ఈ లోపాలు నానికి తెలియవు సరే.., దర్శకుడు చూసుకుని ఉండాల్సింది..!

.

(   Narukurti Sridhar ) …..ఇది కోర్ట్ రూమ్ డ్రామా అనొచ్చు కానీ , ‘ పింక్ ‘ లాంటి పదునైనది కాదు , మరాఠీ చిత్రం ‘ కోర్ట్ ‘ అంత రియలిస్టిక్ కూడా కాదు . తెరమీద సహజమైన పాత్రలు కనబడగానే “హమ్మయ్య చాన్నాళ్ళకు “ అని ఊపిరి పీల్చుకునే లోగానే, తెలుగు సినిమా తనకి బాగా అలవాటైన నాటకీయత వైపుకి పరుగు పెడుతుంది. దయా దాక్షిణ్యాలు మచ్చుకైనా లేని కర్కశుడైన విలన్ లేకుండా మనోళ్ళు సినిమా తీయలేరా!

కుటుంబ పరువు కోసం దేనికైనా తెగించే మంగపతి ( 17 ఏళ్ల కథానాయకురాలికి మేనమామ) , తండ్రి లేని తన తోడల్లుని కూతురు ఒక వాచ్ మాన్ కొడుకుని ప్రేమించడం తట్టుకోలేక POCSO ( Protection of Children from Sexual Offences Act) కేసు పెట్టిస్తాడు .

మైనారిటీ తీరని అమ్మాయితో ఆమె అనుమతితోనే సంభోగం జరిపినా అది నేరం . చిన్న పిల్లలని అబ్యూజ్ చేసే పెద్దవాళ్లకి deterrent గా ఉండాల్సిన చట్టం పదిహేడేళ్ల అమ్మాయి , పంతొమ్మిదేళ్ల అబ్బాయిల మధ్య ప్రేమని కూడా అదే దృష్టితో చూడొచ్చా ! నిజానికి ఇది చాలా చర్చించాల్సిన సున్నితమైన విషయమే . అయితే కోర్ట్ రూమ్ సన్నివేశాల్ని ఇంకొంత సహజంగా రాసుకుని ఉండాల్సింది .

బాధితురాలిని కనీసం చూడకుండా , ముద్దాయితో మాట్లాడకుండా కేవలం 78 రోజుల్లో ఫైనల్ జడ్జ్మెంట్ ( పద్నాలుగేళ్ల జైలు ) ఇచ్చేసే జడ్జి , విలన్ క్యారెక్టర్ POCSO కేసు పెట్టమని చెప్పగానే అతనికి భయపడి ఇష్టం లేకున్నా, కనీసం బాధితురాలి స్టేట్మెంట్ లేకుండా కేసు పెట్టే పోలీసులు , ఇంట్లో అందరూ వద్దంటున్నా తన మాట నెగ్గడం కోసం ఎంతకైనా తెగించే విలన్ (మంగపతి పాత్ర వేసిన శివాజీ ) అబ్బాయి, అమ్మాయి రూమ్ లోకి వెళ్లి వచ్చిన వీడియో చూడగానే ఏదో జరిగిపోయినట్లు ఊహించుకుని ఆవేశపడే లాయర్, సినిమా లోని నాటకీయత కోసం ప్రవర్తించే పాత్రలుగా కనిపిస్తాయి . కొన్ని కోర్ట్ సన్నివేశాలు హాస్యాస్పదంగా ఉంటాయి .

అయితే సంభాషణలు , చిన్న చిన్న పాత్రలపై తీసుకున్న శ్రద్ధ , ఎంత నాటకీయంగా ఉన్నా చూడగలిగేలా బోరు కొట్టకుండా తీసిన సన్నివేశాలు , రిఫ్రెషింగ్ గా ఉన్న ముఖ్య పాత్రధారులు ( టీనేజర్స్) , మన ఇంటి చుట్టూ తిరిగే చిన్న చిన్న పాత్రలు చిత్రాన్ని ఆసక్తిగా చూడగలిగేలా చేస్తాయి .

చాలా లోపాలే ఉన్నాయి . అయితే వాటిని పట్టించుకోకుండా ప్రేక్షకులని ఆకట్టుకునే కథనం కూడా ఉంది . టీనేజ్ అమ్మాయి , ఆమె తల్లి , కథానాయకుడు , డిఫెన్స్ లాయర్ ( ప్రియదర్శి ) ల మధ్య కొన్ని హృద్యమైన సన్నివేశాలు మూవీపై ఇష్టాన్ని కలిగిస్తాయి .

ఇక వస్తువు విషయానికి వస్తే ….?

chatGPT ని అత్యధికంగా దుర్వినియోగానికి గురైన చట్టాలేవి అని అడిగి చూడండి .

SC/ST atrocities act , 498 (a) ( గృహ హింస ) , POCSO , UAPA ( The Unlawful Activities (Prevention) Act) మొదటి నాలుగు స్థానాల్లో వస్తాయి . బలహీనుల కోసం పెట్టబడిన చట్టాలు బలవంతులు తమ లాభం కోసం వాడుకోవడం మన అనాగరికతకి , కనీస నిజాయితీ గానీ, తోటి మనిషిపట్ల సహానుభూతి గానీ లేని లంచగొండి సమాజాన్ని పట్టిస్తుంది .

UAPA, మేధావులు , విజిల్ blowers పై ఉపయోగించడం ద్వారా దుర్వినియోగం అవుతుందని వాదించే వారు , మిగతా చట్టాల దుర్వినియోగంపై చర్చని కూడా ఆహ్వానించకపోవడం ఆశ్చర్యకరం .

ఏదేమైనా బాధితులని నిజాయితీగా గుర్తించి చట్టాలని విచక్షణతో అమలుపరచక పోతే ఇటువంటి చట్టాల వల్ల బలహీనులకు కూడా ఒరిగేదేమీ ఉండదు . చట్టాలను తప్పు పట్టడం కూడా అర్థ రహితం . కన్ఫెషన్ అలవాటులేని సమాజంలో కేవలం చట్టాలు చేయగలిగేది కూడా ఏమీ లేదేమో !