Subramanyam Dogiparthi…. అలనాటి ప్రముఖ నటి వాసంతి నిర్మించిన సినిమా 1971 లో వచ్చిన ఈ భలే పాప సినిమా . ప్రముఖ దర్శకులు కె యస్ ప్రకాశరావు దర్శకత్వం వహించిన ఈ సినిమాలో హీరో పాపే . పాపకోసం సినిమాలో ప్రేక్షకులను మెప్పించిన బేబీ రాణీయే ఈ సినిమాలో కూడా సినిమా అంతా తానై నటించి ప్రేక్షకులను మెప్పించింది . ( ఆ అమ్మాయి స్టంట్ మాస్టర్ సాంబశివరావు కూతురు)… మా నరసరావుపేటలోనే చూసా . కమర్షియల్ గా సక్సెస్ అయిందా లేదా అనే విషయం గుర్తు లేదు .
సినిమా కధకొస్తే హరనాథ్ కె ఆర్ విజయని ప్రేమించానని చెప్పి , గర్భవతిని చేసి ఓ చిన్న రైల్వే స్టేషన్లో వదిలేస్తాడు . అక్కడే పుట్టిన పాప తండ్రిని వెతుక్కుంటూ నగరానికొచ్చి , ఆఖరిలో తండ్రిని , తాతని , తల్లిని కలుపుతుంది . అయిదారేళ్ళ పిల్ల అవన్నీ చేయగలదా అంటే సినిమాల్లో చేయగలదు . అయితే అక్కడక్కడా అసాధారణ పిల్లలు ఉంటారు . ఉండవచ్చు .
ఆర్ సుదర్శనం సంగీత దర్శకత్వంలో పాటలు థియేటర్లో బాగానే ఉన్నాయి . అందాల జలపాతం చిందించు జల్లులో ఆనాడు ఒంటరిగా , చిట్టీ పాపా చిరునవ్వుల పాపా నా జాబిల్లీ నీవే బంగరు తల్లీ , అమ్మల్లారా అయ్యల్లారా మా అమ్మను ఎవరయినా చూసారా పాటలు శ్రావ్యంగా ఉంటాయి . జ్యోతిలక్ష్మి , విజయలలిత డాన్సులు హుషారుగా ఉంటాయి . యల్ ఆర్ ఈశ్వరి పాడిన నా వయసు పదహారు నా వలపు సెలయేరు పాట ఊగిస్తుంది .
హరనాథ్ , SVR , పద్మనాభం , నాగయ్య , ముక్కామల , త్యాగరాజు , రామదాసు , కె వి చలం , కె ఆర్ విజయ , జ్యోతిలక్ష్మి ప్రభృతులు నటించారు . బహుశా తమిళంలో కూడా ఉందేమో నాకు ఐడియా లేదు . సినిమా యూట్యూబులో ఉంది . ఆసక్తి కలవారు చూడవచ్చు . పాటల వీడియోలు కూడా ఉన్నాయి .
Share this Article
Ads