శోభన్ బాబు , జయలలితల సినిమా . 1965 లో వచ్చిన హిమాలయ్ కి గోద్మే సినిమా ఆధారంగా 1973 లో మన తెలుగు సినిమా వచ్చింది . మనోజ్ కుమార్ , మాలా సిన్హాలు ప్రధాన పాత్రల్లో నటించిన హిందీ సినిమా బాగా హిట్టయింది . మన తెలుగు సినిమా బాగానే ఆడింది కానీ , హిందీ సినిమా అంత హిట్ కాలేదు . సినిమా పేరు డాక్టర్ బాబు…
ఓ పెద్ద పోలీసు ఆఫీసర్ గారి డాక్టర్ కొడుకు , పేదవారికి సేవ చేయాలనే సత్సంకల్పంతో ఓ గ్రామంలో హాస్పిటల్ పెట్టుకోవటం , అక్కడ తమిళనాడు ముఖ్యమంత్రి జయలలితతో ప్రేమలో పడటం , ఆమె తండ్రి ఓ పేద్ద గజదొంగ కావటం , చివరకు ఆ గజదొంగ లొంగిపోతూ చనిపోవటం . ఇదీ కధ టూకీగా .
టి చలపతిరావు సంగీత దర్శకత్వంలో పాటలన్నీ చాలా శ్రావ్యంగా ఉంటాయి . హిట్టయ్యాయి కూడా . విరిసే కన్నులలో వేయి బాసలున్నవిలే , నీవనుకున్నది నే కలగన్నది , అల్లనేరేడు చెట్టుకాడ అమ్మలాల , గాజులయితే తొడిగాడు నా రాజు నా మోజులైతే తీరేవి ఏరోజు , వయసు పిచ్చిది ప్రేమ గుడ్డిది , నా రాతకొద్ది దొరికాడు పాత బావయ్య పాటలు శ్రావ్యంగా ఉంటాయి . ఈ పాటలన్నీ సి నారాయణరెడ్డి వ్రాసినవే .
Ads
నాకెప్పుడూ నవ్వు తెప్పించే పాట ఒకటుంది . ఎవడురా దొంగ ఎవడురా దొరలకు ద్రోహులకు దొరకని నేనా అంటూ గజదొంగ మల్లు పాత్రలో SVR పాడతాడు . దొంగలు , గజదొంగలు , హంతకులు తామెందుకు అలా అయ్యామో జస్టిఫై చేసుకోవటానికి ఓ కధ మొదలెడతారు . క్షణక్షణం సినిమాలో శ్రీదేవికి తాను ఎందుకు దొంగ కావలసి వచ్చిందో వెంకటేష్ మాంచి కధ చెపుతాడు . చూస్తున్నాంగా . గాంధీని చంపిన గాడ్సే కూడా ఓ పేద్ద కధ చెప్పడం , అదేదో మహా గ్రంధం లాగా మన మిత్రులు దానిని తరచూ కోట్ చేయటం చూస్తూనే ఉన్నాం .
Off-screen లో శోభన్ బాబు , జయలలితల స్టోరీ మనకు తెలిసిందే . జయలలిత బయోపిక్ లో అసెంబ్లీలోనే కరుణానిధి చురక వేస్తాడు . On-screen లో కూడా జోడీ ముద్దుముద్దుగానే ఉంటుంది . ఇతర పాత్రల్లో SVR , గుమ్మడి , ముక్కామల , రాజనాల , రేలంగి , అల్లు రామలింగయ్య , రాజబాబు , జి వరలక్ష్మి , విజయలలిత , ప్రభృతులు నటించారు .
మా నరసరావుపేటలో వెంకటేశ్వర పిక్చర్ పేలసులో చూసినట్లు గుర్తు . వెంకటేశ్వరానా లేక నాగూర్వలినా కరెక్టుగా గుర్తు లేదు . మా నరసరావుపేట ఫ్రెండ్సే కన్పర్మ్ చేయాలి . కలర్ సినిమా . ముద్దుముద్దుగా , అందంగా ఉంటుంది . అందమైన హీరోహీరోయిన్లు . ఔట్ డోర్ లొకేషన్సూ హీరోహీరోయిన్లలాగానే అందంగా ఉంటాయి .
చూడని వారెవరయినా ఉంటే , ముఖ్యంగా శోభన్ – జయలలితల అభిమానులు , యూట్యూబులో ఉంది , చూసేయండి . A thing of beauty is a joy forever . జాన్ కీట్స్ చెప్పాడుగా . #తెలుగుసినిమాలసింహావలోకనం #తెలుగుసినిమాలు…… (డోగిపర్తి సుబ్రహ్మణ్యం)
Share this Article