ట్విట్టర్ పిట్టను ఏం చేయబోతున్నాడు ఎలాన్ మస్క్..? ఓ నిశిత విశ్లేషణ..!

చివరికి అధికారికంగా ట్విట్టర్ స్వాధీన ప్రక్రియ మొదలు పెట్టాడు కానీ అది పూర్తికాకుండానే ఉద్యోగులకి షాక్ ఇచ్చాడు మస్క్ ! ట్విట్టర్ CEO అయిన పరాగ్ అగర్వాల్ తో పాటు లీగల్ హెడ్ అయిన గద్దె విజయని అవమానకరంగా తొలగించాడు ట్విట్టర్ నుండి. ముందు నుండి ట్విట్టర్ ని కనుక ఎలాన్ మస్క్ తీసుకుంటే కొన్ని మార్పులు ఉంటాయి అని అందరూ ఊహించారు, కానీ ఏకంగా దానిని నడిపే పరాగ్ అగర్వాల్ తో పాటు విజయ గద్దె ని తొలగించడం ఆశ్చర్యం కలిగించింది !

ఎలాన్ మస్క్ ఎందుకు ఇలాంటి చర్యకి పాల్పడ్డాడు ?

Well ! ఫ్రీడం ఆఫ్ స్పీచ్ ! వాక్ స్వాతంత్ర్యం ! ఎవరయినా తమ భావాలని స్వేచ్ఛగా ప్రకటించుకోవాలి అని భావిస్తారు ! కానీ ట్విట్టర్ యాజమాన్యం వివాదాస్పదం అంటూ మెసేజ్ లని సెన్సార్ చేయడం, అలాంటి మెసేజ్ లని పోస్ట్ చేసిన వ్యక్తులని శాశ్వతంగా బ్లాక్ చేయడం లేదా ఆ మెసేజ్ లని తొలగించడం చేస్తూ వచ్చింది. ఇది ఎలాన్ మస్క్ కి నచ్చలేదు. స్వేచ్ఛగా అభిప్రాయాలని వెల్లడించే హక్కు అందరికీ కల్పించాలి అని భావిస్తాడు.

ఏకంగా ట్విట్టర్ నుండి టాప్ మోస్ట్ ఉద్యోగులని అందులోనూ భారతీయులని తొలగించడం మీద చర్చ జరుగుతున్నది ! బ్రాహ్మణ వ్యతిరేకులతో చేతులు కలిపారని పరాగ్ అగర్వాల్, విజయ గద్దెలని ఎలాన్ మస్క్ తొలగించాడు అని ఓ చర్చ ! అలాంటిది ఏదీ లేదు ! టెస్లా, స్పేస్ X లలో భారతీయులు చాలామందే కీలకమయిన పదవులలో పనిచేస్తున్నారు చాలా కాలం నుండి ! వాళ్ళని ఏక పక్షంగా తీసివేయలేదు మస్క్ !

పరాగ్ అగర్వాల్ మరియు విజయ గద్దె లు మొదటి నుండి వివాదాస్పదంగా వ్యవహరిస్తూ వచ్చారు. పైకి మేము యూనివర్సల్ గా ఒకే పాలసీని అమలు చేస్తున్నాము అంటూ ఒక్కో దేశానికి ఒక్కో పాలసీని అమలు చేస్తూ వచ్చారు ట్విట్టర్ టాప్ ఆఫీషియల్స్. ట్విట్టర్ పాలసీ తమకి అనుకూలమయిన దేశాలలో ఒక రకంగా, తాము వ్యతిరేకించే దేశాలలో మరో రకంగా తమ పాలసీని అమలుచేస్తూ వచ్చింది. ఈ విషయంలో విజయ గద్దె ప్రధాన పాత్ర పోషించింది ఎందుకంటే లీగల్ హెడ్ తనే కనుక !

1. గత ఎన్నికల సమయంలో డొనాల్డ్ ట్రంప్ మద్దతు దారులు US కాపిటోల్ ని ఆక్రమించిన వేళ ట్రంప్ చేసిన ట్వీట్లని ట్విట్టర్ తొలగించింది. ఆపై డొనాల్డ్ ట్రంప్ అకౌంటుని శాశ్వతంగా తొలగించింది.

