అమరావతిని మరో కోకాపేట చేస్తారట వామనబాబు గారు..!!

.

Yugandhar Reddy…..  చొక్కా ఎందుకు కుట్టలేదంటే… నువ్విచ్చిన గుడ్డ సరిపోలేదన్నాడట… మరో 16,666 ఎకరాల సమీకరణకు మంత్రి వర్గ ఆమోదం వార్త చదివాక గుర్తొచ్చిన ఉదాహరణ అలాగే ఉంది.

ఈ ఆటలు ఇంకెన్నాళ్ళు?
ఇది గతంలో వచ్చిన ఒక తెలుగు సినిమా టైటిల్. అయితే ఇప్పుడిది ఆంధ్ర ప్రదేశ్ రాష్ట్ర రాజధాని నిర్మాణానికి సుమారు దశాబ్దం కిందట వేలాది ఎకరాల భూములిచ్చిన రైతులకు నిన్న రాష్ట్ర ముఖ్యమంత్రి, చంద్రబాబు నాయుడుతో సమస్యలు చెప్పుకోవడానికి ఏర్పాటు చేసిన సమావేశంలో ఎదురైన ప్రశ్నగా మిగిలింది…

చివరికి మొదటి విడత రైతులు పూర్తిగా ఆమోదం తెలపకుండానే మరో 16,666 ఎకరాల భూమిని రెండో విడత రైతుల నుంచి సమీకరించేందుకు శుక్రవారం నాటి మంత్రివర్గం సమావేశం ఆమోదం తెలిపింది.
సాధారణంగా ప్రాజెక్టుల నిర్మాణానికి రైతులు నుండి ప్రభుత్వ నిబంధనల మేరకు ధర చెల్లింపు పద్థతిపై చేపట్టే భూసేకరణకు బదులుగా ఇది పూలింగ్ పద్దతి… సేకరణ అనకుండా సమీకరణ అంటున్నారు..,

రాజధాని నిర్మాణానికి లక్షల ఖరీదు చేసే తమ పంట భూములను ఎకరాల కింద ఇచ్చి, బదులుగా ప్రభుత్వం అభివృద్ధి చేసి ఇచ్చే కోట్ల విలువైన వాణిజ్య స్థలాలు గజాల మొత్తంలో పొందే, ’రైతుల సంపద సృష్టి’లో భాగంగా ఈ భూసమీకరణ విధానంలో నాడు తీసుకున్న 33 వేల ఎకరాల భూములకు అదనంగా తిరిగి అంతే మొత్తం, కాకుంటే మరి కొంత ఎక్కువ కూడా కావాల్సి ఉంటుందని ముఖ్యమంత్రి చెప్పాక విన్న రైతులకు ఎదురైన ప్రశ్న ఇదే…

పది, పదిెకొండేళ్ల కిందట తాము అప్పగించిన భూములకు బదులుగా అభివృద్ధి చేసి ఇస్తామన్న వాణిజ్యస్థలాల విషయంలో ఎదురవుతున్న సమస్యలు అధికారులు, మంత్రులు పరిష్కరించే స్థితి లేకపోవడంతో, వాటిని స్వయంగా ముఖ్యమంత్రికి చెప్పుకుందామని వెళ్లిన రైతులకు, సమస్యల పరిష్కారం మాట అటుంచి, అదనపు భూములిస్తేనే మహానగర నిర్మాణమని,లేకపోతే మున్సిపాలిటీకి మించదని చెప్పడంతో రైతుల గొంతులో పచ్చి వెలక్కాయ ఇరుక్కున్నట్టే అనిపించింది…

ఇచ్చిన 33 వేల ఎకరాల్లో గతంలో కేవలం తాత్కాలిక అసెంబ్లీ, సచివాలయం ఆపై హైకోర్టుతో పాటు, ఇటీవల ప్రారంభించిన ‘ఏడంతస్థుల మేడ’, రాష్ట్ర రాజధాని ప్రాధికార సంస్థ భవనం మాత్రమే నిర్మించిన వేలాది ఎకరాలలో అంతా ఖాళీ, అన్నీ ఖాళీ అన్నట్టుంటే, ’బృహత్ నగరాని’కి చోటేలేదంటూ, అదనపు భూమి కోసం అడుగుతున్న తీరు చూసిన రైతులకు అభినవ ‘వామనావతారం’ గుర్తుకు వచ్చినట్టుందనడంలో సందేహం లేదు.

పైగా, తన సహజ ధోరణిలో , ‘తాను అభివృద్ధి చేసిన హైదరాబాద్లో ‘ నేడు ఎకరా ధర 170 కోట్లు పైచిలుకు పలికిందంటే అదీ తన దూరదృష్టి గొప్పతనమంటూ, మీ భూములు కూడా అలా ఆకాశాన్ని అంటాలంటే అనుకున్న అదనపు భూములు ఇస్తేనే సాధ్యమన్నాక…, అయ్యా, మరి ఈ దూరదృ ష్టి మొదట ప్రపంచం నివ్వెరపోయే రాజధాని కడతానంటూ మా దగ్గర భూములు తీసుకున్ననాడు ఎక్కడి కెళ్ళింది?

అప్పుడే 33 వేల ఎకరాల్లో మున్సిపాలిటీ మాత్రమే అనుంటే, మేము ముప్పై మూడా, లేక అరవై ఆరా అని ఆలోచించే వాళ్లం కదా? పదేళ్లు గడిచాక మళ్లీ అదనం అంటున్నారు, మరో పదేళ్లు పోయాక మళ్లీ ఇంతకింత అంటే మా పరిస్థితి ఏమిటి? అని అడగ్గలిగే ధైర్యం పాపం ఎవరి కుంటుంది?

ఎందుకంటే ముప్పై మూడు వేల ఎకరాలిచ్చి, సగం మునిగిన వాళ్లు అలాంటి ధైర్యం చెయ్యలేరు కదా? అదీ ఆయన ధైర్యం, అదే ఆయన ధైర్యం కూడా. ఇంకా కాదు కూడదు అంటే, చూపించడానికి ‘జగన్’ బూచి ఎలాను ఉంది.

పాపం రాజధాని నిర్మాణానికి భూములిచ్చిన రైతుల పరిస్థితి ఇప్పుడు ఎలా ఉందంటే,టైలర్ చెప్పాడని రెండు మీటర్ల చొక్కా గుడ్డ తీసుకెళ్లి, కుట్టుకొలతలు కూడా ఇచ్చి, తీరా నెలలు గడిచి నా చొక్కా ఎందుకు కుట్టలేదని అడిగితే, అనుకున్నట్టు కుట్టాలంటే మీరు తెచ్చిన గుడ్డ సరిపోదన్న చందంగా ఉంది. కత్తిరించిన గుడ్డ తీసుకెళ్లనూలేరు, అడిగిన గుడ్డ తిరిగి అదే దుకాణంలో ఇన్నాళ్ల తరువాత దొరుకుతుందో, లేదోననే భయం.

అందుకే రాజధాని నిర్మాణానికి భూములిచ్చిన రైతులు, ముఖ్యమంత్రి మాటలకు ఊ అంటారా? ఉలిక్కి పడతారా? అనే సందేహం చాలామందికి ఉంది. మొదట విడత తీసుకున్న భూముల్లో చేసిన అభివృద్ధి చూపించి రెండో విడత తీసుకుందామంటే జరిగిన అభివృద్ధి కనపడటం లేదు….