ఎప్పటికీ ఈయనే ఏకైక సూపర్ స్టార్..! ఈ బుడ్డిదీపాలకేం తెలుసు ఆయన..?!

…… By……. Jagannadh Goud……   చిత్తూరు వి నాగయ్య – “పాల్ ముని ఆఫ్ ఇండియా”…. తెలుగు సినీ నటులు, దర్శకులు అంతా తల క్రిందికి కాళ్ళు పైకి లేపి, వంద సంవత్సరాలు తపస్సు చేసినా చిత్తూరు నాగయ్య కాలి చెప్పు మందం కూడా పనికి రారు అని చెప్పటం నిజానికి నాగయ్య గారిని అవమానించటమే అవుతుంది… కారణం ఏ చెట్టూ లేని చోట ఆముదపు చెట్టే మహావృక్షం అన్నట్లుగా ఇక్కడ ఉన్నవి అన్నీ ఆముదపు చెట్లే; ఈ ఆముదపు చెట్లని వేప చెట్లు, మర్రిచెట్లు, రావి చెట్లతో పోల్చటం కరక్ట్ కాదు… ఈ ఆముదపు చెట్ల లాంటి వీళ్ళని ఇక్కడే వదిలేసి నాగయ్య గారి విషయానికి వద్దాం… ఉప్పలదడియం నాగయ్య శర్మ (చిత్తూరు వి నాగయ్య) ని తొలితరం నటుడు, తొలి తరం మెగాస్టార్, తొలితరం సూపర్ స్టార్, తొలితరం తలైవా, తొలితరం బాద్ షా, తొలితరం మన్మధుడు అని ఆయా తరాల వాళ్ళు వాళ్ళకి తెలిసినట్లు పిలుస్తారు (నాటక రంగంలో “రంగ భూషణ” బిరుదాంకితుడు కూడా). కానీ ఏ తరానికి అయినా తెలుగు సినీ పరిశ్రమ లేదా దక్షిణ భారతదేశ ఫిల్మ్ ఇండస్ట్రీకే కాదు భారతీయ చలన చిత్ర పరిశ్రమలో ఒకే ఒక లెజెండ్ చిత్తూరు నాగయ్య గారు…