నా 2,700 అశ్లీల వీడియోల పెన్ డ్రైవ్‌లంటారా? అదొక నంబర్- అంతే…

ఇచ్చట రాసలీలల వీడియోలు చేయబడును…

నా పార్లమెంటు పరిధిలోని అపహాస్యాస్పదోపహతులైన నిర్హాస ప్రజలకు జర్మనీనుండి మీ ఓటు ప్రజ్ఞకు ప్రతిరూపమైన నానావికార ప్రజ్వలిత ప్రతినిధి వ్రాయు బహిరంగ లేఖార్థములు ఏమనగా:-

ఉభయకుశలోపరి నేనిక్కడ క్షేమముగాయున్నాను. మీ క్షేమమునకై ఇక్కడ చల్లని వాతావరణంలో చలికి చిల్ అవుతూ దేవుడిని ప్రార్థించుచున్నాను.

“అర్థాతురాణాం నగురుర్నబంధు:, కామాతురాణాం నభయం నలజ్జా;
విద్యాతురాణాం నసుఖం ననిద్రా, క్షుధా తురాణాం నరుచిర్నపక్వం”

ఈ శ్లోకాన్ని కొన్ని లక్షల మంది భారతీయులు నా వాట్సాప్ కు పంపడం వల్ల నా వాట్సాప్ ఆగిపోయింది. ఇంటర్లో సంస్కృతం తీసుకుంటే వందకు వంద మార్కులుస్తాయని చెప్పారు కానీ…పుస్తకం తీసి చదవడం అన్న సంస్కృతి నాకు చిన్నప్పటి నుండి లేదన్న విషయం మీకు తెలియనిది కాదు. అందువల్ల అంత గంభీరమైన శ్లోకానికి అర్థం తెలిసే అవకాశం నాకు లేదని సవినయంగా విన్నవించుకుంటూ… తెలియజేసుకుంటూ… ఆ విధంగా జర్మనీలో ముందుకు పోతున్నాను.

“కామాతురాణాం…” అన్న మాటకు మాత్రం అర్థం తెలుసు. నా డిక్షనరీలో భయం, లజ్జ అన్నవి ఉండవని నేను మీకు విడిగా చెప్పాల్సిన పనిలేదు.

ఇక దొరికిన నా 2,700 అశ్లీల వీడియోల పెన్ డ్రయివ్ లంటారా? అదొక నంబర్- అంతే. కొన్ని టెరాబైట్ల డేటా- కొంతే! అవి రిలీజ్ చేసిందెవరో మీకు తెలుసు. ఇదంతా ప్రతిపక్షాల కుట్ర. వీడియోల మార్ఫింగ్. నేను సత్యహరిశ్చంద్రుడి పక్కింటివాడిని. శ్రీరాముడి పార్టీకి మిత్రుడిని.

నాకు భారతీయ చట్టాలమీద అపారమైన నమ్మకముండబట్టే… రాసలీలల వీడియోలు లోకం చూడకముందే రాత్రికి రాత్రి బెంగళూరు కెంపేగౌడ అంతర్జాతీయ విమానాశ్రయంలో రెక్కల విమానమెక్కి జర్మనీలో దిగాను. వ్యాపారం పనుల్లో ముందే నిర్ణయించిన ట్రిప్ ఇదని నాకు తోడుబోయిన మా నాన్న ఇచ్చిన వివరణతో మీరు సంతృప్తి చెందకపోతే నేను చేయగలిగింది లేదు.

మనిషన్నాకా కూసింత కలాపోషణ ఉండాలని… ముత్యాలముగ్గులో రావుగోపాల్రావు చెప్పలేదా? ఎంత చెట్టుకు అంత గాలి. నా స్థాయికి తగినట్లు ఆయొక్క కలాపోషణ ఏదయితే ఉందో… అది నాచే పోషించబడింది.

అయినా నేను బాధ్యతగల ఎం పి ని. నాకెన్నో పనులుంటాయి. ఎందరో మహిళలు వచ్చి కలుస్తూ ఉంటారు. అందులో 2,700 వీడియోలంటే సముద్రంలో కాకి రెట్టంత కూడా కాకపోవచ్చు. ఇన్నేళ్ళుగా రికార్డ్ అయిన వీడియోలు సరిగ్గా సాధారణ ఎన్నికల ముందే విడుదలయ్యాయంటేనే ఇందులో అసాధారణ కుట్ర ఉందని మీకు ఈపాటికే తెలిసి ఉండాలి.

అన్నట్లు-
పోలింగ్ లోపు నేను భారత్ రాగలనో లేదో క్లారిటీ లేదు. కాబట్టి మీ విలువైన ఓటును మా పెన్ డ్రయివ్ గుర్తు మీద బలంగా గుద్ది… మా వీడియోలీల పార్టీని అఖండ మెజారిటీతో గెలిపించ ప్రార్థన. నేను ప్రత్యేకంగా నియోజకవర్గానికి రూపొందించిన మేనిఫెస్టో వీడియో పెన్ డ్రయివ్ ను మా స్థానిక కార్యకర్తలు ఊరికి వంద చొప్పున పంపిణీ చేస్తారు. పద్దెనిమిదేళ్లు నిండినవారు రహస్యంగా ఆ వీడియోలను చూసి… నన్నాశీర్వదించవలసినదిగా రెండు చేతులు జోడించకుండా అడుగుతున్నాను.

నిప్పు ముందు పుట్టి తరువాత నేను పుట్టాను. నా ప్రజ్ఞకు తుప్పు పట్టదు. నన్ను ముట్టుకుంటే ఎంతటివారైనా బూడిదకాక తప్పదు.

హెచ్ డి వీడియోలకు కాలం చెల్లింది. జర్మనీలో 4 కె , 8 కె వీడియోల క్లారిటీ చాలా క్రిస్టల్ క్లియర్ గా ఉంది. ఆ పనిమీద ఉన్నాను.

మిగతా విషయాలు సమక్షంలో మాట్లాడుకుందాము.

ఇట్లు;
మీ వీడియో ప్రజ్ఞా పాటవ ప్రతినిధి.
సంతకం …..
తేదీ…
జర్మనీ ఫ్రాంక్ ఫర్ట్ విడిది.

-పమిడికాల్వ మధుసూదన్
9989090018