అత్తరు కాదు, గంధం కాదు… ఆ దేహం నుంచి ఏదో పూల పరిమళం…

---

‘‘ ఈరోజు కవి, విమర్శకులు సాంధ్యశ్రీ గారితో మాట్లాడుతుంటే ఎందుకో సినీనటి “భానుప్రియ ” విషయం వచ్చింది.. ఆమాట ఈమాట  మాట్లాడుతుంటే.. భానుప్రియగారి ఒంటి నుంచి అద్భుత పరిమళం వస్తుంది మీకు తెలుసా? అన్నారు.. అంతకు ముందు ఇదే విషయం … భానుప్రియతో సినిమాలు తీసిన ఓ దర్శకుడు కూడా చెప్పి వుండటంతో… ఆసక్తిగా వుంది, వివరంగా చెప్పమన్నాను..

*అప్పుడెప్పుడో సినిమా షూటింగ్ చూద్దామని అన్నపూర్ణ స్టూడియోకు వెళ్ళాను.. అక్కడ విశ్వనాథ్ గారు, రామానాయుడు వున్నారు.. వాళ్ళతో కూర్చొని ముచ్చట్లు చెప్పుకుంటున్నప్పుడు ఓ కారొచ్చి మాముందు ఆగింది… కారులోంచి భానుప్రియ గారు దిగి మా దగ్గరకొచ్చారు. ఆమె రాగానే ఓ రకమైన అద్భుతపరిమళం గుప్పుమంది.. అది అత్తరో, సెంటో, డియోడరెంట్ వాసనో కాదు.. అంతకు ముందె‌ప్పుడో ఓ అవధూతను కలిసినప్పుడు…. ఆయన నుంచి వచ్చిన సహజ వాసన గుర్తొచ్చింది..

తీరా విచారిస్తే.. భానుప్రియకు సెంటు, అత్తరులంటే ఎలర్జీ అట.. అసలామె పరిమళపు సబ్బు కూడా వాడదట.. బాంబే ఫైఫ్ స్టార్ హోటల్లో వున్నా.. కుంకుడుకాయలతోనే తలస్నానం చేసేవారట.. అలాగే ఒంటికి సున్నిపిండి రాసుకొని స్నానం చేసేవారట. అటువంటి భానుప్రియ నుండి అవధూతల నుంచి వచ్చే పరొమళం రావడం నిజంగా ఆశ్చర్యమనిపించింది..” అన్నారు సాంధ్యశ్రీ..!!

భాను ప్రియగారి సంగతలా వుంచి అసలీ అవధూతలెవరో తెలుసుకుందాం…!!  అవధూత ఒక సంస్కృత పదం. సాధువులను లేక ఆధ్యాత్మికులను సూచించడానికి కొన్ని భారతీయ మతాలు లేదా ధార్మిక సాంప్రదాయాల నుండి ఈ అవధూత పదం ఆవిర్భవించిందని చెబుతారు. వీరు మానవ సహజమైన అహంకారాన్ని (ఇగో) వదలి ప్రతిఫలం లేకుండా సామాజిక మర్యాద, ప్రమాణాల కోసం ప్రాపంచిక (లౌకిక) చర్యలను చేపడతారు. సర్వాంగాలను పరిత్యజించిన వీరిని ‘సర్వసంగపరిత్యాగులు’ లేక ‘సన్యాసులు’ అని కూడా అంటారు.

వీరిని భారతీయ స్మృతులు కుటీచులు, బహుదకులు, హంసులు, పరమహంసులు అని నాలుగు తరగతులుగా విభజించాయి. వీరందరికంటే మహోన్నత స్థితికి చేరిన మహనీయులను..”అవధూతలంటారు.. భాను ప్రియ గారు అవధూత కాదు.. ఆమె ఒక సినీనటి మాత్రమే.. మరి ఈ అవధూతలను పోలిన పరిమళం ఎలా వస్తుందన్న ప్రశ్నకు సమాధానం లేదు. చెప్పేవాళ్ళు కూడా దొరకలేదు.. ఆమెకు అసలే తెలియదు…