.
‘సరస్వతి పుత్ర’… అది అమ్మ పేరా? అహంకారపు ట్యాగ్ లైనా? స్వీయ అలంకారమా..? అనంత శ్రీరామ్ సెటైర్ వెనుక అసలు కథ!
తెలుగు సినిమా టైటిల్ కార్డ్స్ మీద ఒకప్పుడు ‘కవిరత్న’, ‘కవి సామ్రాట్’ వంటి బిరుదులు కనిపించేవి… కానీ కాలక్రమేణా అవి తగ్గిపోయి కేవలం పేర్లు మాత్రమే మిగిలాయి… అయితే, ఇటీవల కాలంలో గేయ రచయిత రామజోగయ్య శాస్త్రి తన పేరు ముందు “సరస్వతి పుత్ర” అని తప్పనిసరిగా వేయించుకోవడం పరిశ్రమలో చర్చకు దారితీసింది… తాజాగా అనంత శ్రీరామ్ చేసిన వ్యాఖ్యలు ఈ చర్చకు మరింత ఆజ్యం పోశాయి…
Ads
శాతకర్ణి తెచ్చిన ట్రెండ్.. రామజోగయ్య పట్టిన పట్టు! … కొన్నేళ్ల క్రితం బాలకృష్ణ నటించిన ‘గౌతమిపుత్ర శాతకర్ణి’ సినిమా సమయంలో ఒక కొత్త ట్రెండ్ మొదలైంది… దర్శకుడు క్రిష్ తన పేరును ‘నివేదితా పుత్ర క్రిష్’ అని, సాయి మాధవ్ బుర్రా తన పేరును ‘సరస్వతీ పుత్ర సాయి మాధవ్’ అని వేసుకున్నారు… అది ఆ సినిమా నేపథ్యానికి, ప్రచారానికి సరిపోయింది… సినిమా అయిపోయాక అందరూ ఆ ట్రెండ్ను వదిలేశారు కానీ, రామజోగయ్య శాస్త్రి మాత్రం దాన్ని పట్టుకుని కూర్చున్నాడు…
నిజానికి రామజోగయ్య తల్లి పేరు ‘సరస్వతి’… సాంకేతికంగా ఆయన సరస్వతి పుత్రుడే… అయితే, ఇక్కడే ఒక సూక్ష్మమైన తేడా ఉంది… ‘సరస్వతి పుత్రుడు’ అనేది సాహితీ లోకంలో అత్యున్నత ప్రతిభ కనబరిచిన వారికి ఇచ్చే ఒక గౌరవప్రదమైన విశేషణం… ఆ సరస్వతీదేవి చల్లని చూపు ఉండి, అద్భుతమైన సాహిత్యాన్ని సృష్టించే వారినే అలా పిలుస్తారు… అద్వితీయ ప్రతిభ ప్రదర్శించేవారిని… కానీ, రామజోగయ్య తన తల్లి పేరును అడ్డం పెట్టుకుని, ఒక ‘బిరుదు’ లాగా దీన్ని సెల్ఫ్ ప్రమోషన్ కోసం వాడుకుంటున్నారనే విమర్శలు ఎప్పటి నుంచో ఉన్నాయి…
అనంత శ్రీరామ్ ‘విరుపు’ వెనుక అర్థం ఇదేనా? … తాజా ఇంటర్వ్యూలో అనంత శ్రీరామ్ ఇచ్చిన కౌంటర్ చాలా లోతైనది… “మీరు సరస్వతి పుత్రులు కదా?” అని యాంకర్ అడగ్గానే.. “లేదండీ, మా అమ్మగారి పేరు పావని. నేను పావని పుత్రుడిని” అని ఆయన టక్కున సమాధానమిచ్చాడు… (కల్కి సినిమాలో కర్ణుడి పాత్ర తీరూతెన్నూ మీద కూడా విమర్శలు చేసి కొన్నాళ్లుగా ట్రోలింగుకు గురవుతున్నా, తను అనుకున్నది చెప్పేస్తూనే ఉంటాడు…)
