బీహార్‌లో ముసలం పెట్టిందే ప్రశాంత్ కిషోర్… మునిగే టైటానిక్ పేరు నితీశ్…

అయితే RJD మద్దతు తీసుకోవడం, కుదరకపోతే బిజేపి మద్దతు తీసుకోవడం… అంతే తప్ప నేరుగా అసెంబ్లీలో స్వంతంగా మెజారిటీకి కావాల్సిన సీట్లు ఎన్నడూ గెలవలేదు… ఐనా ఇన్నేళ్లు ముఖ్యమంత్రిగా కొనసాగుతూ వచ్చాడు అంటే నితీశ్ కుమార్ ఎంతటి ఘటికుడో అర్ధం అవుతుంది. రాజకీయ నాయకుడు అంటే ఏదో ఒకలా రాజకీయం చేసి అధికారంలో కొనసాగడం అనేది ఒక ప్రామాణికంగా ఉండిపోయిన ఈ రోజుల్లో నితీశ్ కుమార్ దానికి భిన్నంగా ఏమీ లేడు… అసలు భారత దేశ రాజకీయ చరిత్రలో నితీశ్ కుమార్ లాగా మెజారిటీ లేకుండా ముఖ్యమంత్రిగా కొనసాగిన రాజకీయ నాయకుడు మరొకరు లేరు…

ఒకసారి గత ఎన్నికలలో ఎవరు ఏ విధంగా గెలిచారో చూద్దాం !

---

బీహార్ లో బిజేపి :

2015 లో 157 సీట్లలో పోటీ చేసి 53 సీట్లని గెలిచింది – 33%

2020 లో 110 సీట్లలో పోటీ చేసి 74 సీట్లని గెలిచింది – 67 %

******

బీహార్ లో నితీశ్ కుమార్ JDU:

2015 లో JDU 101 సీట్లలో పోటీ చేసి 71 సీట్లని గెలిచింది – 71%

2020 లో JDU 115 సీట్లలో పోటీ చేసి 45 సీట్లని గెలిచింది – 39%

******

2015 లో RJD 101 సీట్లలో పోటీ చేసి 80 సీట్లని గెలుచుకుంది – 80%

2020 లో RJD 144 సీట్లలో పోటీ చేసి 73 సీట్లని గెలుచుకుంది – 50.6 %

***********

2015 లో కాంగ్రెస్ 41 సీట్లలో పోటీ చేసి 27 సీట్లని గెలుచుకుంది – 67%

2020 లో కాంగ్రెస్ 70 సీట్లలో పోటీ చేసి 20 సీట్లు గెలుచుకుంది – 28%

********

బీహార్ లో కుల రాజకీయాలకే పెద్ద పీట ఉంటుంది ఎప్పుడూ. అయితే నితీశ్ కుమార్ ఇంత హఠాత్తుగా బిజేపితో తెగదెంపులు చేసుకొని RJD, కాంగ్రెస్ తో చేతులు కలపడం దేనికి ?

ఆపరేషన్ లోటస్ ! ఎవరు ఈ ఆర్సీపీ సింగ్..? 

చాలామందికి తెలియని ఒక పేరు ఉంది… అది RCP సింగ్ ! ఎవరీ RCP సింగ్ ? RCP సింగ్ ఉత్తరప్రదేశ్ కేడర్ IAS ఆఫీసర్ [రిటైర్డ్ ]. నితీశ్ కుమార్ కి నమ్మినబంటు. JDU లో నితీశ్ కుమార్ తరువాత రెండవ స్థానంలో ఉన్నాడు. JDU పార్టీకి ఇంచార్జ్ గా వ్యవహరిస్తున్నాడు గత దశాబ్దకాలంగా! అయితే ప్రశాంతంగా ఉన్న వాతావరణాన్ని చెడగొట్టడంలో పేరు పడ్డ ప్రశాంత్ కిషోర్ అంటే RCP సింగ్ కి అసలు పడదు… బెంగాల్, తమిళనాడు, ఆంధ్రప్రదేశ్ అసెంబ్లీ ఎన్నికలకి సలహాదారుగా పనిచేసిన తరువాత తిరిగి బీహార్ రాజకీయాలలోకి వచ్చిన ప్రశాంత్ కిషోర్ ని దగ్గరకి రానివ్వవద్దు అంటూ RCP సింగ్ తీవ్రంగా అభ్యంతర పెట్టాడు… నితీశ్ కుమార్ వినకుండా ప్రశాంత్ కిషోర్ ని పక్కన పెట్టుకోవడంతో RCP సింగ్ నితీశ్ కుమార్ నుండి దూరంగా జరగడం మొదలుపెట్టాడు…

RCP సింగ్ JDU పార్టీకి జాతీయ అధ్యక్షుడు. అదే సమయంలో JDU కోటా కింద మోడీ మంత్రివర్గంలో కాబినెట్ మంత్రి పదవి దొరికింది. ఎప్పుడయితే ప్రశాంత్ కిషోర్ మళ్ళీ నితీశ్ కుమార్ పంచన చేరాడో RCP సింగ్ అమిత్ షాతో సన్నిహితంగా మెలగడం ప్రారంభించాడు. దాంతో మహారాష్ట్ర ప్రయోగాన్ని అమిత్ షా బీహార్ లో చేయబోతున్నాడని పసిగట్టిన నితీశ్ కుమార్ RCP సింగ్ కి మళ్ళీ రాజ్యసభ టికెట్ ఇవ్వలేదు…

