చే గువేరా..! ఎందుకిలా ఆరాధిస్తున్నారు..? ఏం సాధించాడు..? ఏమిటీ వెర్రి..?!

కొందరు విపరీతంగా ఆరాధించే ఒక వ్యక్తి, మరికొందరికి ఏమాత్రం నచ్చకపోవచ్చు… ఆ మరికొందరి అంచనాలు, విశ్లేషణలు భిన్నంగా ఉండవచ్చు… మనం జాతిపిత అని పిలుచుకునే గాంధీని మెచ్చనివాళ్లు, నచ్చనివాళ్లు బోలెడు మంది లేరా ఏం..? చరిత్రలో ఆరాధనీయులుగా లిఖించబడిన వ్యక్తుల పాజిటివ్ లక్షణాల గురించు గాకుండా, వారిలోని నెగెటివ్ కోణాల్ని కూడా చెప్పుకోవడం, విశ్లేషించుకోవడం పాశ్చాత్య దేశాల్లో గమనించవచ్చు… కానీ ఇండియాలో తక్కువ… మనం పదే పదే చదువుకున్నది నిజం కాకపోవచ్చు, కావచ్చు కూడా…!! చే గువేరా గురించి పత్రికల్లో బోలెడు వ్యాసాలు, కథనాలు, స్మరణలు కనిపిస్తుంటాయ్… పోరగాళ్లు చే బొమ్మలున్న టీషర్టులు వేసుకుంటారు… బైకులకు స్టిక్కర్లు… సోషల్ మీడియాలో డీపీలు… ఐతే, చే గువేరాకు మనం అనుకున్నంత సీనేమీ లేదని అంటున్నాడు మిత్రుడు Jagannadh Goud… అదీ ఓసారి చదువుదాం…

ఎవరీ చే గువేరా..? చే గువేరా చచ్చిన రోజు అయితే నాకేంటి..? బంగ్లాదేశ్ లో కుక్క చస్తే నాకేంటి..? చే గువేరా మనకెందుకు..? అక్కడక్కడా కొందరు పోరగాళ్ళు బైక్ లకి చేగువేరా స్టిక్కర్కు, T- షర్ట్స్ కి చేగువేరా బొమ్మలు తెలిసి వేసుకుంటరో, తెలియక వేసుకుంటరో తెలియదు. భగత్ సింగ్, రాజ్ గురూ, సుభాష్ చంద్ర బోస్ స్టిక్కర్స్ వేసుకోండ్రా అయ్యా.., వాడెవడో కోన్ కిస్కా గొట్టం గాడి స్టిక్కర్స్ మనకి అవసరమా అన్నది భారత యువత ఆలోచించాలి. అసలు వాడి పేరు కూడా అది కాదు, వాడు పీకింది కూడా ఏమీ లేదు. అసలు చేగువేరా ఎవరు.? ఏమి చేశాడు..? చేగువేరా అసలు పేరు “గెవేరా” (ఎర్నెస్టో గెవేరా డి లా సెర్నా). దక్షిణ అమెరికా ఖండంలోని అర్జెంటీనా దేశంలో పుట్టిన గెవేరా “అర్జెంటీనా” రాజధాని “బ్యూనస్ ఎయిర్స్” లో వైద్య విద్యలో ఉత్తీర్ణుడయ్యాడు. బ్యూనస్ ఎయిర్స్ లో చాలామంది పలకరించేటప్పుడు “చే” అంటారు ఎవర్ని అయినా; దాని అర్ధం Hello Buddy or Hey. అర్జెంటీనా భాషలో గెవేరా కూడా అంతే “చే” అని పలకరించేవాడు. వైద్య విద్య అయ్యాక “గౌటెమాల” దేశంలో సామ్యవాద అనుకూల ప్రభుత్వంలో పనిచేశాడు. అమెరికా సాయంతో జరిగిన కుట్రలో ప్రభుత్వం కూలిపోవటంతో గెవేరా ఆ దేశం నుంచి పారిపోయాడు.