.
జరిగిన నష్టాలకు సహేతుక కారణాల్ని అన్వేషించి, దిద్దుకోలేనివాడు, ఆకాశానికి నిచ్చెనలేయాలని ప్రయత్నించి అడ్డంగా కూలిపోయేవాడిని విధి కూడా క్షమించదు… ఫాఫం, బీఆర్ఎస్ వారసుడు కేటీయార్ అదే బాటలో ఉన్నాడు… పాపం శమించుగాక…
పొద్దున్నే ఓ వార్త… సారాంశం ఏమిటయ్యా అంటే..? ‘‘కేటీయార్ ఎక్కడో మాట్లాడుతూ రాబోయే రోజుల్లో కేసీయార్ దేశ రాజకీయాల్లో కీలకం కానున్నాడు, తన నాయకత్వంలోనే బీజేపీ-కాంగ్రేసేతర పక్షాలన్నీ సంఘటితం కాబోతున్నాయి… రాహుల్ గాంధీ పనైపోయింది, బీజేపీకి ఇదే లాస్ట్ చాన్స్… కాబోయే సీఎం కేసీయారే…’’
Ads
నవ్వొచ్చింది… అఫ్‌కోర్స్, రాజకీయాల్లో ఎవరు ఎలా కీలకం అవుతారో ఎవరూ చెప్పలేరు… అంతా నంబర్ గేమ్… ఆఫ్టరాల్ గుజ్రాల్, దేవెగౌడ, చంద్రశేఖర్ ప్రధానులు కాలేదా ఈ దేశానికి..? కేసీయార్ కావొద్దని ఏముంది..? పైగా అడ్డగోలుగా సంపాదించిన డబ్బుతో ఓదశలో నాకు చాన్సివ్వండి, నేను బీజేపీతర పక్షాల మొత్తం ఎన్నికల ఖర్చు భరిస్తాను అని చెప్పినవాడే కదా…
అంతేనా..? ఇక చూసుకో నాసామిరంగా అంటూ కొన్ని రాష్ట్రాల్లో మాజీ సీఎంలు గట్రా గాలి నేతలను పోగేసి, ఇక ప్రధాని కుర్చే తరువాయి అన్నంత ఫోజు పెట్టి… తన పార్టీ పేరులోని తెలంగాణ ఆత్మను బొందపెట్టేసి… ఇటు రాష్ట్రానికీ గాకుండా, అటు కేంద్రానికీ గాకుండా… ఏ పార్టీ నమ్మకుండా, ఏ జనమూ నమ్మకుండా… చివరకు ఫామ్‌హౌజులో మొహం చెల్లక బందీగా గడుపుతున్నది కేసీయార్ కాదా..?
గతం ఇంత చేదుగా ఉంటే… మరెందుకు మళ్లీ జాతీయ రాజకీయాల్లో కేసీయార్ కీలకం కానున్నాడంటూ ఆకాశానికి నిచ్చెనలు ఎందుకు వేస్తున్నట్టు..? బీఆర్ఎస్‌ను బీజేపీలో విలీనం చేసే దిశలో బేరమాడే శక్తిని పెంచుకోవడానికేనా..? అసలు తను బయటికే రావడం లేదు…
తను నిజానికి జనజీవనంలోనే లేడు… లేస్తే మనిషిని కాను అనే తరహా పోకడేనా..? ఇంకా ఇంకా కేంద్రంలో చక్రాలు తిప్పుతాను అనే భ్రమల్లో కేసీయార్ ఉన్నాడా..? కేసీయార్ ఉన్నాడని కేటీయార్ అంటున్నాడా..? అంతా అగమ్యగోచరం… కేసీయార్ భాషలోనే చెప్పాలంటే బభ్రాజమానం భజగోవిందం…
అసలు ఒక్క రోజైనా టీఆర్ఎస్‌ను బీఆర్ఎస్‌గా మార్చుకున్న ఫలితాల సమీక్ష జరిగిందా పార్టీలో..? తెలంగాణలో మట్టిగొట్టుకుపోయిన కారణాల విశ్లేషణ జరిగిందా..? కనీసం కోటరీలోనైనా..! సరే, కేసీయార్ ఎవరు చెప్పినా వినడు, అంతా ఏకచ్ఛత్రాధిపత్యమే, వోకే… కానీ నాలుగు బలమైన తాకులు తగిలినప్పుడైనా డయాగ్నయిజ్ చేసుకోవాలి కదా…
సరే, ఆశలుండటంలో తప్పేమీ లేదు… కేసీయార్ ప్రధాని కావొద్దనీ అనడం లేదు… కానీ మోదీ మీద వ్యతిరేకత, సీజేపీ ఆందోళనలు, జాతీయ స్థాయిలో అస్థిరత కనిపిస్తున్న నేపథ్యంలో తన ధోరణి ఏమిటో, తన అభిప్రాయం ఏమిటో ఒక్క ముక్క చెప్పలేని దురవస్థలో ఎందుకున్నాడు మరి కేసీయార్..?
పోనీ, కనీసం తెలంగాణ ప్రజాసమస్యలపైనైనా వీసమెత్తు స్పందన ఎందుకు లేదు..? గెలిస్తే, అధికారంలో ఉంటేనే ప్రజాజీవితం, ఓడితే ఎవడి ఖర్మ వాడిది అని వదిలేయడమేనా తన రాజకీయ తత్వం..? పోనీ, ప్రస్తుతం బీజేపీ- కాంగ్రెస్ కూటములను కాదని ఓ నేషనల్ ఫ్రంటో, టెంటో మళ్లీ ప్రయోగం చేసే స్థితి ఉందా..?
లేదు… ఇండి కూటమి కకావికలు అవుతోంది… యాంటీ బీజేపీ సంఘటనే కష్టతరమవుతోంది… మరిక మూడో ఫ్రంటుకు తావేది..? అన్నింటికీ మించి కేసీయార్‌ను నమ్మే రాజకీయ పార్టీ ఏముంది దేశంలో..? మరి కేటీయార్ ఎందుకు ఈ ‘‘మళ్లీ జాతీయ రాజకీయాల్లో కేసీయార్ కీలకం’’ అనే విచిత్ర వ్యాఖ్యానాలకు దిగుతున్నాడు..?! దీని మర్మమేమిటి అమిత్ షా..?!
చెల్లియొ చెల్లకో, తమకు చేసిన యెగ్గులు సైచిరందరున్… తొల్లి, గతించె… ఈ పాపులర్ పద్యం గుర్తుంది కదా…. సేమ్, చెల్లియొ చెల్లకో, కేసీయార్ తమకు చేసిన యెగ్గులు సైచిరి తెలంగాణజనం… తొల్లి, గతించె…!!
Share this Article