Subramanyam Dogiparthi…. నిర్మాత డి రామానాయుడుకి తన సినిమాలో ఏదో ఒక అతిధి పాత్రలో నటించే సెంటిమెంట్ ఉందని మనందరికీ తెలిసిందే . డాక్టర్ గానో , పోలీసు ఆఫీసర్ గానో తళుక్కుమంటుంటాడు . ఈ సినిమాలో పెళ్ళి కొడుకుగా కనిపిస్తారు . విజయనిర్మలను పెళ్లి చేసుకుంటారు .
చక్కటి ఎమోషనల్ , సెంటిమెంటల్ సినిమా . ఓ చిన్న పాప కరుడుగట్టిన ముగ్గురు హంతకులలో ప్రేమను చిగురింపచేసి , మనుషులను చేసి , పోలీసులకు లొంగిపోయేలా చేస్తుంది . పాపగా బేబీ రాణి గొప్పగా నటించింది . పాప పెద్దయిన తర్వాత పెళ్లి కూతురుగా విజయనిర్మల అతిధి పాత్రలో నటించారు .
ఈ సినిమాలో మధుమతి అని హిందీ నటి ఓ క్లబ్ డాన్సులో డాన్స్ చేస్తుంది . అచ్చం హెలెన్ లాగానే ఉంటుంది . హెలెన్ చెల్లెలు అనుకునేవారు ఆరోజుల్లో . రాజబాబు కూడా ఒక అతిధి పాత్రలో నటించారు . ధూళిపాళ , పద్మనాభం , రుష్యేంద్రమణి , అల్లు రామలింగయ్య , రావి కొండలరావు ప్రభృతులు నటించారు .
Ads
పెండ్యాల వారి సంగీతం శ్రావ్యంగా ఉంటుంది . కొండలపైన కోనలలోన గోగులు పూసే , నన్నే నన్నే చూడు ఉన్నాను సైదోడు , మనిషి మనిషికీ తేడా ఉంది తేడాలో ఒక పోలిక ఉంది , రాముడెందుకు పుట్టాడు , ఉల్లి పూల పడవా గట్టి మావా మల్లెపూల తెరను దించి పాటలు చాలా శ్రావ్యంగా ఉంటాయి . పాట లేకుండా కృష్ణ , వెన్నిరాడై నిర్మలకు డాన్స్ ఒకటి ఉంటుంది . దేవిక కూడా ఓ డాన్స్ వేస్తుంది . అన్ని డాన్సులూ బాగుంటాయి .
ఇదే సినిమాను రామానాయుడు తమిళంలో కుళంతైక్కాగ అనే టైటిల్ తో రీమేక్ చేసారు . వంద రోజులు ఆడి ఘన విజయాన్ని సాధించింది . ఇదే బేనర్ పై ఈ సినిమాను తాతినేని ప్రకాశరావు దర్శకత్వంలో నన్హా ఫరిస్తా టైటిల్ తో , మళయాళంలో ఒమనక్కుంజు అనే టైటిల్ తో రీమేక్ చేసారు . జి వి ఆర్ శేషగిరిరావు దర్శకత్వంలో వచ్చిన మన తెలుగు సినిమా కూడా బాగానే ఆడినట్లు గుర్తు .
మా నరసరావుపేటలో వెంకటేశ్వర పిక్చర్ పేలసులో చూసా . టి వి లో కూడా చూసా . యూట్యూబులో ఉంది . చూడతగ్గ సినిమా . టైం దొరికితే చూడండి . నటీనటులు అందరూ మట్టసంగా , చక్కగా నటించారు . చివరి సీన్లు హైదరాబాద్ గోల్కోండ ఖిల్లాలో షూట్ చేసారు .
Share this Article