జలాల్లో చొచ్చుకి వచ్చిన అమెరికన్ యుద్ధ నౌకల మీద వియాత్నాం కి చెందిన పాట్రోల్ బొట్లు దాడి చేసాయి. దాంతో అమెరికన్ కాంగ్రెస్ వియాత్నాం మీద ఎలాంటి చర్య తీసుకోవడానికి అయినా అధ్యక్షుడికి సర్వ అధికారాలు కట్టబెడుతూ తీర్మానం చేసింది. ఫలితంగా వియాత్నాం యుద్ధం పేరుతో మారణ హోమం జరిగింది. ఒక దేశపు ప్రాదేశిక జలాల్లోకి అక్రమంగా చొచ్చుకి వెళ్లి, వాళ్ళే దాడి చేసారు అంటూ ఉల్టా  అబద్దాలని ప్రచారం చేసి వియాత్నాం యుద్ధంలో చేతులు కాల్చుకుంది అమెరికా అప్పట్లో. ఇంతా చేస్తే వియాత్నాం యుద్ధంలో సాధించింది ఏమీ లేదు కానీ అమెరికన్ ఆయుధ సంస్థలు బాగుపడ్డాయి.

WMD [Weopons of Mass Destruction]

ఇరాక్ లో సద్దాం హుస్సేన్ జన హనన ఆయుధాలు భారీ మొత్తంలో పోగు చేసాడు అంటూ నాటోతో పాటు అమెరికా దళాలు దాడి చేసాయి ఇరాక్ మీద. ఇది కూడా అబద్ధపు ప్రచారమే అని చివరికి తేలిపోయింది కానీ నాటోతో పాటు అమెరికా ఆయుధాలని పరీక్షించుకోవడానికి సహాయపడ్డది తప్పితే వేరే ప్రయోజనం లేదు. ఇరాక్ యుద్ధం తరువాత అక్కడ ప్రజా వ్యవస్థ ఇప్పటికి కోలుకోలేదు కానీ ఇటు నాటోతో పాటు అటు అమెరికన్ ఆయుధ సంస్థలు లాభపడ్డాయి.

సిరియా అంతర్యుద్ధం

సిరియా అధ్యక్షుడు అల్ అసద్ బషర్ తన ప్రజల మీద నేర్వ్ గాస్ ప్రయోగిస్తున్నాడు అంటూ అక్కడ ప్రభుత్వ వ్యతిరేక దళాలకి డబ్బు ఆయుధాలు సరఫరా చేసి హింసని ప్రజ్వరిల్ల చేసింది అమెరికా. అసలు అక్కడ ISIS కి డబ్బు,ఆయుధాలు ఇచ్చి మారణహోమానికి కారణం కేవలం అమెరికా మాత్రమే… మళ్ళీ అదే ISIS ని తుద ముట్టించడానికి అంటూ సిరియాలో నాటో,అమెరికన్ దళాలు ప్రవేశించి మరింత హింసని ప్రజ్వరిల్లచేసింది అమెరికా ! ఇక్కడ రష్యా ప్రాబల్యం తుడిచి పెట్టడానికే అమెరికా, నాటో దళాలు అధిక ప్రాముఖ్యం ఇచ్చాయి.

CIA,పెంటగాన్ లు ప్లాన్ చేస్తూ ఉంటాయి. అమెరికన్ కార్పోరేట్ మీడియాని తమని కవర్ చేయమని అడుగుతాయి. అవి CIA,పెంటగాన్ కి ప్రపంచవ్యాప్తంగా మద్దతుగా ప్రచారం చేస్తూ ఉంటాయి. నిజానికి అమెరికన్ మీడియా హౌస్ లలో ఉండే బోర్డ్ ఆఫ్ డైరెక్టర్స్ లలో చాలావరకు అమెరికన్ ఆయుధ సంస్థల కాంట్రాక్టర్లు ఉన్నారు. యుద్ధానికి ప్రేరేపించే ఎలాంటి వార్తలని అయినా మీడియా హౌస్ లు విస్తృతంగా కవరేజ్ ఇస్తాయి… ఎందుకంటే పరోక్షంగా ఆయుధ సంస్థల నుండి భారీగా విరాళాలు వస్తాయి వీటికి. ఇదో విష వలయం!

రష్యా బూచి !

రెండవ ప్రపంచ యుద్ధంలో విలన్ పాత్ర పోషించిన జెర్మనీ ఆ యుద్ధం తరువాత నాటోలో కలిసిపోయి మంచిది అయ్యిపోయింది… కానీ నాజీ జెర్మనీని ఓడించడంలో కీలక పాత్ర పోషించిన రష్యా మాత్రం విలన్ అయి కూర్చున్నది. రెండవ ప్రపంచ యుద్ధంలో అప్పటి రష్యా తన సైన్యంలో పనిచేసిన సైనికులని ఎక్కువ సంఖ్యలో కోల్పోయింది. యుద్ధం ముగిసి 75 ఏళ్ళు గడిచినా ఇప్పటికీ రష్యాలో మగ వారి శాతం తక్కువగా ఉంది అంటే అర్ధం చేసుకోవచ్చు రష్యా ఎంతగా నష్టపోయిందో ! కేవలం తనకి పోటీగా వస్తున్నది అనే నెపంతో యూరపుని నార్త్ అట్లాంటిక్ ట్రీటీ [North Atlaantic Treaty Organisation ] పేరుతో రష్యా ని బూచిగా చూపించి యూరోపు దేశాలని వేరు చేసింది అమెరికా.

