బెంగుళూరు ఎందుకు మునిగిపోతోంది..? కారణాలపై అసలైన విశ్లేషణ..!!

ప్రస్తుతం బెంగళూరుని ముంచెత్తుతున్న వరదలకి కారణం ఏమిటో ప్రస్తుత బిజేపి ప్రభుత్వం ఒక శ్వేత పత్రం విడుదల చేయాల్సింది కానీ అలాంటి పనేమీ చేయలేదు. కనీసం ప్రింట్, ఎలెక్ట్రానిక్ మీడియా అయినా కారణాలని విశ్లేషించి ప్రజలకి అసలు నిజాలు చెప్పాల్సి ఉన్నా, ఆ పని చేయకుండా బెంగుళూరు వరదలని అదుపు చేయలేని ప్రభుత్వం అంటూ ఊక దంపుడు ప్రసారాలు చేస్తున్నాయి.

బెంగళూరు వరదలకి సంబంధించి అసలు నిజాలు ఇలా ఉన్నాయి !

1. ప్రస్తుతం తూర్పు బెంగళూరు ప్రాంతంలో వరద నీరు వల్ల ముంపుకి గురయిన ప్రదేశాలు ఎక్కువగా ఉన్నాయి. మరతనహళ్లి నుండి HSR లేఅవుట్ వరకు వరద ముంపు ప్రాంతాలు ఉన్నాయి. ఈస్ట్రన్ బెంగళూరు అంటారు !

2. ఒకసారి బెంగళూరు నదీ పరీవాహక ప్రాంతాలని పరిశీలిస్తే రెండు నదీ పరీవాహక ప్రాంతాలుగా విభజించాల్సి ఉంటుంది. A] కావేరీ నదీ పరివాహక ప్రాంతం B] పెన్నార్ నదీ పరీవాహక ప్రాంతం.

3.మూడు డ్రైనేజీ చిన్న ప్రవాహాలు ఉన్నాయి.

A]వృషభావతి [Vrishabhavati]

B]హెబ్బాల్ [Hebbal ]

C]కోరమంగళ-చల్లఘట్ట[KC valley]

4. బెంగళూరులో 1/4 వంతు అంటే పశ్చిమ, దక్షిణ పశ్చిమ, ఉత్తర పశ్చిమ (western, south west, north west) ప్రాంతాలు వృషభావతి ప్రాంతం కిందకి వస్తాయి. ఈ ప్రాంతంలో కురిసే వర్షపు నీరు ముందు చిన్న చిన్న చెరువులలోకి వెళ్ళి, అవి నిండిన తరువాత ఆ నీళ్ళు వృషభావతి నదిలోకి వెళతాయి. వృషభావతి నది ఆర్కావతి [Arkavathy] నదికి ఉపనది. ఆర్కావతి నది వెళ్ళి మెకేదాతు [Mekedatu] దగ్గర కావేరీ నదిలో కలుస్తుంది.

5. ఇక తూర్పు బెంగళూరులోని మిగతా ప్రాంతం మొత్తం [Hebbal and KC valley] లో కురిసిన వర్షపు నీరు పెన్నార్ నదిలో కలుస్తాయి. పెన్నార్ తమిళనాడులోకి ప్రవహిస్తుంది.

6. బెంగళూరు ఈస్ట్ లో చాలా చెరువులు ఉన్నాయి. ఈ ప్రాంతంలో కురిసే వర్షపు నీరు మొత్తం కూడా చెరువులలోకి వెళ్తుంది. అవి నిండగానే వరద నీరు పినాకిని,దక్షిణ పెన్నార్ [Pinakini/South Pennar] నదులలోకి వెళ్లిపోతాయి.

7. వర్షపు నీరు చెరువులలోకి వెళ్ళడానికి దారి తీసే చిన్న చిన్న ఛానెల్స్ దాదాపుగా చెత్త, ప్లాస్టిక్ వ్యర్ధాలతో నిండి పోయి ప్రవాహ వేగం తగ్గిపోయింది. కొన్ని చోట్ల వర్షపు నీరు ప్రవహించే ఛానెల్స్ ని ఆక్రమించి ఇళ్ళు, అపార్ట్మెంట్స్ కట్టేశారు. దాంతో చెరువులలోకి నీళ్ళు వెళ్ళే దారిలేక అవి ఎదురుతన్ని, తిరిగి రోడ్ల మీదకి, కాలనీలలోకి ప్రవహించాయి.