2. డొనాల్డ్ ట్రంప్ అకౌంటుని శాశ్వతంగా తొలగించమని అమెరికన్ ప్రభుత్వం నుండి ఎలాంటి అధికారిక సందేశం ట్విట్టర్ కి రాలేదు. ట్రంప్ అకౌంటుని శాశ్వతంగా తొలగించడం అనేది ట్విట్టర్ స్వంత నిర్ణయం !

3. ఎలాన్ మస్క్ అభిప్రాయం ఏమిటంటే… ఫ్రీడం ఆఫ్ స్పీచ్ అనే స్పిరిట్ ని ట్విట్టర్ అనుసరించలేదు. పైగా రాజకీయ మొగ్గు పరోక్షంగా డెమొక్రాట్ల వైపు చూపింది అని. ఎలాంటి అధికారిక ఆదేశాలు లేకుండా ట్రంప్ అకౌంటుని శాశ్వతంగా తొలగించడం అనేది రాజకీయ జోక్యంగా పరిగణించాడు మస్క్ ! ఇక్కడ పొలిటికల్ న్యూట్రాలిటి ఎక్కడ ఉంది ? డెమొక్రాట్లని సమర్ధిస్తూ ట్రంప్ అకౌంటుని తొలగించడం మస్క్ కి ఇష్టం లేదు. ఏదన్నా నేరం జరిగింది అంటే అది ట్రంప్ తరువాత వచ్చే ప్రభుత్వం అధికారికంగా చర్య తీసుకుంటుంది చట్ట బద్ధంగా, కానీ ఇందులో ట్విట్టర్ ఎందుకు జోక్యం చేసుకుంది ? ఇదీ మస్క్ అంతరంగం !

4. మరో ఉదాహరణ : భారత్ లో ఎలాంటి అధికారిక ఆర్బిట్రేటర్ ని నియమించకపోవడం ! అన్ని దేశాలకంటే ట్విట్టర్ లో భారతీయుల అక్కౌంట్లు ఎక్కువ. అలాంటి భారత్ లో స్థానికంగా ఏదన్నా వివాదం వస్తే దానిని పరిష్కరించడానికి మరియు భారత ప్రభుత్వ ఆదేశాలని స్వీకరించి, వాటిని హెడ్ క్వార్టర్స్ కి సమాచారం ఇచ్చే వ్యవస్థని నెలకొల్పలేదు ట్విట్టర్. నెల రోజుల పాటు హై డ్రామా నడిపి చివరకి ఆర్బిట్రేటర్ ని నియమించింది ట్విట్టర్ … అదీ పలు సార్లు భారత అధికారులు హెచ్చరికలు చేసిన తరువాత. ఆఫ్ కోర్స్ ఈ బాధ్యత ట్విట్టర్ లీగల్ హెడ్ అయిన విజయ గద్దె ది.

ఎలాన్ మస్క్ పరాగ్ అగర్వాల్ తో పాటు ట్విట్టర్ లీగల్ హెడ్ అయిన విజయ గద్దె లని ఏక పక్షంగా తొలగించడం వెనుక భారత వ్యతిరేకత లేదు. ఎలాన్ మస్క్ చాలా కాలంగా ట్విట్టర్ లో జరుగుతున్న పరిణామాలని పరిశీలిస్తూ ఉండి ఉండవచ్చు ! తనకి ఇష్టం లేని విధానాలని అమలు చేస్తున్న వ్యక్తులని ఆ సంస్థ నుండి తొలగించే హక్కు ఎలాన్ మస్క్ కి ఉన్నది. కాకపోతే పూర్తిగా స్వాధీన ప్రక్రియ పూర్తి కాకుండానే ఎలాంటి అడ్వాన్స్ నోటీస్ ఇవ్వకుండా మరియు బోర్డ్ మీటింగ్ పెట్టకుండా ఆఫీసు ప్రాంగణంలో సహఉద్యోగుల అందరి ముందు అవమానకరంగా తొలగించిన తీరు మాత్రమే అభ్యంతరం అనిపించింది కానీ ఈ చర్య వెనుక ఎప్పటి నుండో మస్క్ లో ఉన్న కసిని వెల్లడించింది!

