ఆర్థికపతనం దిశలో బంగ్లాదేశ్… భారత్‌కు మళ్లీ తలనొప్పులు తప్పవ్…

బంగ్లాదేశ్ రెడీమేడ్ దుస్తుల ఎగుమతి విషయంలో మిగతా ఆసియా దేశాల కంటే ముందుంది అన్న సంగతి తెలిసిందే. అయితే కేవలం టెక్సటైల్ ఎగుమతి మీదనే పూర్తిగా ఆధారపడి బండి లాగించడం కష్టంగా మారింది బంగ్లాదేశ్ కి. ఈ విషయంలో ఆర్ధిక నిపుణులు హెచ్చరిస్తూనే ఉన్నారు. కేవలం ఒకే రంగం నుండి ఎగుమతులు చేస్తూ, మిగతా విషయాల మీద దృష్టి పెట్టకపోతే భవిష్యత్తులో ముప్పు తప్పదు అంటూ..! కానీ టెక్సటైల్ రంగం వృద్ధి రేటు బాగా ఉండడంతో ప్రభుత్వం ప్రోత్సాహాన్ని ఇస్తూ వచ్చింది ఇన్నాళ్ళు…

కోవిడ్ లాక్ డౌన్ సమయంలో కూడా బంగ్లాదేశ్ తన రెడీమేడ్ దుస్తుల తయారీ పని ఆపలేదు. కానీ ఆ ఆర్డర్లన్నీ కోవిడ్ లాక్ డౌన్ కంటే ముందు ఇచ్చిన ఆర్డర్లు… లాక్ డౌన్ సమయంలో బంగ్లాదేశ్ టెక్సటైల్ పరిశ్రమ నిలకడగా ఉంది. కానీ గత నాలుగు నెలలుగా రష్యా, ఉక్రెయిన్ యుద్ధo వలన ముడి చమురు ధర బాగా పెరిగిపోవడం ఒక ఎత్తయితే… వంట నూనె, గోధుమల ధరలు విపరీతంగా పెరిగిపోవడం అన్ని దేశాలతో పాటు బంగ్లాదేశ్ డాలర్ రిజర్వ్స్ మీద తీవ్ర ఒత్తిడి తెచ్చింది. యూరోప్, అమెరికాలలో తీవ్ర రూపం దాల్చిన ద్రవ్యోల్బణం వలన ప్రస్తుతం ఆర్డర్లు తగ్గుముఖం పట్టాయి బంగ్లాదేశ్ కి…

నిజానికి యూరోపు నుండి తక్కువ ధరకి కోట్ చేసి, సింహభాగం చైనాయే ఆర్డర్లు తీసుకుంటూ వచ్చింది… వాటిని బంగ్లాదేశ్ లో పనిచేయించుకొని తిరిగి చైనా వాటిని యూరోపుకి సప్లై చేస్తూ వచ్చింది… కానీ మారిన పరిస్థితులలో చైనా ఇదివరకటి లాగా బంగ్లాదేశ్ కి ఆర్డర్లు ఇవ్వకుండా చైనాలోనే దుస్తులు కుట్టించి ఎగుమతి చేస్తున్నది. ప్రస్తుతం బంగ్లాదేశ్ కి చైనా నుండి ఆర్డర్లు తగ్గడం కూడా డాలర్ రిజర్వ్ మీద ప్రభావం చూపించింది…

బంగ్లాదేశ్ ఆర్ధిక మంత్రి AHM ముస్తఫా కమల్ వారం క్రితం IMF మానేజింగ్ డైరెక్టర్ క్రిస్టిలీన జార్జియోవా కి బంగ్లాదేశ్ రుణం కోసం మెయిల్ చేసినట్లు పేరు చెప్పడానికి ఇష్టపడని ఆర్ధిక మంత్రిత్వ శాఖ అధికారి ఒకరు తెలిపారు. అయితే బంగ్లాదేశ్ సెంట్రల్ బాంక్ మాజీ గవర్నర్ అతుర్ రెహమాన్ మాట్లాడుతూ… బంగ్లాదేశ్ ప్రభుత్వం ఐఎంఎఫ్ నుండి అప్పు తీసుకోవడం ముందస్తు జాగ్రత్త చర్యగా చెప్పారు. శ్రీలంక లాగా చివరి నిముషం వరకు ఆగి అప్పుడు అప్పుకోసం ప్రయత్నించే కంటే మూడు నెలలు ముందుగానే మన సెంట్రల్ బాంక్ లో డాలర్ రిజర్వ్ ని ఉంచుకోవడం మంచి పరిణామం అంటూ వ్యాఖ్యానించాడు. ప్రస్తుతం బంగ్లాదేశ్ సెంట్రల్ బాంక్ దగ్గర రెండు నెలలకి సరిపడా దిగుమతులు చేసుకోవడానికి తగిన డాలర్ రిజర్వ్ ఉందని, కానీ ముందుముందు ఎగుమతులు తగ్గి దిగుమతులు పెరిగే అవకాశాలని కొట్టిపారవేయలేము కాబట్టి బంగ్లా ప్రభుత్వ చర్యని నేను సమర్ధిస్తున్నాను అన్నారు…