8. వర్షపు నీరు ప్రవహించే పిల్ల కాలువలు వెడల్పు కుచించుకుపోయాయి. దాంతో బెల్లాన్దూర్ మరియు వర్టూర్ చెరువులు [Bellandur lake and Varthur lake] లోకి నీళ్ళు వెళ్లలేకపోయాయి.

9. ఔటర్ రింగ్ రోడ్ [ORR] అంటే మరతహల్లీ మరియు బెల్లాన్దూర్ [Marathahalli and Bellandur] ల మధ్య ఉన్న స్ట్రెచ్ లో IT హబ్, ఈ ప్రాంతంలో రోడ్లు, IT పార్క్ లు, రెసిడెన్షియల్ అపార్ట్మెంట్స్ కట్టారు కానీ ఈ ప్రాంతం అంతా వర్షపు నీరు ప్రవహించే ప్రాంతం ఒకప్పుడు… ఇప్పుడు మెట్రో కడుతున్నారు. మొత్తం ఈ ప్రాంతం అంతా వర్షపు నీరు వెళ్ళే ప్రాంతం, కానీ ఇప్పుడు ఇవి అడ్డంగా ఉండడంతో IT పార్క్ లోకి కూడా నీళ్ళు వచ్చేశాయి. మెట్రో పనుల వల్ల పెద్ద పెద్ద ఇసుక,రాళ్ళ గుట్టలు కూడా చుట్టూ పేరుకొని పోవడం మరో కారణం… మెట్రో పనులు చాలా మందకొడిగా జరుగుతున్నాయి.

10. ORR పరిధిలో మరతహల్లీ మరియు బెల్లాన్దూర్ [Marathahalli and Bellandur] ప్రాంతంలో వరద నీరు ప్రవహించే ప్రాంతాలని వదిలిపెట్టి మిగతా ప్రాంతాలలో కట్టుకోవడానికి అనుమతి ఇచ్చి ఉంటే బాగుండేది. కానీ మునిసిపల్ అధికారులతో పాటు, డెవలపర్స్, రాజకీయ నాయకులు ముడుపులు తీసుకొని అనుమతులు ఇచ్చేశారు.

11. ఇప్పుడు బెంగళూరు ఉత్తర, పశ్చిమ, దక్షిణ ప్రాంతాలలో వరద ఎందుకు లేదు ? కేవలం తూర్పు బెంగళూరులోనే ఎందుకు వరద ముంపు ఉన్నది ? ఇది ఎవరూ ఆడగరు, ఎవరూ చెప్పరు.

12. బెంగళూరు ఉత్తర, పశ్చిమ, దక్షిణ ప్రాంతాలలో అభివృద్ధి జరిగింది IT బూమ్ కి ముందు ! ఈ ప్రాంతాలలో జరిగిన అభివృద్ధి అప్పటి మైసూరు మహారాజు ఆధ్వర్యంలో విశ్వేశరయ్య [Sir M Visvesvaraya] ప్లానింగ్ తో జరిగింది.

13. జయనగర్ కట్టేనాటికి  విశ్వేశరయ్యకు GPS,హెలికాప్టర్లతో పాటు ఎలాంటి ఆధునిక పరికరాలు లేవు. కేవలం గ్రామ కరణాలు, వాళ్ళ దగ్గర ఉన్న భూమి వివరాలు మాత్రమే అందుబాటులో ఉన్నాయి అప్పట్లో… కేవలం ఇనుప గొలుసుల సహాయంతో సర్వే చేయించారు. జయనగర్ అతి పెద్ద మరియు అత్యుత్తమ ప్లానింగ్ మొత్తం దక్షిణ ఆసియాలో అది కట్టే నాటికి ! ఇప్పటికీ అత్యుత్తమ ప్లానింగ్ కలిగిన ప్రాంతం ఇది.