44 బిలియన్ డాలర్లని పెట్టుబడిగా పెట్టి ట్విట్టర్ ని కొన్నాడు ఎలాన్ మస్క్. దీనికోసం తన టెస్లా స్టాక్స్ కొన్నిటిని అమ్మేశాడు. 12.5 బిలియన్ డాలర్లని మోర్గాన్ స్టాన్లీ మరియు బాంక్ ఆఫ్ అమెరికాల నుండి అప్పు తీసుకున్నాడు ! అయితే ఇంత పెట్టుబడి పెట్టి ముగ్గురు టాప్ మోస్ట్ ఆఫీషియల్స్ ని ట్విట్టర్ నుండి తొలగించడానికా? 44 బిలియన్లు ట్విట్టర్ ని కొనడానికి వెచ్చించాడు మస్క్ ! కానీ అర్ధాంతరంగా ముగ్గురు టాప్ మోస్ట్ అధికారులని తొలగించాలి అంటే వాళ్ళకి నష్ట పరిహారం ఇవ్వాల్సిందే కదా ?

పరాగ్ అగర్వాల్ : 2011 లో ట్విట్టర్ లో సాఫ్ట్ వేర్ ఇంజినీర్ గా జాయిన్ అయ్యి 2017 లో ట్విట్టర్ కి చీఫ్ టెక్నికల్ ఆఫీసర్ గా ప్రమోట్ అయ్యాడు. గత సంవత్సరం నుండి చీఫ్ ఎగ్జిక్యూటివ్ ఆఫీసర్ గా విధులు నిర్వర్తిస్తున్నాడు మాజీ CEO జాక్ డోర్సే రాజీనామా చేసిన తరువాత … ఒక దశాబ్దం పాటు ట్విట్టర్ లో విధులు నిర్వహిస్తున్నందుకు గాను ఇప్పుడు ఎలాన్ మస్క్ పరాగ్ అగర్వాల్ కి చెల్లిస్తున్న మొత్తం 50 మిలియన్ డాలర్లు.

6 అంకెల జీతం తీసుకుంటూ వస్తున్న పరాగ్ అగర్వాల్ కి పోయేది CEO జాబ్ మాత్రమే. మరో సంస్థలో మంచి ఉద్యోగం ఖచ్చితంగా దొరికి తీరుతుంది. కాకపోతే ఎప్పుడు ఎలాంటి పరిణామాలు చోటుచేసుకొని తనని ఎలా ఇబ్బంది పెడుతుందో అనే పాఠాన్ని నేర్చుకునే ఉంటాడు ఈ పాటికి! ఇక నుండి ఎలాంటి రాజకీయ ప్రమేయం లేకుండా 38 ఏళ్ల టెక్ తన కొత్త ఉద్యోగాన్ని నిర్వర్తిస్తాడు అని భావిద్దాం !

విజయ గద్దె : విజయవాడలో పుట్టి తన 3 వ ఏటనే తల్లి తండ్రులతో పాటు అమెరికా వెళ్ళి అక్కడే స్థిరపడ్డ తెలుగు మహిళ. ఇండస్ట్రియల్ & లేబర్ రిలేషన్స్ సబ్జెక్ట్ మీద కోర్నెల్ యూనివర్సిటీ నుండి పట్టా పుచ్చుకుంది. ఆనక న్యూయార్క్ యూనివర్సిటీ నుండి లా పట్టా పుచ్చుకుంది. 2011 ట్విట్టర్ లో లీగల్,పాలసీ మరియు ట్రస్ట్ & సేఫ్టీ విభాగానికి హెడ్ గా చేరినప్పటినుండి ట్విట్టర్ ని కార్పొరేట్ ప్రపంచంలో ఒక దిగ్గజ సంస్థగా తీర్చిదిద్దింది అనడంలో సందేహం లేదు.

కానీ తన ఉద్యోగ ధర్మాన్ని వదిలి రాజకీయ ప్రమేయంతో కూడిన నిర్ణయం తీసుకొని వివాదాస్పదం అయ్యింది విజయ గద్దె! డొనాల్డ్ ట్రంప్ ట్విట్టర్ అకౌంటు ని తొలగించడం లో విజయ గద్దె ప్రముఖ పాత్ర వహించింది ! ఇప్పుడు ఎలాన్ మస్క్ ఆగ్రహానికి బలయ్యింది! ఇప్పుడు ఎలాన్ మస్క్ విజయ గద్దె ని తొలగిస్తూ అందుకు ప్రతిఫలంగా 15 మిలియన్ డాలర్లు ఇస్తున్నాడు. విజయ గద్దె కి ఉద్యోగం పోయింది అవమానకరంగా కానీ ఏదో ఒక సంస్థ తనకి జాబ్ ఇవ్వకపోదు, కాకపోతే ట్విట్టర్ లాంటి సంస్థ నుండి మళ్ళీ ఆఫర్ రాకపోవచ్చు !