ఉక్రెయిన్ కథ

అమెరికా, నాటో దేశాలు ఉక్రెయిన్ ని తమతో కలుపుకోవడానికి చేస్తున్న కుట్ర పూరిత ఆలోచనలే రష్యా ఉక్రెయిన్ ని ఆక్రమించుకునే ప్రయత్నాలకు కారణం… 1991 లో సోవియట్ పతనం తరువాత ఉక్రెయిన్ స్వతంత్ర దేశంగా అవతరించినప్పటి నుండి నాటో, అమెరికాలు ఎలాగో అలా ఉక్రెయిన్ ని తమతో కలిపేసుకోవడానికి ప్రయత్నిస్తూనే ఉన్నాయి. ఉక్రెయిన్ కనుక నాటోలో చేరితే రష్యా నుండి నల్ల సముద్రం ద్వారా జరిగే ఎగుమతుల మీద ప్రభావం పడుతుంది. ఎందుకంటే ఉక్రెయిన్ కి నల్ల సముద్ర జలాల మీద హక్కు ఉన్నది కనుక… అందుకే రష్యా 2014 లో ఉక్రెయిన్ లో భాగంగా ఉన్న క్రిమియాని ముందు తన అధీనంలోకి తీసుకుంది ముందుజాగ్రత్త చర్యగా… క్రిమియాని స్వాధీనం చేసుకున్నందుకు రష్యా మీద ఆర్ధిక ఆంక్షలు విధించింది అమెరికా.

రష్యా భయానికి కారణాలు ఏమిటీ ?

ఉక్రెయిన్ కనుక నాటో లో చేరితే అప్పుడు ఉక్రెయిన్ లో అమెరికా, నాటో దేశాల మిసైల్ డిఫెన్స్ వ్యవస్థని, ఎయిర్ బేస్ లని ఉక్రెయిన్ లో నెలకొల్పుతాయి. ఉక్రెయిన్ సరిహద్దు నుండి కేవలం 15 సెకన్లలో రష్యా సైనిక స్థావరాల మీద మిసైల్స్ దాడి చేసే వెసులుబాటు కలుగుతుంది. 15 సెకన్ల వ్యవధి అనేది ప్రతిస్పంచించడానికి రష్యాకి సరిపోదు. పైగా నల్ల సముద్రంలో నాటో, అమెరికన్ నావీ ప్రాబల్యం పెరిగిపోతుంది. దాంతో రష్యా కి నల్ల సముద్రం నుండి ఎగుమతులు చేయడం కష్టం అయిపోతుంది. ఉక్రెయిన్ నాటో తో కలిస్తే రష్యా అప్పుడు ఒకేసారి నాటో,అమెరికన్ దళాలతో యుద్ధం చేయాల్సి వస్తుంది. ఇది జరగకుండా ఉండాలి అంటే ఉక్రెయిన్ తన అధీనంలో ఉండాలి అనేది రష్యా భావన. ఇక్కడ ఉక్రెయిన్ ని తటస్థ దేశంగా వదిలేస్తే అసలు ఏ గొడవా ఉండదు… కానీ అమెరికా అలా వదిలేస్తుందా ?

యూరోపియన్ యూనియన్ లో విభేదాలు!

నిజానికి రష్యా నుండి యూరోపు దేశాలకి సహజ వాయువు సరఫరా అవుతున్నది. పక్కనే ఉన్న జెర్మనీకి రష్యాతో గొడవపడడం అస్సలు ఇష్టం లేదు. రష్యా నుండి తమకి ముప్పు ఉంది అని జెర్మనీ అనుకోవడం లేదు. పైగా రష్యా , జెర్మనీ మధ్య మంచి వాణిజ్య సంబంధాలు ఉన్నాయి. కానీ అమెరికా తానా అంటే తందానా అనే బ్రిటన్ మాత్రం ఉక్రెయిన్ విషయంలో అమెరికాకి వత్తాసు పలుకుతున్నది. తన స్వప్రయోజనాల కోసం యూరోపియన్ యూనియన్ నుండి బయటికి వచ్చింది కానీ నాటో లో కొనసాగుతున్నది కేవలం అమెరికన్ ప్రయోజనాలకోసమే.

రష్యా – ఉక్రెయిన్ చరిత్ర.

