ఆకలయి అన్నమడిగితే పిచ్చోడన్నారు నాయాళ్ళు కడుపు మండి న్యాయమడిగితే ఎర్రోడన్నారు నాయాళ్ళు అనే పద్మనాభం పాత్ర పాడే పాట ఆరోజుల్లో గొప్ప సంచలనమయింది . ఆ పాట వలన పద్మనాభానికి కూడా మంచి పేరు వచ్చింది . సినిమాకు రన్ ని పెంచింది . విశేషం ఏమిటంటే ఈ పాటను నిర్మాత విశ్వేశ్వరరావు వ్రాసారట .
సి యస్ రావు దర్శకత్వంలో NTR మొదటి పూర్తి రంగుల సాంఘిక చిత్రం 1973 లో రిలీజయిన ఈ దేశోధ్ధారకులు సినిమా . సినిమా సూపర్ హిట్ . 12 కేంద్రాలలో వంద రోజులు ఆడింది . కడపలో 210 రోజులు ఆడింది . ఇలాంటి కధాంశంతో NTR చాలా సినిమాలే చేసారు . దేశద్రోహులు , కధానాయకుడు , వగైరా . అయితే ఈ సినిమా కలర్ సినిమా కావటం , వాణిశ్రీ , కె వి మహదేవన్ సంగీత దర్శకత్వంలో హిట్ సాంగ్స్ ఉండటం , మోదుకూరి జాన్సన్ – మహారధిల మాటల తూటాలు చిత్రం ఘన విజయానికి కారణాలయ్యాయి .
Ads
ఆత్రేయ విరచిత ఈ వీణకు శృతి లేదు ఎందరికో హృదయం లేదు అనే పాట చాలా శ్రావ్యంగా ఉంటుంది . నటి శుభ మీద చిత్రీకరించబడింది . ఇది కాదు మా సంస్కృతి ఇది కాదు మా ప్రగతి , మబ్బులు రెండూ భేటీ అయితే మెరుపే వస్తుంది , కోరుకున్న దొరగారు కొంగు పట్టుకున్నారు పాటలు చాలా శ్రావ్యంగా ఉంటాయి . స్వాగతం దొరా సుస్వాగతం తేనె లాంటి పిలుపువున్న తెలుగు నేలకు అన్నపూర్ణను మించిన ఆంధ్రభూమికి అనే వాణిశ్రీ గ్రూప్ డాన్స్ బాగుంటుంది .
పాపం సావిత్రి ! మహానటి !!! తెలుగు చలనచిత్ర రంగాన్ని శాసించిన సావిత్రి ఎలాంటి ప్రాధాన్యత లేని వదిన పాత్రలో , ఏవో కొన్ని సీనుల్లో కనపడే పాత్ర వేయటం బాధ కలుగుతుంది . అందరినీ నమ్మి మోసపోయి , నిస్పృహతో తన జీవితాన్నే తాను నాశనం చేసుకున్న అభాగ్యురాలు . కొందరి జీవితాలు అలాగే ముగుస్తుంటాయి .
నాగభూషణం , ప్రభాకరరెడ్డి , మిక్కిలినేని , ధూళిపాళ , నాగయ్య , రాజనాల , సత్యనారాయణ , రావు గోపాలరావు , రాజసులోచన , పద్మా ఖన్నా ప్రభృతులు నటించారు . By the way , ఈ సినిమాలో NTR సిబిఐ ఆఫీసర్ . ఎప్పటిలాగే ఈ సినిమాలో కూడా NTR కు మారు వేషాలు ఉంటాయి . లేకపోతే జనానికి ఎక్కదు .
కాలేజీ రోజుల్లో మా నరసరావుపేటలో ఓ నాలుగయిదు సార్లు చూసి ఉంటా . వెంకటేశ్వర పిక్చర్ పేలసులో ఆడినట్లు గుర్తు . టివిలో కూడా చాలాసార్లు వచ్చింది . An excellent entertaining , musical hit movie . ఈతరం వారిలో చూడని వారుంటే వాచ్ లిస్టులో వేసేసుకోవచ్చు . యూట్యూబులో ఉంది . #తెలుగుసినిమాలసింహావలోకనం #తెలుగుసినిమాలు…………. (డోగిపర్తి సుబ్రహ్మణ్యం)
Share this Article