ప్రపంచంలో అత్యంత ధనవంతుడు అయిన ఎలాన్ మస్క్ ట్విట్టర్ ని కొని ఏం సాధిస్తాడు అనేదే పెద్ద ప్రశ్న ! టెస్లా,స్పేస్ X లాంటి ఉన్నతమయిన సంస్థలని నెలకొల్పి వాటిని విజయవంతంగా నడిపిస్తున్న ఎలాన్ మస్క్ లాంటి వాడు కేవలం టెక్స్ట్ మెసేజెస్ ని ఇచ్చే ఒక సోషల్ మీడియా ప్లాట్ ఫారంని ఎందుకు ఎంచుకున్నాడు? ఎలాన్ మస్క్ రాజకీయ రంగ ప్రవేశం చేయాలనుకుంటున్నాడా ? కొన్ని విషయాలని తరచి చూస్తే అవును అనే సమాధానం వస్తుంది.

1. ముందు ట్విట్టర్ లో ఉన్న నకిలీ అకౌంట్లని తీసివేయాలని గట్టిగా భావిస్తున్నాడు. ముఖ్యంగా bot అక్కౌంట్స్ వల్ల చాలా నష్టం కాబట్టి వాటిని ఏరివేసి కేవలం అధీకృత అక్కౌంట్లనే ట్విట్టర్ లో ఉంచాలని భావిస్తున్నాడు.

2. ఎలాంటి అకౌంటు అయినా సరే శాశ్వతంగా తొలగించాలి అనే నిబంధనని తీసేస్తాడు అని భావిస్తున్నారు నిపుణులు. దీని వల్ల అసమ్మతి గళం వినిపించే ప్రతిపక్ష రాజకీయ నాయకులకి లాభం కలుగుచేస్తుంది అనడంలో సందేహం లేదు.

3. మరీ ముఖ్యంగా డొనాల్డ్ ట్రంప్ అకౌంటుని మళ్ళీ లైవ్ లో కి తీసుకొచ్చి ట్రంప్ ని ట్విట్టర్ లోకి ఆహ్వానిస్తాడు అనే ప్రచారం జరుగుతున్నది. అందుకే ట్రంప్ కి వ్యతిరేకంగా పనిచేసిన పరాగ్ అగర్వాల్, విజయ గద్దె లని సాగనంపాడు అంటున్నారు. కానీ ట్విట్టర్ తన ఖాతాని పునరుద్ధరించినా నేను తిరిగి ట్విట్టర్ లో కి రాను అని భీష్మ ప్రతిజ్ఞ చేసిన ట్రంప్ తిరిగి వస్తాడా ? వేచి చూడాల్సిందే !

4. నకిలీ అకౌంట్లను నిరోధించడానికి ట్విట్టర్ అకౌంటుకి నెలకి లేదా సంవత్సరానికి ఫీజు నిర్ణయిస్తాడు అనే వాదన బలంగా వినిపిస్తున్నది కానీ ఇది వర్క్ అవుట్ కాదు. ఇప్పటికే ఎలాన్ మస్క్ ట్విట్టర్ ని స్వాధీనం చేసుకోగానే ప్రకటనలు ఇచ్చే సంస్థలు వెనక్కి తగ్గాయి అంటున్నారు.

5. ట్విట్టర్ పాలసీకి చాలా మార్పులు చేర్పులు చేయబోతున్నాడు ఎలాన్ మస్క్. ఏదన్నా వివాదాస్పద ట్వీట్ ఎవరన్నా చేస్తే అది ట్విట్టర్ కి సంబంధం లేకుండా బయట కోర్టులో తేల్చుకునే విధంగా తన పాలసీని మార్చబోతున్నాడు. దీనివల్ల ఎవరయినా సరే స్వేచ్ఛగా ట్వీట్ చేయవచ్చు. ఇది కూడా ట్రంప్ కోసం చేస్తున్నట్లుగా అనుమానిస్తున్నారు. మరి కొద్ది వారాలలో ట్విట్టర్ లో ఎలాంటి మార్పులు జరగబోతున్నాయో తెలిసిపోతుంది ! అప్పటి వరకు ఎలాన్ మస్క్ కి శుభాకాంక్షలు !