వాగ్దానం సినిమా… రచయిత ఆత్రేయ దర్శకుడు ఆత్రేయకు ద్రోహం…

మోదుకూరి జాన్సన్ : ఆత్రేయ గారూ …. నేనూ మీ పద్దతినే ఫాలో అవుతున్నానండీ … డబ్బిస్తేనే ఎవరికైనా ఏవైనా రాస్తున్నానండీ …

ఆత్రేయ : ఒరే అబ్బాయ్ … నేనా స్టేజ్ దాటి చాల్రోజులయ్యిందిరా … ఇప్పుడు డబ్బిచ్చినా రాయడం లేదు.

…….

రాసి ప్రేక్షకులనూ … రాయక నిర్మాతలనూ ఏడిపిస్తాడు ఆత్రేయ అని హరిపురుషోత్తమరావు అంటే … రాసేప్పుడు ఆత్రేయ ఎంత ఏడుస్తాడో ఎవడికి తెలుసని ఆత్రేయ గారి జవాబు.

……

ఓ నిర్మాత పాటలు రాయమని ఆత్రేయ గారికి హోటల్ చోళాలో రూమేశాట్ట. రోజులు గడుస్తున్నాయి… బిల్లు వాచిపోతోంది. గురూ గారు ఒక్క అక్షరం కూడా రాయలేదట. అయ్యా ఏమిటి పరిస్థితి అంటే … ఒరే … ఈ హోటలు పేరేమిటన్నావ్ చోళానా … అందుకే మన పెన్ను కదలడం లేదు అన్నారట ఆత్రేయ. అదేంటని తెల్లబోయాడు సదరు నిర్మాత

చోళులకీ పల్లవులకీ పడదు కదరా … అందుకే మనం పల్లవులు రాయలేకపోతున్నాం ఇక్కడ… ఏంట్రా ఇంత వరకు ఒక్క అక్షరం కూడా బయటకు రాలేదనుకుంటున్నా … ఇదా సంగతి అన్నారట ఆత్రేయ. ఆ నిర్మాత స్పృహ తప్పడం ఒక్కటే తరువాయి.

…………

సాక్షి సినిమాలో క్లైమాక్సులో వచ్చే చందమామా నిజం చూడకు పాటను ఆత్రేయతో రాయించుకోవాలనుకున్నారు బాపు రమణలు. వెళ్లి కలసి అయ్యా … ఇదిగో అడ్వాన్సు అని కొంత డబ్బు కూడా ముట్టచెప్పారు. ఆ పాట కోసం కొంత కాలం తిరిగారు. ఆత్రేయ గారు రేపు మాపు అంటూ వచ్చారు.

ఈ లోగా ఆ పాటను ఆరుద్రతో రాయించేసుకోవడం …సినిమా షూటింగు అయిపోవడం … రిలీజు అయిపోవడం కూడా జరిగిపోయాయి. ఓ రోజు అనుకోకుండా ఓ సినిమా కంపెనీ కార్యాలయంలో రమణ గారు ఆత్రేయ గారికి తారసపడ్డారట. ఏవయ్యా రవణా ఆ మధ్యేదో సినిమా తీస్తాననీ పాట రాయమనీ వచ్చావు. మళ్లీ కనిపించలేదే? అని నిలదీశారట ఆత్రేయ.

అయ్యా … ఆ పాట కోసం మీ చుట్టూ తిరగాల్సినంత తిరిగి వేరే వాళ్లతో పనికానిచ్చేశాంలెండి … సినిమా కూడా రిలీజైపోయిందన్నారట రమణగారు.

అయ్యో అలాగా … మరెలా? మీరు అడ్వాన్సు కూడా ఇచ్చారు… సరే, ఓ పనిచేద్దాం. తరువాత సినిమాకు రాసి చెల్లేద్దాంలే అన్నారట ఆత్రేయ అనునయింపుగా …

అక్కరలేదండీ … మీ పుణ్యాన మాకు ఆరుద్ర అలవాటయ్యారండీ … ఆయనతోనే రెండో సినిమా పాటలూ రాయించేసుకున్నామండీ అని విన్నవించుకున్నారట రమణగారు.

అలాగా …. అయితే మరి మీరు నాకిచ్చిన డబ్బు పరిస్థితేమిటి? అది తిరిగి ఇచ్చేయమంటావా? చెక్కా కాషా ? బ్లాకెంత వైటెంత అన్నారట ఆత్రేయ.

అయ్యా జరిగిందేదో జరిగిపోయింది ఇక ఆ విషయం మరచిపోండి అని అక్కడ నుంచీ నిష్క్రమించారట రమణ గారు.

……..

ఆత్రేయ దర్శకత్వం వహించిన వాగ్దానం సినిమా మీద రమణ గారి ఏక వాక్య సమీక్ష. ‘‘వాగ్దానం సినిమా విషయంలో రచయిత ఆత్రేయ దర్శకుడు ఆత్రేయకు ద్రోహం చేశాడు…’’