బంగ్లాదేశ్ కరెంట్ అకౌంట్ లోటు గత సంవత్సరం మే నెల నుండి ఈ సంవత్సరం జూన్ నెల వరకు $17. 2 బిలియన్ డాలర్లు… అదే 2020-21 ఆర్ధిక సంవత్సరంలో $2.7 బిలియన్ డాలర్ల లోటు ఉంది. అంటే దాదాపుగా 15 బిలియన్ డాలర్ల లోటు ఉంది. గత జూన్ నెల వరకు బంగ్లాదేశ్ దిగుమతుల శాతం 39% గా ఉండగా ఎగుమతుల శాతం 34% గా ఉంది. ఉన్నది 5% తేడానే అయినా ధరలు పెరగడం, బంగ్లా టాకా విలువ డాలర్ తో పోలిస్తే పడిపోవడం వలన తీవ్ర కరెంట్ అకౌంటు లోటు ఏర్పడ్డది. అదే సమయంలో విదేశాలలో ఉన్న బంగ్లా జాతీయులు తమ దేశానికి పంపిన డాలర్లు 1.84 బిలియన్ డాలర్లుగా ఉంది… గత సంవత్సరం కంటే 5% తగ్గింది…

ఇక అత్యవసర వస్తువులు తప్పితే మిగతావి ఏవీ కూడా దిగుమతి చేసుకోకుండా ఆంక్షలు విధించింది బంగ్లాదేశ్ సెంట్రల్ బాంక్. అంటే లగ్జరీ వస్తువులు ఏవీ కూడా దిగుమతి చేసుకోవడానికి సెంట్రల్ బాంక్ అనుమతి ఇవ్వదు. ఇక విదేశీ ప్రయాణాల మీద కూడా ఆంక్షలు విధించింది సెంట్రల్ బాంక్. ముందుగా సెంట్రల్ బాంక్ కి దరఖాస్తు పెట్టుకొని ఎందుకోసం విదేశీ ప్రయాణం చేయదలుచుకున్నారో వివరణ ఇస్తేనే కానీ సెంట్రల్ బాంక్ ప్రయాణానికి అవసరమైన డాలర్లు ఇస్తుంది. ఇక పెట్రోల్, డీజిల్ ల మీద వారానికి ఒక రోజు కోత పెట్టాలని నిర్ణయం తీసుకుంది బంగ్లా ప్రభుత్వం. ఆదివారం రోజున పెట్రోల్ బంక్ లు మూసివేయాలని ఆదేశాలు ఇచ్చింది ప్రభుత్వం. వారానికి ఒక రోజు మంచి ఫలితాలని ఇవ్వకపోతే పెట్రోల్, డీజిల్ మీద రేషన్ విధిస్తారు అంటే రోజుకి ఇన్ని లీటర్ల పెట్రోల్ లేదా డీజిల్ అని అమ్ముతారు.

తీవ్రమవుతున్న విద్యుత్ కొరత!

బంగ్లాదేశ్ లో ఇప్పటికే రోజుకి 8 గంటల విద్యుత్ కోతని విధిస్తున్నారు. తాజాగా కొన్ని ప్రాంతాలలో రోజుకి 13 గంటల పాటు విద్యుత్ కోత విధించింది బంగ్లా ప్రభుత్వం. ముఖ్యంగా సిల్హేట్ [Sylhet] అనే ప్రాంతంలో రోజుకి 13 గంటల విద్యుత్ కోత విధిస్తున్నారు. అయితే బంగ్లాదేశ్ లో చాలా వరకు విద్యుత్ ఉత్పత్తి డీజేల్ ఆధారిత జెనెరేటర్స్ ద్వారా జరుగున్నది కాబట్టి డీజిల్ ధరలు పెరగడంతో దిగుమతుల మీద కోత పెట్టింది బంగ్లా ప్రభుత్వం… దాంతో లోడ్ షెడ్డింగ్ వలన 13 గంటల విద్యుత్ కోత తప్పనిసరి అయిపోయింది…