ఉక్రెయిన్ రాజధాని కీవ్ [KIEV ] ప్రస్తుతం ఉక్రెయిన్ లోనే ఉన్నా 1624 నుండి సోవియట్ యూనియన్ ఏర్పడే నాటికి అది రష్యా రాజధానిగా ఉండేది. ఉక్రెయిన్ తూర్పు భాగంలో ఎక్కువ శాతం మాట్లాడే భాష రష్యన్. అలాగే ఉక్రెయిన్ దేశం మొత్తం ఎక్కడికెళ్ళినా ప్రజలు రష్యన్ మాట్లాడతారు కూడా. 1990 లో సోవియట్ విచ్చిన్నం కాక మునుపే రష్యా ఉక్రెయిన్ ల మధ్య ఒక ఒప్పందం జరిగింది: ఉక్రెయిన్ లో భాగంగా ఉన్న క్రిమియా ద్వీప కల్పంలో సోవియట్ జమానా నాటి అతి పెద్ద నౌకా స్థావరం [నల్ల సముద్రం ] ఉంది… ఒప్పందంలో భాగంగా ఎట్టి పరిస్థితుల్లోనూ క్రిమియా ని విదేశీ సంస్థల చేతిలో పెట్టకూడదు… కానీ స్వతంత్ర దేశంగా ఏర్పడిన నాటి నుండి అమరికా, నాటో దేశాలు ఉక్రెయిన్ లో అలజడులు సృష్టించి తమకి అనుకూలంగా ఉండే అధ్యక్షుడిని ఉక్రెయిన్ లో ఉంచడానికి కృషి చేస్తూనే ఉన్నాయి. ఇదే రష్యా తీవ్రంగా స్పందించడానికి కారణం అయ్యింది. చివరికి క్రిమియాలో రేఫరండం నిర్వహించినప్పుడు 80% ప్రజలు రష్యాలో కలవడానికి వోటు వేసారు దాంతో క్రిమియాని సైనిక చర్య ద్వారా పుతిన్ రష్యాలో కలిపేసుకున్నాడు 2014 లో…

ఒకప్పటి సోవియట్ లో భాగంగా ఉన్న ఉక్రెయిన్ సరిహద్దులు ఇప్పటి సరిహద్దులు ఒకటే ! అలాంటప్పుడు రష్యా ఉక్రెయిన్ ని కలుపుకుంటే హఠాత్తుగా నాటో దేశాలకి ముప్పు ఎలా ఏర్పడుతుంది ? అదే నాటో, అమెరికా దేశాలు ఉక్రెయిన్ ని తమలో చేర్చుకొని తమ సైనిక స్థావరాలని రష్యా సరిహద్దుల్లో పెడితే రష్యాకి ముప్పు లేకుండా ఉంటుందా ?

ట్రంప్‌ను దింపేసి ఆయుధలాబీ

డోనాల్డ్ ట్రంఫ్ ని పదవీచ్యుతుడిని చేయడంలో ఆయుధ బేహారులు ప్రముఖ పాత్ర పోషించారు ! నాటో దేశాల భద్రత బాధ్యత అమెరికాది కాదు, మీ రక్షణ బాధ్యత మీరే చూసుకోవాలి అంటూ ట్రంఫ్ బహిరంగంగా చేసిన ప్రకటన ఫలితంగానే తన పదవిని కోల్పోయాడు. యుద్ధం లేకపోతే అమెరికన్ ఆయుధ లాబీ కి నష్టాలు అవుతాయి… అదే రెండో సారి ట్రంఫ్ కనుక అధ్యక్షుడు అయితే నాటో నుండి తన సైన్యాన్ని వెనక్కి రప్పిస్తాడు కనుక యుద్హాలు అంటూ ఇక ఉండవు కాబట్టి ట్రంఫ్ ని దించేయాలి. అదీ కారణం…

ఉక్రెయిన్ విషయంలో రష్యా వెనక్కి తగ్గే ప్రసక్తే ఉండదు కాబట్టి అక్కడ ఘర్షణ జరిగి తీరుతుంది. క్రిమియా విషయంలో కూడా మొదట్లో ఇలానే అన్నారు కానీ చివరకి రష్యా స్వాధీనం చేసుకుంది. ఇప్పుడు ఉక్రెయిన్ విషయంలో కూడా అదే జరిగి తీరుతుంది! మోడీ మద్దతు ఖచ్చితంగా పరోక్షంగా వ్లాదిమిర్ పుతిన్ వైపే ఉంటుంది కానీ అది బయటపడదు… పోయిన నెలలో పుతిన్ భారత పర్యటనలో ఉక్రెయిన్ విషయంలో హామీ తీసుకునే వెళ్ళాడు. బదులుగా పుతిన్, మోడీ, జింగ్పింగ్ ల మధ్య శిఖరాగ్ర సమావేశం జరుగుతుంది… చైనాతో కొన్ని ఇష్యూస్ సెటిల్ కావచ్చు బహుశా… ఇక మిగిలింది తైవాన్… భారత్ ఈ విషయంలో తటస్థంగా ఉంటుంది..!!