బడి మారుతోంది… తెలుగు మందబుద్ధులకే పాఠాలు ఎక్కడం లేదు…

ఈ నేపథ్యంలో రచయిత, దర్శకుడు Prabhakar Jaini  రాసిన ఓ పోస్టు ఆసక్తికరం అనిపించింది… (సాక్షిలో ఇలాంటి రాతలు ఎందుకు కనిపించవు..? కనీసం సజ్జల రామకృష్ణారెడ్డికి ఈ విషయం ఎందుకు పట్టదు..?) సరే, ఆ పోస్టు ఇదీ…

విద్యారంగం మీద ఎంత ఖర్చు చేసినా అది ఒక గొప్ప పెట్టుబడిగానే మిగిలిపోతుంది. సమాజ ఉన్నతికి విద్య చాలా ముఖ్యం. ఇటువంటి వసతులు కల్పించడం వలన, విద్యార్థులలో ఒక ఆత్మ స్థైర్యం కలుగుతుంది. భవిష్యత్తులో ఎన్నో సాధించగలమనే నమ్మకం ఏర్పడుతుంది.ఈ వసతులు కల్పించడంతో పాటు, ఉత్తమ మానవీయ విలువలు కూడా బోధించాలి. మానవీయ విలువలు బోధించడం ప్రభుత్వ బడులలో మాత్రమే సాధ్యమవుతుంది.

సంపూర్ణ వ్యక్తిత్వం కల సమాజ సభ్యులుగా ఎదుగుతారు. ఈ విలువలు లేని చదువుల వల్లనే ప్రస్తుత సమాజంలోని వికృత పరిణామాలు, విద్యార్థి స్థాయిలోనే హత్యలు, మానభంగాలు, ప్రేమలు, భగ్న ప్రేమలు, దాడులు, ఆత్మహత్యలు చూస్తున్నాము. అందుకే కేవలం చదువే కాదు చదువుతో పాటు ఉత్తమమైన, ఉన్నతమైన విలువలు, పెద్దల పట్ల మర్యాద, గౌరవం; దేశం పట్ల ప్రేమ; తమ మతం పట్ల భక్తి, గౌరవం పెంపొందిస్తూ, ధైర్యాన్ని నూరిపోస్తూ, వినమ్రంగా, humility తో ప్రవర్తించే యువతరాన్ని తయారు చేయగలిగితే, ఒక అద్భుతమైన భారతదేశాన్ని భవిష్యత్తులో చూడవచ్చును

మంచి తనం కూడా, ఒకరిని నుంచి ఒకరికి సుగంధంలా వ్యాపిస్తుంది. రాజకీయ పార్టీలు కూడా, ఎన్నికలయిపోయిన తర్వాత రాజకీయాలు చేయడం మానేసి, పిల్లలకు జరుగుతున్న మంచిని అభినందించాలి. ఒక జాతి పునర్నిర్మాణానికి అన్ని పార్టీలు కలిసి కృషి చేయాలి. కార్పొరేట్ విద్యలో విద్యార్థులు నలిగిపోతున్నారు. యాంత్రికమైన నిబంధనల వల్ల రోబోలుగా తయారవుతున్నారు. వారిని కూడా ప్రభుత్వం ఒక కంట కనిపెడుతూ, తగు చర్యలు తీసుకోవాలి.

వీటన్నింటికన్నా ముఖ్యమైనది, ఉపాధ్యాయులలోని నిబద్ధత. అధికారంలోని పార్టీలు మారుతుంటాయి. విద్యార్థులు చదువులు పూర్తి చేసుకుని వెళ్ళిపోతుంటారు. కానీ, టీచర్లు మాత్రం అదే గురు స్థానంలో ఉంటారు. ఒక మంచి గంధం చెట్టులా వారు తరతరాల విద్యార్థులకు పాఠాలతో పాటు తమ సౌజన్యాన్ని, వ్యక్తిత్వాన్ని పంచుతూ, ఒకే చోట నిలబడిపోతుంటారు. వారి ద్వారా, వారి ప్రతిరూపాలుగా, విద్యార్థులు ప్రపంచమంతటా, పరిమళాలు వ్యాపింప చేస్తుంటారు.

కాబట్టి, టీచర్లు ఆదర్శమూర్తులై, స్వార్థ ప్రయోజనాలకు, స్వలాభాపేక్ష కోసం కాకుండా, ఒక విద్యారణ్యాన్ని సృష్టించే మహాకార్యంలో భాగస్వాములుగా, తమ విద్యుక్త ధర్మాన్ని నిర్వర్తించాలి. ఈ ఫోటో – ఒక గొప్ప ఆత్మ విశ్వాస ప్రతీక…. అన్నట్టు… నాకు రాజకీయాలతో సంబంధం లేదు. నాది ఆంధ్రప్రదేశ్ రాష్ట్రం కూడా కాదు…