14. బెంగళూరు ఈస్ట్ లో ఉన్న కంటోన్మెంట్ ప్రాంతం బ్రిటీష్ వారి హయాంలో ప్లాన్ చేసి కట్టారు. అది ఇప్పటికీ మంచి ప్లానింగ్ కలిగిన ప్రాంతం కూడా.

15 . కంటోన్మెంట్ ప్రాంతం వదిలేస్తే మిగతా ప్రాంతం అంతా బెంగళూరు డెవలప్మెంట్ ఆధారిటీ [BDA] ప్లానింగ్ తో అభివృద్ధి చేయబడింది. అఫ్ కోర్స్ అప్పట్లో కూడా లంచాలు ఇవ్వడం ఉండేది, తీసుకోవడం కూడా ఉండేది కానీ అవి ప్లాట్లు కేటాయించినందుకు మాత్రమే ఇచ్చేవారు, తీసుకునేవారు. కానీ ఇప్పటిలా అనుమతి లేని ప్రాంతాలకి అనుమతులు ఇచ్చి భారీ మొత్తాలలో తీసుకోవడం లేదు… అనుమతులు ఇవ్వడానికి వీలు ఉన్న ప్రాంతాలలోనే అనుమతులు ఇచ్చారు తప్పితే ఎకో సిస్టమ్ ని దెబ్బతీసే విధంగా అనుమతులు ఇవ్వలేదు.

16. మరతహల్లీ నుండి సిల్క్ రోడ్ వరకు [ORR] ప్రాంతం మొత్తం 90 వ దశకంలో చిన్న చిన్న గ్రామాలు ఉండేవి అప్పట్లో. IT బూమ్ ప్రారంభం అయ్యాక విచ్చలవిడిగా అనుమతులు ఇవ్వడంతో వర్షపు నీరు ప్రవహించే ప్రాంతాలని కూడా రోడ్లు, భవనాలు కట్టడానికి కారణం అయ్యింది. అయితే అవినీతి అధికారులు, రాజకీయ నాయకులు చెప్తున్నది ఏమిటంటే కేవలం రెవెన్యూ మాపులలో మాత్రమే చెరువులు, కాలువలు ఉన్నాయి తప్పితే అనుమతులు ఇచ్చేనాటికి అవి ఎండిపోయి ఆనవాళ్ళు కూడా లేకుండా ఉన్నాయి అని… కానీ ఆ ప్రాంతంలో కట్టడాలకి అనుమతి ఇవ్వకూడనే కదా చట్టం చెపుతున్నది ?

17. మాన్యత టెక్ పార్క్ లోకి కూడా వరద నీరు వచ్చి చేరింది. చాలా టెక్ పార్క్ లు వరద నీరు పరీవాహక ప్రాంతాలలో కట్టారు. కానీ ఈ రోజు ఇలాంటి పరిస్థితి వస్తుంది అని అనుకోలేదు… కానీ దేని కోసమయితే అనుమతులు రద్దు చేశారో వాటిని అలానే వదిలేసి మిగతా ప్రాంతాలలో కట్టి ఉంటే ఇప్పుడున్న పరిస్థితి వచ్చి ఉండేది కాదు.

18. అయితే ఇప్పుడు మరో నిజం కూడా తెలుసుకోవాల్సి ఉన్నది. అది బెల్లందూర్ ప్రాంతంలో 24 గంటలలోనే 200 mm వర్షం కురిసింది. ఈ ప్రాంతంలో కాలువల ఆక్రమణలు జరగకపోయినా సరే వరద నీరు ముంచెత్తుతుంది. క్లౌడ్ బర్స్ట్ అంటే ఇదే ! ఇలాంటి సందర్భాలలో ఎవరూ ఏమీ చేయలేరు.

19. అనుమతులు లేకపోయినా సరే కట్టిన కట్టడాలు చాలా పెద్ద సంఖ్యలో ఉన్నాయి. అధికారులు, రాజకీయ నాయకులు కుమ్మక్కు అయి ఇళ్ళు, అపార్ట్మెంట్స్ కట్టుకోనిచ్చారు. వీళ్ళ భరోసా ఏమిటంటే ఎంతో కొంత డబ్బు కడితే రెగ్యులర్ చేస్తారు అని… కానీ ఇప్పుడు వీటిని తప్పనిసరిగా కూల్చేయాలనే డిమాండ్ పెరిగిపోతున్నది. కానీ వోట్లు పడవనే భయం పాలకులది.