ఇండియాకు వలసల తలనొప్పి

బంగ్లాదేశ్ లో ఏం జరిగితే మనకెందుకు ? అనే వాళ్ళకి నా సమాధానం: అంతా బాగున్నప్పుడే బంగ్లాదేశ్ నుండి అక్రమ చొరబాట్లు యధేచ్చగా జరుగుతూ వచ్చాయి. మరి ఇప్పుడు ? మునపటి కంటే ఎక్కువ మొత్తంలో అక్రమ చొరబాట్లు పెరుగుతాయి. విద్యుత్ కోత వలన పని దొరకడం కష్టం అవుతుంది సహజంగానే… అలాగే దాని ప్రభావం అక్కడి ఆర్ధిక వ్యవస్థ మీద కూడా ఉంటుంది. ఇప్పటికే పెట్రోల్, డీజిల్ ల మీద కోత అమలవడం, మరో వైపు పరిశ్రమలు పూర్తి సామర్ధ్యంతో పనిచేయలేకపోవడంతో సహజంగానే అక్కడి ప్రజలకి భారత్ ఒక అవకాశంగా కనపడుతుంది.

ఇక మనిషికి 3,000 రూపాయలు ఇస్తే బంగ్లాదేశ్ నుండి భారత్ లోకి చెరవేస్తారు స్మగ్లర్లు. ఇక బిఎస్ఎఫ్ జవాన్ల కి దొరికితే మరో వెయ్యి రూపాయలు ఇవ్వాల్సి ఉంటుంది భారత్ లోకి వెళ్ళడానికి. ఇక పశ్చిమ బెంగాల్ ప్రభుత్వ రెవెన్యూ అధికారులకి అయితే మరో 3000 చెల్లించాలి. ఒక వేళ డబ్బులు లేకపోతే అక్రమంగా చొరబడిన వాళ్ళకి ఒక రహస్య నెంబర్ తో టోకెన్ ఇస్తారు. ఆ టోకెన్ చూపెట్టి ఎక్కడాయినా తక్కువ జీతానికి పని చూపిస్తారు. వాళ్ళ మూడు వేల రూపాయలు రికవరీ చేసుకొని వదిలేస్తారు. అలా వచ్చిన వాళ్ళకి తృణమూల్ కార్యకర్తలు స్థానిక గుర్తింపు కార్డులిస్తారు. అన్ని వివరాలు తృణమూల్ కార్యకర్తల దగ్గర ఉంటాయి. ఎన్నికలప్పుడు బూత్ వారీగా వీళ్ళ వోట్లు పడ్డాయా లేదా అని చెక్ చేస్తారు. ఇలా అక్రమ చొరబాట్లు ఇప్పుడు మరింత వేగంగా జరిగే అవకాశాలని కొట్టిపారవేయలేము…

ప్రస్తుతం మమత టార్గెట్ అక్రమ చొరబాటుదారుల శాతాన్ని ఇప్పుడున్న 30% ని మరో 5 శాతం పెంచి మొత్తం 35% గా ఉంచాలని! వీళ్ళ వోట్లు అన్నీ తృణమూల్ కే పడేట్లు కార్యకర్తలు చూసుకుంటారు. విచిత్రం ఏమిటంటే ఇప్పటికే బంగ్లాదేశ్ నుండి అక్రమంగా భారత్ లోకి వచ్చి స్థిరపడ్డ వారినే తాజాగా వచ్చే వాళ్ళ వివరాలు సేకరించి దగ్గర పెట్టుకునే బాధ్యత అప్పగించింది మమత…

శ్రీలంక నుండి భారత్ కి ఒక బోట్ లో చేర్చాలంటే ఒక్కో ప్రయాణీకుడి దగ్గర నుండి 3 లక్షలు వసూలు చేస్తున్నారు స్మగ్లర్లు దాంతో తాజా శ్రీలంక సంక్షోభం వలన 250 మంది కంటే ఎక్కువ శ్రీలంక తమిళులు తమిళనాడు తీరానికి రాలేక పోయారు. కానీ బంగ్లాదేశ్ పరిస్థితి అలా లేదు. అదృష్టం బాగుంటే 3 వేలతో చొరబడవచ్చు లేదా 10 వేలు ఖర్చు అవుతుంది. అసలు రూపాయి ఖర్చు లేకుండా మడ అడవుల ద్వారా వెస్ట్ బెంగాల్ లోకి చేరుకునే వారిలో యువకులు ఎక్కువగా ఉంటున్నారు.

ఎప్పుడో ఒకసారి జింబాబ్వే జట్టు భారత్ ని ఓడించడం సహజం! అంత మాత్రాన జింబాబ్వే క్రికెట్ జట్టుని భారత్ కంటే చాలా బాగుంది అని ఎవరన్నా పొగిడితే అంత కంటే పిచ్చితనం మరొకటి ఉండదు. అర్ధమయింది అనుకుంటా !