నిజానికి ఇది అనేకసార్లు మీడియాలో, సోషల్ మీడియాలో చక్కర్లు కొట్టి ఉంటుంది… ఏదో వాట్సప్ గ్రూపులో ఇంగ్లిషులో ఉన్న కంటెంటు చూసి, ఆసక్తిగా, సంక్షిప్తంగా… తెలిసీతెలియని నా అనువాద జ్ఞానంతో బాగా కుస్తీపడి, ఏదో ఆత్మానందం కోసం ఫేస్‌బుక్‌లో పోస్ట్ చేశా… సమయానికి ఫోటో కూడా దొరకలేదు… కానీ కొన్ని వందల లైకులు, షేర్లు… అదే మళ్లీ వందల వాట్సప్ గ్రూపుల్లోకి చేరి విపరీతంగా సర్క్యులేటైంది… అనేకమంది తమ పేర్లతో షేర్లు చేసుకున్నారు… పాతదే కదా… అంత వైరల్ కావల్సిన అవసరమేముంది..? అంటే… ఇలాంటి Ever Inspirative … నిత్యస్ఫూర్తి కథలు… ఉన్నత స్థాయిల్లో పనిచేసిన వ్యక్తుల నడుమ ఉండాల్సిన పరస్పర స్నేహ, గౌరవ, మర్యాదపూర్వక సంబంధాలనూ చెప్పే కథ ఇది… ఆ ఆర్ద్రత ఉంది కాబట్టే ఈరోజుకూ కొత్తకొత్తగా చదివిస్తున్నది ఈ పాత కథ… అదే ఇది…
అబ్దుల్ కలాం రాష్ట్రపతిగా ఉన్నప్పుడు ఓసారి కూనూరు (ఊటీ) వెళ్లాడు… అక్కడికి వెళ్లాక తెలిసింది తనకు, ఫీల్డ్ మార్షల్ శాం మానిక్ షా అక్కడే ఓ మిలిటరీ హాస్పిటల్‌లో చికిత్స పొందుతున్నాడని… 1971 ఇండో-పాక్ యుద్ధ సమయంలో ఆయన మన ఆర్మీ చీఫ్… తనను పరామర్శించాలని అప్పటికప్పుడు నిర్ణయించుకున్నాడు కలాం… నిజానికి ముందే నిర్ణయించబడిన ప్రోగ్రాములకు భిన్నంగా రాష్ట్రపతి పర్యటనలకు, కదలికలకు ఆయన సెక్యూరిటీ గానీ, ప్రొటోకాల్ గానీ అంగీకరించవు… కానీ కలాం వీటన్నింటికీ అతీతుడు కదా… అభ్యంతరాలను తోసిపుచ్చి, నేరుగా హాస్పిటల్‌కు వెళ్లాడు… మానిక్ షా బెడ్ పక్కనే చాలాసేపు కూర్చున్నాడు… ఆయన ఆరోగ్యస్థితిని కనుక్కున్నాడు.., వేగంగా కోలుకోవాలని ఆకాంక్షించాడు…
తిరిగి వెళ్లిపోయే సమయంలో… ‘‘ఇక్కడంతా సౌకర్యంగానే ఉందా..? నేను చేయదగిన సాయం ఏమైనా ఉందా..? సంకోచం లేకుండా అడుగు మిత్రమా..?’’ అన్నాడు కలాం…
‘‘ఓ అసంతృప్తి ఉంది సార్…’’ అన్నాడు మానిక్ షా…
‘‘ఏమిటది..?’’ కలాం మొహంలో ఆశ్చర్యం…
‘‘నా దేశ ప్రథమ పౌరుడే నా దగ్గరకు వచ్చినప్పుడు నేను లేచి తనకు శెల్యూట్ చేయలేని స్థితిలో ఉన్నందుకు అసంతృప్తి సార్…’’ అన్నాడు కళ్లు తుడుచుకుంటూ…
కలాం కళ్లల్లో కూడా తడి… షా చేయి మీద చేయి వేసి ఆత్మీయంగా నొక్కాడు…
‘‘సార్, చిన్న రిక్వెస్టు… ఇరవై ఏళ్లుగా నాకు ఫీల్డ్ మార్షల్ ర్యాంకుకు దగిన పెన్షన్ రావడం లేదు…’’ చెప్పాడు షా…
కలాం ఢిల్లీ వెళ్లగానే చేసిన మొదటిపని… షా పెన్షన్ ఫైల్ తెప్పించుకోవడం..! తగిన ఆదేశాలు జారీచేయడం…! వారం రోజుల్లో డిఫెన్స్ సెక్రెటరీ నుంచి 1.25 కోట్ల బకాయిలకు సరిపడా చెక్కును ప్రత్యేక కొరియర్ ద్వారా ఊటీకి పంపించారు…
దటీజ్ కలాం… ఇక్కడే చిన్న ట్విస్టు… ఒక్క రూపాయి కూడా వాడుకోకుండా ఆ డబ్బు మొత్తాన్ని మానిక్ షా ఆర్మీ రిలీఫ్ ఫండ్‌కు డొనేట్ చేశాడు… దటీజ్ షా… వావ్… ఎవరు ఎవరికి శెల్యూట్ చేయాలి..? ఒకరు తక్కువ కాదు, ఒకరు ఎక్కువ కాదు… జాతి శెల్యూట్ చేయదగిన కేరక్టర్లు కదా…!!
Share this Article
Ads