సరోగేట్ యాడ్స్ వదిలేసిన ఆదర్శుడు… సజ్జనార్ సలహా మాత్రం పెడచెవిన…

గుడ్, మంచి సూచన… మల్టీ లెవెల్ మార్కెటింగ్ కంపెనీలు అమాయకులకు వల వేస్తాయి… ఉచిత భోజన సమావేశాలు పెట్టి, ఏదో విధంగా మోటివేట్ చేసి, అబద్ధాలు చెబుతాయి… జీతం సరిపోక, అదనపు ఆదాయం కోసం దారులు వెతుక్కుంటున్నవారిని ఏజెంట్లుగా చేర్చుకుంటున్నాయి… కొంత అమౌంట్ డిపాజిట్ చేసి, దానికి సమాన విలువైన వస్తువులు తీసుకొని మీరు మా సంస్థలో చేరండి,.. మీతోపాటు మరో ముగ్గురిని చేర్పించండి… తద్వారా మీకు కమిషన్ వస్తుందని చెబుతాయి…

ఆ ముగ్గురు తలా ముగ్గురిని అంటే తొమ్మిది మందిని చేర్పించాలి. తద్వారా మీకు మరికొంత కమిషన్ అంటారు. ఆ తొమ్మిది మంది తలా ముగ్గురిని అంటే ఇరవై ఏడు మందిని చేర్పిస్తారు. తద్వారా మరికొంత కమిషన్ అని వూరిస్తారు. అలా చేరేవాళ్లందరూ డిపాజిట్ చేసే డబ్బులు, తద్వారా వచ్చే కమిషన్లతో ఆదాయ‌మే ఆదాయమంటారు.. ఫలానావాడు సంవత్సరంలోనే కారు కొన్నాడు, ప్లాట్ కొన్నాడు, నెలకు రెండు లక్షల సంపాదన.. ఇలా చెవిలో జోరీగ‌లాగా చెబుతుంటారు. ఇదొక పెద్ద వల. లింకులు తెగితే గొలుసు పనికిరాన‌ట్టు ఇందులో కూడా అంతే. ఎవ‌రో త‌ప్ప బాగుప‌డ్డ‌వాళ్లు లేరు.

మోసపూరిత కంపెనీల్లో చేరి, వాటిలో ఇరుక్కుపోయి నష్టపోయినవాళ్లు ఎంతో మంది… అప్పులు చేసి మరీ ఎంఎల్ఎం (మల్టీ లెవెల్ మార్కెటింగ్) సంస్థల్లో చేరి, ఆ తర్వాత ఆస్తులు అమ్ముకొని రోడ్డుపాలయినవారు ఎంతో మంది… ఆత్మహత్యలు చేసుకున్నవారు కూడా వున్నారు… అలాంటి కంపెనీల్లో ఒకదాని తరఫున ప్రకటనల్లో నటిస్తున్నాడు అమితాబ్ బచ్చన్… నటుడిగా ఇప్పటికీ కోట్లాది రూపాయల సంపాదన స్వంతం… కొడుకు, కోడలు కూడా రెండు చేతులా సంపాదిస్తున్నారు… అయినా సరే పనికిమాలిన కంపెనీలను, ప్రజల ఆరోగ్యాలతో, ఆర్ధిక వ్యవస్థలతో ఆటలాడుకుంటున్న కంపెనీలను ప్రమోట్ చేయడం అబ్సర్డ్…

మల్టీ లెవెల్ మార్కెటింగ్ కంపెనీల ద్వారా జరుగుతున్న చెడు అమితాబ్ కు తెలియకుండా వుంటుందా? అయినా అలాంటి మోసపూరిత కంపెనీల తరఫున ప్రచారం చేయడమంటే క్షమించరాని నేరం… అది చూసి… అలాగే చూస్తూ వుండిపోలేక, ఇది నాకు సంబంధించిన వ్యవహారం కాదు కదా… తెలంగాణ ఆర్టీసీ ఎండీగా నా బస్సులేవో నేను నడుపుకుంటే సరిపోతుంది కదా అని అనుకోకుండా సజ్జనార్ ఆలిండియా పెద్దమనిషి అమితాబ్ కు ట్వీట్ చేశాడు… అమితాబ్ ఆ ట్వీట్ చదివావా..? గుట్కా సరోగేట్ యాడ్స్ డబ్బు వాపస్ చేసిన ఆదర్శం ఆమ్వే ప్రకటనల మీద ఎందుకు లేదు..?!