ఇక బీహార్ లోని JDU లో RCP సింగ్ తో సన్నిహితంగా ఉండే MLA లని నితీశ్ కుమార్ గట్టిగా హెచ్చరించాడు… RCP సింగ్ తో ఎలాంటి సంబంధం పెట్టుకోవద్దు అంటూ… RCP సింగ్ కి మళ్ళీ రాజ్యసభ టికెట్ ఇవ్వకపోవడాన్ని సమర్ధించుకుంటూ నితీశ్ కుమార్ చేసిన ప్రకటన కూడా ఒకింత ఆశ్చర్యం కలిగించింది రాజకీయ వర్గాలలో… ‘‘RCP సింగ్ కి కేంద్ర కాబినెట్ పదవి కేవలం అతని స్వంత వ్యవహారం. అంతే కానీ దానికి JDU తో ఎలాంటి సంబంధం లేదు..’’ ఇదీ నితీశ్ కుమార్ చేసిన ప్రకటన. కానీ RCP సింగ్ JDU పార్టీకి జాతీయ అధ్యక్షుడు అన్న సంగతిని అదీ తన ఆమోదంతోనే తన పార్టీకి జాతీయ అధ్యక్షుడు అయ్యాడు అన్న సంగతిని మరిచిపోయి ఇలా ఎలా ప్రకటన చేశాడు ? పైగా ఎలాంటి అవినీతి ఆరోపణలు లేని RCP సింగ్ మీద తన MLA ల చేత తీవ్రమయిన ఆరోపణలు చేయించాడు నితీశ్ కుమార్. దాంతో RCP సింగ్ రాజీనామా చేసి పార్టీ నుండి బయటికి వెళ్ళిపోయాడు…

ఇదంతా నాణానికి ఒకవైపు. మరోవైపు RCP సింగ్ JDU లో ఉన్నంత కాలం తన పప్పులు ఉడకవు అని గ్రహించిన ప్రశాంత్ కిషోర్ చాలా పకడ్బందీగా పన్నిన వ్యూహంలో నితీశ్ కుమార్ చిక్కుకున్నాడు. ఇన్ని రాష్ట్రాలలో తన వ్యూహాలతో ముఖ్యమంత్రులని చేసిన నేను నా స్వంత రాష్ట్రంలో నేనే ఎందుకు ముఖ్యమంత్రిని కాకూడదు ? ఇదీ ప్రశాంత్ కిషోర్ ఆలోచన ! ఎలాగూ నితీశ్ కుమార్ వృద్ధుడు అయిపోయాడు. అదీ కాక మళ్ళీ ఎన్నికలలో గెలుస్తాడు అన్న గ్యారంటీ లేదు. కనుక బీహార్ ముఖ్యమంత్రి పీఠం తనదే అన్న ధీమాలో ఉన్నాడు ప్రశాంత్ కిషోర్… ఎటూ కాంగ్రెస్ తో మంచి సంబంధాలని కొనసాగిస్తున్నాడు కనుక తనకి మద్దతు ఇస్తుంది అనే భరోసా ! నేరుగా చెప్పాలి అంటే త్రాచు పాముని నెత్తిన పెట్టుకొని ముంగీసని ఇంట్లో నుండి బయటికి పంపించాడు నితీశ్ కుమార్.

బిజేపి పరిస్థితి ఏమిటి ?

ఇప్పటికిప్పుడు ప్రజలని ఆకర్షించగలిగిన నాయకుడు బీహార్ బిజేపిలో ఎవరూ లేరు. ఉన్న సుశీల్ మోడీకి చాలా సౌమ్యుడు అన్న పేరు ఉంది తప్పితే జనాకర్షక నేత కాదు. ఇప్పటి వరకు బీజేపీ ఏమైనా సీట్లు గెలుచుకుందీ అంటే అది నరేంద్ర మోడీ చరిష్మా వల్లనే తప్ప బీహార్ లో క్రౌడ్ పుల్లర్ అంటూ ఎవరూ లేరు బిజేపికి… అగ్నిపథ్ విషయంలో దేశంలో ఎక్కువ విధ్వంసం జరిగింది బీహార్ లోనే ! బిజేపికి వ్యతిరేకంగా నితీశ్ కుమార్, కాంగ్రెస్ తో కలిసి చేసిన పని అదంతా! బిజేపి బీహార్ నిరుద్యోగులకు సైన్యంలో ఉద్యోగాలు ఇవ్వకుండా అడ్డు పడుతున్నది అంటూ విషప్రచారం చేయడంలో విజయవంతం అవగలిగాడు నితీశ్. ప్రస్తుతం బీహార్ బిజేపికి అస్సాం ముఖ్యమంత్రి హిమంత బిశ్వ శర్మ లాంటి నాయకుడి అవసరం ఉంది.

