ఏడుసార్లు ఆస్కార్ తలుపు తట్టి… నామినేషన్ దశకూ చేరలేక భంగపడి…

ఆస్కార్ దుకాణంలో అన్నీ ఎక్కువ రేట్లే ఉంటాయి… డబ్బు ఉండగానే సరిపోదు, దుకాణదారుడిని మెప్పిస్తే తప్ప కొనుక్కోలేం… ఆస్కార్ అంగడిలో ఏదైనా సరుకు కొనుక్కోవడం ఓ ఆర్ట్… అందుకే మనవాళ్లు చాలామంది భంగపడ్డారు… రాజమౌళి తెలివైన కొనుగోలుదారు, కొనడంలో సక్సెసయ్యాడు… దేశమంతా డప్పుమోతలు ఆకాశాన్నంటాయి… గతంలో బాలీవుడ్ నుంచి ఆస్కార్ ప్రయత్నాలు కొన్ని సీరియస్‌గానే జరిగాయి, కానీ ఎవరికీ ఏమీ రాలేదు…

స్లమ్ డాగ్ మిలియనీర్ సినిమాకు సంబంధించి రెండు అవార్డులొచ్చినయ్… అదేమో బ్రిటిష్ కంపెనీ నిర్మించిన సినిమా… అయితే ఇండియా నుంచి అత్యధిక సార్లు ఆస్కార్ తలుపుతట్టి భంగపడింది ఎవరో తెలుసా..? కమల్ హాసన్…! నో డౌట్, తను గొప్ప నటుడు… వయస్సు 68 ఏళ్లు… ఇండస్ట్రీలో వయస్సు 60 ఏళ్లు… దేశంలో ఇంతటి సుదీర్ఘమైన సినిమా కెరీర్ ఎవరికీ లేదు… తను లీడ్ రోల్స్ చేసిన 7 సినిమాలు ఆస్కార్ ముంగిట్లో నిలిచాయి, కానీ మార్కెటింగ్ వైఫల్యం కారణంగా ఒక్కటి కూడా కనీసం నామినేషన్ పొందలేకపోయింది… షార్ట్ లిస్ట్ దశనూ చేరలేకపోయింది…

తన వ్యక్తిగత జీవితం మీద చాలామందిలో ఓ పెదవి విరుపు కనిపిస్తుంది… తనతో ఏళ్ల సహజీవనం చేసిన వాళ్లకే తనంటే అసహ్యం… నటుడు వేరు- మనిషి వేరు… తను హేతువాది… రాజకీయవాది… పాలిటిక్సులో అట్టర్ ఫ్లాప్… సుహాసినిని, బిడ్డలను బజార్లకు పంపి డాన్సులు చేయించినా జనం వోట్లేయలేదు… ఇదంతా వ్యక్తిగతం, కానీ వృత్తిగతం అపూర్వం… అనేక ప్రయోగాలు, అబ్బురపరిచే నటన… తన అసలు పేరు పార్థసారథి… తండ్రి శ్రీనివాసన్… వెరసి పార్థసారథీ శ్రీనివాసన్…

ఆస్కార్ సంగతికొస్తే… మొత్తం ఏడుసార్లు ఆస్కార్ ప్రయత్నాలు జరిగాయి… సాగర్ హిందీ సినిమాలో లీడ్ రోల్ పోషించినందుకు తొలి ప్రయత్నం… అదేగాకుండా క్షత్రియపుత్రుడు, ద్రోహి, నాయకుడు, భారతీయుడు, హేరామ్, స్వాతిముత్యం సినిమాల్లో నటనకూ ఆస్కార్ అవార్డుకు దరఖాస్తు చేశారు… కానీ ఆస్కార్‌ అవార్డుకు ఓ దరఖాస్తు పడేస్తే సరిపోదు… చాలా ఎఫర్ట్ ఉంటుంది… అది చేతకాలేదు… డబ్బు ఖర్చు పెట్టలేదు… నా నటనకు కళ్లుమూసుకుని అవార్డు ఇస్తారులే అనుకున్నాడు… దెబ్బకొట్టింది… ఒక్కటంటే ఒక్కటీ నామినేషన్ దశకు చేరలేదు…