.
Subramanyam Dogiparthi ….. చూసారా ఈ సినిమాను !? చూసి ఉండకపోతే వెంటనే చూసేయండి . తప్పకుండా చూడతగ్గ వెరైటీ సినిమా 1989 లో వచ్చిన ఈ ముత్యమంత ముద్దు . ప్రముఖ రచయిత యండమూరి వీరేంద్రనాధ్ నవల థ్రిల్లర్ ఆధారంగా నిర్మించబడిన సినిమా .
మరో విశేషం ఏమిటంటే సినిమాకు ఆయనే ఉపోద్ఘాతం ఇచ్చారు . It’s a social fantasy movie . యండమూరి వారికి super-natural powers/మానవాతీత శక్తుల మీద మక్కువ ఎక్కువ కదా ! దానికి ట్రయల్ రన్ ఈ నవల , ఈ సినిమా అని అనుకుంటాను .
Ads
హీరో గారికి ప్రేమ మీద అపార నమ్మకం . ప్రేమను ప్రేమించి , తపస్సు చేసి , సంకల్పసిధ్ధిని సాధించవచ్చు అనే ప్రగాఢ నమ్మకం . ఆ నమ్మకంతో తాను ప్రేమించిన హీరోయిన్ కొరకు వింధ్య పర్వతాలకు వెళ్ళి ఏడేళ్లు తపస్సు చేసి సంకల్పసిధ్ధిని సాధిస్తాడు . దానికి మెస్మరిజమనో , హిప్నటిజమనో , కనకట్టనో , ఏదో ఓ పేరు కూడా పెట్టవచ్చేమో ? పెట్టుకోవచ్చేమో ?
హీరోయిన్ సీత మగవారి ప్రేమ మీద చాలా అనుమానాలు , అపనమ్మకాలు , చీదర , వగైరా వగైరా . ఆమె అనుభవాలు అలాంటివి . అందుకు తగ్గట్టుగానే ఇంటి ఓనర్ గొల్లపూడి ఇంట్లో రామయ్య వీధిలో కృష్ణయ్య సినిమాలో విలన్ లాగా అడవాళ్ళను రుద్దుకుంటూ ఉంటాడు .
అతనిని మించి బేవార్స్ ఆఫీసులో బాస్ సుధాకర్ . వీళ్ళందరి దెబ్బతో మగవారి ప్రేమంతా ఆడవారిని లోబరుచుకోవటానికే అని ప్రగాఢ విశ్వాసం .
ఏడేళ్ల తర్వాత వచ్చి హీరోయిన్ని ఇంప్రెస్ చేయటానికి విఫల యత్నాలు చేస్తాడు . హీరోయిన్ చేత తిరస్కరించబడతాడు . బాస్ అక్రమ వ్యాపార రహస్యాలను సంపాదిస్తానికి పోలీసులకు సాయం చేయబోయి తానే హత్య కేసులో ఇరుక్కుంటుంది . హీరోయినుకు తెలియకుండా ఆమెను రక్షించటమే కాకుండా , తానే హత్యాప్రయత్నానికి గురవుతాడు .
DSP మురళీమోహన్ హీరోయిన్ సీతకు నిజాలను చెప్పి చావు బతుకుల మధ్య ఉన్న హీరోని రక్షించుకోమని చెపుతాడు . ఆమె వెళ్ళేటప్పటికే తెల్ల దుప్పటి కప్పేస్తారు డాక్టర్లు . హీరోయిన్ పిలుపుకు రెస్పాండ్ అయి బతుకుతాడు . నవలలో చనిపోతాడు . సినిమాలో బతికించబడతాడు . సినిమా శుభాంతం అవుతుంది .
ఇద్దరూ బాగా నటించారు . ఇద్దరిలో సీత ఇంకా బాగా నటించింది . ఈ రెండు పాత్రలు కాకుండా అంతులేని కధ సినిమాలో ఫటాఫట్ జయలక్ష్మి పాత్ర వంటి పాత్ర ఒకటి ఉంటుంది . దివ్యవాణి ఆ పాత్రలో చాలా బాగా నటించింది . ఈజీ గోయింగ్ పాత్ర . జీవితం అనుభవించేందుకే అని నమ్మే చార్వాక భౌతికవాది . చార్వాకం అంటే తిను , తాగు , సుఖించు తత్వం . భూమ్మీద సుఖపడితే తప్పు లేదురా అనే శాస్త్రం .
ఇతర ప్రధాన పాత్రల్లో చెప్పుకోవలసిన పాత్రలు బేవార్స్ బాస్ సుధాకర్ , సబ్ ఇనస్పెక్టర్ బ్రహ్మానందానివి . వీరిద్దరు కాకుండా రంగనాధ్ , మురళీమోహన్ , ప్రసాద్ బాబు , కాంతారావు , అన్నపూర్ణ , ఆలీ , నారాయణరావు తదితరులు నటించారు .
హంసలేఖ సంగీత దర్శకత్వంలో పాటలు శ్రావ్యంగా ఉంటాయి . బేక్ గ్రౌండ్ మ్యూజిక్ ఇంకా బాగుంటుంది . ఆయన అసలు పేరు గంగరాజు . కన్నడ పరిశ్రమకు సంబంధించిన ఈయనకు తెలుగులో ఇదే మొదటి సినిమా అనుకుంటా . వేటూరి సాహిత్యానికి బాలసుబ్రమణ్యం , జానకమ్మ పాడారు .
ఓ అందమా తెలుగింటి దీపమా పాట చాలా శ్రావ్యంగా ఉంటుంది . గొప్పింటి గోపమ్మా అంటూ సాగే పాట కూడా బాగుంటుంది . రాజేంద్రప్రసాద్ , సీతల మీద రెండు డ్యూయెట్లు ఉంటాయి . ఇచ్చుకో ముద్దిచ్చుకో , ప్రేమలేఖ వ్రాసా నీకంది ఉంటది అంటూ సాగుతాయి ఈ రెండు డ్యూయెట్లు . ప్రేమ లేఖ వ్రాసా పాట శ్రావ్యంగా ఉంటుంది . చిత్రీకరణ బాగుంటుంది .
సత్యమూర్తి డైలాగులను బాగా పదునుగా వ్రాసారు . ముఖ్యంగా సీత డైలాగులు బాగుంటాయి . స్క్రీన్ ప్లే , దర్శకత్వాన్ని రవిరాజా పినిశెట్టి నిర్వహించారు . సస్పెన్స్ బాగానే థ్రిల్లింగుగా ఉంటుంది . యండమూరి తన నవలకు థ్రిల్లర్ అని apt గానే పెట్టుకున్నారు .
సినిమా యూట్యూబులో ఉంది . ఓ ఆఫ్ బీట్ మూవీ . Watchable . నేను పరిచయం చేస్తున్న 1221 వ సినిమా .
#తెలుగు_సినిమాల_సింహావలోకనం #సినిమా_కబుర్లు #సినిమా_స్కూల్
Share this Article