తన తాజా వ్యాఖ్య వెనుక అసలు సందేశం ఏంటంటే…
-
అమ్మ పేరు గొప్పదే, కానీ బిరుదు కాదు…: అమ్మ పేరు చెప్పుకోవడం సంస్కారమే, కానీ దాన్ని టైటిల్ కార్డ్స్ మీద ఒక హోదాగా ప్రదర్శించుకోవడం ప్రచార తాపత్రయమే అవుతుంది…
-
అర్హత ఎంత?: వేదాలు, పురాణాలు, ప్రబంధ సాహిత్యంపై పట్టున్న శ్రీశ్రీ, దేవులపల్లి వంటి వారికే దక్కని ‘సరస్వతి పుత్ర’ ట్యాగ్ను… కేవలం కమర్షియల్ సాంగ్స్ రాస్తూ తగిలించుకోవడం ఆ బిరుదును చిన్నచూపు చూడటమే అని అనంత శ్రీరామ్ భావన కావచ్చు…
బాధ్యతా? ప్రచారమా? సినిమా పాటల రచయితలుగా కోట్లాది మంది అభిమానాన్ని పొందుతున్నప్పుడు, ఇలాంటి భారీ బిరుదులు, స్వీయ ప్రమోషన్లు, ప్రచారాలు అవసరమా అనే ప్రశ్న తలెత్తుతోంది… అనంత శ్రీరామ్ అన్నట్లు.. ఆ బిరుదు మోయాలంటే దానికి తగ్గ సాహితీ పటిమ ఉండాలి… కేవలం తల్లి పేరును సాకుగా చూపి, ఒక ‘లెజెండరీ’ ఇమేజ్ కోసం ప్రయత్నించడం విజ్ఞుల దృష్టిలో సెటైర్లకు గురికాక తప్పదు…
రామజోగయ్య శాస్త్రి తన తల్లిపై ఉన్న ప్రేమను చాటుకుంటున్నారా? లేక ఆ పేరు వెనుక ఉన్న ‘దైవిక శక్తి’ని తన బ్రాండింగ్ కోసం వాడుకుంటున్నారా? అన్నది ఇప్పుడు చిత్రసీమలో హాట్ టాపిక్… అనంత శ్రీరామ్ మాటలతోనైనా ఈ ‘ట్యాగ్ లైన్’ గోల తగ్గుతుందో లేదో చూడాలి!
ఆ ఇద్దరు ఏమన్నారంటే?
అనంత శ్రీరామ్ వ్యంగ్యం..:
“యాంకర్…: సార్.. నమస్తే ‘సరస్వతి పుత్ర’ గారూ!
అనంత శ్రీరామ్…: అయ్యో, అంత లేదండీ.. మా అమ్మగారి పేరు ‘పావని’… నేను పావని పుత్రుడిని… ఆ బిరుదులు మోయడం సామాన్యమైన విషయం కాదు. వేదాలు, పురాణాలు తెలిసిన శ్రీశ్రీ, దేవులపల్లి వంటి వారికే అది సాధ్యం… సినిమాలో ఉంటూ ఆ బాధ్యతను మోయలేం…”
రామజోగయ్య శాస్త్రి (గతంలో ఒక ఇంటర్వ్యూలో)…: “నా పేరు ముందు ‘సరస్వతి పుత్ర’ అని వేయించుకోవడం వెనుక నా ఉద్దేశ్యం ఒక్కటే.. మా అమ్మగారి పేరు ‘సరస్వతి’. ఆమెపై ఉన్న ప్రేమతో, ఆ తల్లి ఆశీస్సులు నాపై ఉండాలని భావించే నేను అలా వేయించుకుంటున్నాను. ఇది నా వ్యక్తిగత ఇష్టం, అమ్మపై నాకున్న గౌరవం…”
అవునూ, సరస్వతి అనే తల్లి పేరున్నవాళ్లందరూ ‘‘సరస్వతి పుత్రులు’’ అయిపోతారా..? ఇదే ఈ వివాదం సారాంశం...
Share this Article