దటీజ్ ఎస్వీఆర్..! ఎవరైనా సరే… సర్ఫ్ లేకుండానే కడిగేసేవాడు…

తనకు అనిపించినదేదో మాట్లాడేస్తారు తప్ప మనసులో ఒకటీ బైటకి ఇంకోటీ రకం కాదు. ఎవర్నైనా తిట్టాలనుకున్నా పొగడాలనుకున్నా … అది ముఖం మీదే తప్ప పరోక్షంగా కాదు.

ఆయనతో ఏం చెప్పాలన్నా …

చాలా జాగ్రత్తగా ఎలా చెప్తే వింటారో అలానే చెప్పి కన్విన్స్ చేసేవారు ఇండస్ట్రీ పెద్దలు.

భక్త ప్రహ్లాద లో క్లైమాక్స్ రీషూట్ చేయాలనుకున్నప్పుడు …

నిర్మాతలు డి.వి.నరసరాజుగారిని ప్రయోగించారు. నిన్న రాత్రి ప్రివ్యూ చూశానండీ … ఎందుకో ఆ క్లైమాక్స్ కాస్త డల్ అయినట్టనిపించింది.

నా ఉద్దేశ్యమైతే మీరు రీషూట్ చేయమని డిమాండ్ చేయండి …

ఎందుకంటే రేపు మంచి పేరొచ్చినా చెడ్డ పేరొచ్చినా మీకేగా అనడంతో ఎస్వీఆర్ కన్విన్స్ అయిపోయి రీషూట్ చేయమని ఆదేశించి మరీ నటించి మెప్పించారు.

అలాంటిదే ఇంకో సంఘటన …

1967 ఎస్వీఆర్ స్వీయ దర్శకత్వంలో చదరంగం అనే చిత్రాన్ని నిర్మించారు.

దర్శకుడుగా ఎస్వీఆర్ మీద బిఎన్ ప్రభావం ఉండేది. ఆయన తీసిన సినిమాలు రెండు మూడూ కూడా ఆ ధోరణిలో నడిచేవే …

ఉదాత్తమైన కథలతోనే సినిమాలు తీశారాయన.

చదరంగం, బాంధవ్యాలు కాస్త అతి అనిపించినా … సినిమా అనేది జనాలకు ఏదో చెప్పాలనే తపన ఉండేదాయనకి.

చదరంగం సినిమాకి క్రిటిక్స్ నుంచీ మంచి రెస్పాన్సే వచ్చింది.

ఆడియన్స్ నుంచీ కూడా పర్వాలేదనిపించే వసూళ్లు వచ్చాయి.

ఓ మంచి సినిమా తీశాననే తృప్తి ఆయనకి మిగిలింది.

అయితే …

ఆ సంవత్సరం ఉత్తమ చిత్రంగా చదరంగమే అవార్డు గెలుస్తుందని ఎస్వీఆర్ బలంగా అనుకున్నారు.

తీరా పురస్కారాల ప్రకటన వెలుడింది …

ఉత్తమ చిత్రంగా సుడిగుండాలు అనే సరికి ఎస్వీఆర్ కు చిర్రెత్తుకొచ్చింది.

ధిక్ అన్నాడాయన.

ఇదంతా రాజకీయం … ఆ నాగేశ్వర్రావు తెల్లారి లేస్తే కాంగ్రెస్ మంత్రులతోనూ ముఖ్యమంత్రితోనూ తిరుగుతూంటాడు …

అందుకే ఎపి ప్రభుత్వం ఇచ్చే అవార్డులు ఎవరికివ్వాలో తనే డిసైడ్ చేసేస్తున్నాడు …

అలా రాజకీయం చేసి నా సినిమాకు రావాల్సిన అవార్డును తన సినిమాకు వేయించుకున్నాడు ..

అని బహిరంగంగానే వ్యాఖ్యానించడం ప్రారంభించారాయన..

ఎస్వీఆర్ కామెంట్స్ ఆ నోటా ఈనోటా దర్శకుడు ఆదుర్తికి చేరాయి.

ఆయన వెంటనే ఎస్వీఆర్ ను కల్సి …

ఒక్క సారి సుడిగుండాలు సినిమా చూడు … ఆ తర్వాత మాట్లాడదాం అనడంతో సరే అన్నారు ఎస్వీఆర్ …

సినిమా వేశారు.

ఆయన చూశారు … బైటకు వచ్చారు …

సారీ బ్రదర్ … బాగా తీశారు. నా సినిమా కన్నా కూడా ఇదే బాగుంది. అవార్డు విషయంలో ప్రభుత్వం సవ్యంగానే ఆలోచించింది … నేను చేసిన కామెంట్స్ కు సారీ అన్జెప్పి ఆదుర్తిని కౌగలించుకుని వెళ్లిపోయారట.