ఖర్మ… లైంగిక దాడులు చేసేవాళ్లూ హీరోలే మన దరిద్రానికి..!!

సినిమాల్లో రేపులు విలన్లే కాదు ; హీరోలూ చేస్తారు . స్తీజన్మలో NTR , ఈ సినిమాలో ANR . ఒకరు తాగిన మైకంలో , మరొకరు ఆగ్రహావేశంలో . ఈ సినిమాల్లో ఆ రేపులే మలుపులు . ANR-వాణిశ్రీ జోడీ జైత్రయాత్రలో మరో సినిమా 1972 అక్టోబరులో వచ్చిన ఈ విచిత్రబంధం సినిమా . సిల్వర్ జూబిలీ ఆడిన మ్యూజికల్ హిట్ . యద్దనపూడి సులోచనారాణి నవల విజేత ఆధారంగా నిర్మించబడిన సినిమా .

అన్నపూర్ణ బేనర్లో ఆదుర్తి సుబ్బారావు దర్శకత్వంలో , కె వి మహదేవన్ సంగీత దర్శకత్వంలో వచ్చిన ఈ సినిమాలో వాణిశ్రీ నటన గురించి ప్రత్యేకంగా చెప్పుకోవలసిందే . ఆత్మాభిమానం , ఆత్మవిశ్వాసం , అతిశయం , పొగరు అన్నీ కలబోసిన పాత్రలు వేయటంలో సిధ్ధహస్తురాలు వాణిశ్రీ . నవలా నాయకి . ప్రేమనగర్ , సెక్రటరీ , ఈ సినిమా , జీవనతరంగాలు వంటి ఎన్నో నవలలకు ప్రాణం పోసింది .

ఈ సినిమా సూపర్ సక్సెస్ కు కారణం పాటలు . ఆత్రేయ విరచిత చీకటి వెలుగుల రంగేళి జీవితమే ఒక దీపావళి మన జీవితమే ఒక దీపావళి పాట సూపర్ హిట్ . అందమైన జీవితమూ అద్దాల సౌధము , చల్లని బాబు నా అల్లరి బాబు , వయసే ఒక పూలతోట వలపే ఒక పూలబాట , అమ్మా అమ్మా అనీ పిలిచావు , చిక్కావు చేతిలో చిలకమ్మా పాటలన్నీ వీర హిట్టయ్యాయి .

ఈ సినిమాలో మరో ప్రత్యేక ఆకర్షణ భాగ్యనగరం ఆవిర్భావ కధ . బుర్రకధ రూపంలో ఆత్రేయ విరచిత భాగమతి నాటకం . చాలా బాగా చిత్రీకరించారు . ANR , వాణిశ్రీ అందంగా కనిపిస్తారు . చాలామందికి భాగ్యనగరం వెనుక ఉన్న ప్రేమ కధ తెలియదు . ఈ సినిమాలోని ఈ బుర్రకధ కం నాటకం తెలుగు వారికి ఆ కధ తెలిపింది .

ANR , వాణిశ్రీ , SVR , గుమ్మడి , పద్మనాభం , రాజబాబు , అల్లు రామలింగయ్య , నాగయ్య , అంజలీదేవి , సంధ్యారాణి , లీలారాణి , సూరేకాంతం , మాస్టర్ ఆదినారాయణ ప్రభృతులు నటించారు . ఈ సినిమా వచ్చేటప్పటికి నేను M Com లో జాయినయ్యాను కూడా .

గుంటూరులో , నరసరావుపేటలో రెండు చోట్లా చూసా . టివిలో చాలాసార్లే . యూట్యూబులో ఉంది . చూసి ఉండనివారు ఎవరయినా ఉంటే తప్పక చూడండి . An entertaining , feel good , musical hit movie . #తెలుగుసినిమాలసింహావలోకనం #తెలుగుసినిమాలు …… (డోగిపర్తి సుబ్రహ్మణ్యం)