RJD పరిస్థితి ?

ప్రస్తుతం బీహార్ లో శాసనసభ్యుల సంఖ్యతో పోలిస్తే అతి పెద్ద పార్టీ ఆర్జేడీ… లాలూ ప్రసాద్ యాదవ్ ఇంకా క్రియాశీల రాజకీయాల నుండి పక్కకి పోలేదు. కాకపోతే ఒకప్పుడు తన భార్య రబ్రీ దేవిని ముఖ్యమంత్రిని చేసి బీహార్ ప్రజలతో ఆడుకున్నాడు ఇప్పుడు కొడుకు తేజస్వి యాదవ్ ని ఉప ముఖ్యమంత్రిని చేసి ఆట ఆడుతున్నాడు. విచిత్రం ఏమిటంటే ఇదే లాలూ ప్రసాద్ యాదవ్ అవినీతి మీద రాజకీయంగా పోరాటం చేసి, ఎదిగిన నితీశ్ కుమార్ ఇప్పుడు అదే RJD పంచన చేరి, తేజస్వీ యాదవ్ కి ఉప- ముఖ్యమంత్రి పదవిని ఇచ్చి, తన పదవిని కాపాడుకున్నాడు. అలాగని బీహార్ ప్రజలు RJD కి వోట్లు వేయరు అనుకుంటే భ్రమ ! నితీశ్ కుమార్ చేసిన చెత్త రాజకీయం పరోక్షంగా RJD కే లాభం అవుతుంది. 2024 ఎన్నికలు ప్రధానంగా RJD, బిజేపిల మధ్య పోరాటంగా ఉండబోతున్నది.

అంతిమంగా RJD, కాంగ్రెస్ ల పంచన చేరి నితీశ్ కుమార్ పెద్ద తప్పు చేశాడు. ఇప్పటికే నానాటికీ తీసికట్టులాగా ఉన్న నితీశ్ కు వచ్చే ఎన్నికల్లో ఆశాభంగం తప్పదు… ఓటింగ్ షేర్ RJD వైపు వెళ్ళిపోతుంది, తద్వారా తన సీట్లు కోల్పోయి, వాటిని RJD చేతుల్లో పెట్టబోతున్నాడు నితీశ్ కుమార్. ప్రశాంత్ కిషోర్ మాత్రం ఎప్పటిలాగానే కాంగ్రెస్ తో ఒప్పందం చేసుకొని మరీ బీహార్ కి తిరిగి వచ్చాడు కాబట్టి అధికారం RJD చేతుల్లోకి వెళ్ళకుండా కాంగ్రెస్, కమ్యూనిస్టులతో చేతులు కలిపి, నితీశ్ కుమార్ ని పక్కన పెట్టి, తాను ముఖ్యమంత్రి అవడానికి ప్లాన్ చేశాడు ఇప్పటికే…

ఎలా చూసినా సుదీర్ఘ రాజకీయ అనుభవం ఉన్న నితీశ్ కుమార్ కి ఇదే చివరి అవకాశం ! మరో సంవత్సరం పోతే కానీ నితీశ్ కి ప్రశాంత్ కిషోర్ గేమ్ ప్లాన్ అర్ధం అవదు… కానీ అప్పటికే సమయం మించి పోయి ఉంటుంది.

(nitish with rcp singh)

2024 లోకసభ ఎన్నికలు, అదీ బీహార్ రాష్ట్రంలో బిజేపికి ఒక ఛాలెంజ్ అవుతుంది. బహుశా అమిత్ షా తన గేమ్ ప్లాన్ లో భాగంగా RCP సింగ్ తో పాటు చిరాగ్ పాశ్వాన్ ని తురుపుముక్కగా వాడుకొని విజయం సాధించాలని చూస్తున్నట్లుగా ఉంది… కానీ అదంత సులువుగా జరిగే పని కాదు. నితీశ్ కుమార్ ని ఎవరూ ఏమీ చేయనక్కర లేకుండా ప్రశాంత్ కిషోర్ చేతిలో చావు దెబ్బ తింటాడు కాబట్టి దృష్టి పెట్టాల్సింది ప్రధానంగా లాలూ RJD మీదనే. కుల రాజాకీయాలకి నెలవు అయిన బీహార్ లో RJD ని ఎదుర్కోవాలంటే అంత సులభం కాదు బిజేపి కి. అందుకే బీహార్ పెద్ద ఛాలెంజ్ అవుతుంది అని నా ఉద్దేశ్యం!

ఉపసంహరణ : 2024 ఎన్నికలలో ప్రధానమంత్రి అభ్యర్ధిగా నరేంద్ర మోడీకి సమీపంలోకి రాగల రాజకీయ నాయకుడు ఎవరూ లేరు కాబట్టి, ఈ ఒక్క అంశం మాత్రమే బీహార్ లో బిజేపిని గట్టు ఎక్కించగల ఫ్యాక్టర్ అవుతుంది… బీజేపీకి వేరే దిక్కు కూడా లేదు…