20. జాతీయ మీడియాది పక్షపాత ధోరణి ! అటు చెన్నైలో వరదలు వచ్చినప్పుడు గానీ ఇప్పుడు బెంగళూరులో వరదలు వచ్చినప్పుడు కూడా అదేదో ప్రళయం వచ్చినట్లు పదే పదే కథనాలు ప్రసారం చేయడం దేనికి ? IT ఇండస్ట్రీని దెబ్బ తీయడానికా ? మరి ఢిల్లీ కాలుష్యంకి కారణం అవుతున్న పంజాబ్, హర్యానా రైతుల గడ్డి దహనాల ఎందుకు కథనాలు ప్రసారం చెయ్యవు ? ఢిల్లీలో యమునా నది కాలుష్యం మీద ఎందుకు కథనాలు ప్రసారం చెయ్యవు ? గత రెండు మూడు రోజులుగా పడుతున్న వర్షాలు ఒక్క బెంగళూరులోనే పడుతున్నాయా ? మొత్తం దక్షిణ కర్ణాటకలో భారీగా వర్షాలు కురుస్తున్నాయి. కావేరీ పరీవాహక ప్రాంతాలలోనే కాదు, దాని ఉప నదులు అయిన ఆర్కావతి, శింసా [Arkavati,Shimsa ] నదుల పరీవాహక ప్రాంతాలలో కూడా భారీ నుండి అతి భారీ వర్షాలు కురుస్తున్నాయి. మొన్నటి వరకు ఈ నదులు ఎండిపోయి ఉన్నాయి.

21. తమిళనాడులోని మెట్టూరు డామ్ లోకి భారీగా వరదనీరు వచ్చి చేరుతున్నది. ఇక రామ నగర, చెన్నపట్టణ, తుముకూరు, చిక్క బళ్లాపూర్ జిల్లాలలో కూడా భారీ వర్షాలు పడుతున్నాయి. బెంగళూరు కంటే ఈ ప్రాంతాలు చాలా తీవ్రంగా నష్టపోయాయి కానీ జాతీయ మీడియా ఇవేవీ చూపకుండా కేవలం IT పార్క్ లలోకి వచ్చి చేరిన వరదనీరుని పదే పదే చూపించడంలో మర్మం ఏమిటీ ?

మొదట అప్పటి కాంగ్రెస్ ముఖ్యమంత్రి SM కృష్ణ హయాంలో మొదలయిన IT బూమ్ లో అప్పటి కాంగ్రెస్ నాయకుల అవినీతి నేటి దుస్థితికి ప్రధాన కారణం. బెంగళూరు రియల్ ఎస్టేట్ నుండి వచ్చిన అవినీతి సొమ్ము నేరుగా ఢిల్లీ చేరుకునేది అప్పట్లో. ఒకసారి నిషేదిత ప్రాంతాలలో నిషేధం ఎత్తివేసి అవినీతికి గేట్లు ఎత్తిన తరువాత ఆపేదెవరు ? ఈరోజు DK శివకుమార్ ఛాలెంజ్ చేస్తుంటే కర్ణాటక బిజేపి నాయకులు ఈ విషయాలని ఎందుకు బయటపెట్టడం లేదు ?

చివరిగా ….

BBMP అధికారులు వర్షపు నీరు పోవడానికి గాను కొత్తగా తవ్విన కాలువలలో రాత్రి పూట ఇళ్లల్లోని చెత్తని, ప్లాస్టిక్ వ్యర్ధాలని పడేయడం సాధారణం అయిపోయింది. ఈ వ్యర్ధాలతో కొత్తగా తవ్విన పిల్ల కాలువలు మూసుకుపోయి వర్షపునీరు పోకుండా ఆపుతున్నది. దీనికి బాధ్యులు ఎవరు ? వరద నీరు ఇళ్లలోకి రాగానే ప్రభుత్వాన్ని ప్రశ్నించడం ఎంతవరకు సబబు ? ”తిలా పాపం తలా పిడికెడు ”…