కొన్ని కథలు మలయాళ, బెంగాలీ ప్రేక్షకులకు మాత్రమే… మనకు ఎక్కవు..!!

ఇరవయ్యో శతాబ్దం మొదటి రోజుల్లో దేశంలో సంచలనం కలిగించిన భవాల్ రాజా కేసు ఆధారంగా వచ్చిన సన్యాసి రాజా అనే బెంగాలీ సినిమాకు రీమేక్ 1977 లో వచ్చిన మన రాజా రమేష్ సినిమా . బెంగాలీలో ఉత్తమ కుమార్ , సుప్రియాదేవి నటించారు . బెంగాలీలో సూపర్ హిట్ మూవీ . 126 రోజులు ఆడింది . మన తెలుగు సినిమాలో అక్కినేని , వాణిశ్రీ , జగ్గయ్య ప్రధాన పాత్రల్లో నటించారు . అయితే మన తెలుగు సినిమా ప్రేక్షకులకు నచ్చలేదు . నచ్చకపోవటానికి కారణాలు ఉన్నాయి .

అసలు కధ : ప్రస్తుతం బంగ్లాదేశ్ లో ఉన్న ఆనాటి జమీందారు స్త్రీలోలుడు , దుర్వ్యసనాలకు బానిస . సుఖవ్యాధులు వస్తే డార్జిలింగుకు చికిత్స కోసం తీసుకుని వెళతారు . అక్కడ చనిపోతాడు . దహన సంస్కారం సమయానికి పెద్ద తుఫాను రావడంతో , శవాన్ని మధ్యలో వదిలేసి వెళతారు . అనూహ్యంగా బతుకుతాడు . ఆ దారిన వెళుతున్న నాగ సాధువులు రక్షించి , వ్యాధులను నయం చేసాక , జమీందారు కూడా సన్యాసి అయిపోతాడు . దేశమంతా తిరుగుతూ తన జమీనుకే వస్తాడు . అక్కడ గత స్మృతి రావడం , ఆనాటి బ్రిటిష్ ప్రభుత్వం ఒక కమీషన్ వేయడం , ఆ కమీషన్ ముందు తాను జమీందారు అని రుజువు చేసుకుంటాడు .

ఇంక సినిమా కధ … రాజా రమేష్ సంగీత సాహిత్య ప్రియుడు . వాటి గోలలో భార్యను అశ్రధ్ధ చేస్తుంటాడు . ఈలోపు విలన్ జగ్గయ్య డాక్టరుగా అంతఃపురంలో పాగా వేస్తాడు . రాజు గారి ఆరోగ్యాన్ని పాడుచేస్తాడు . రాణీ గారిని లోబరచుకుని బ్లాక్ మెయిల్ చేస్తాడు . దివాణాన్ని , ప్రజలను హింసిస్తూ ఉంటాడు . రాజు గారి శవ దహనం కాకపోవడం , సాధువులు రక్షించడం , సన్యాసిగా మారిపోవడం , మళ్ళా తన జమీనుకే రావడం , ప్రభుత్వ కమీషన్ ముందు తానే రాజునని రుజువు చేసుకోవడం , విలన్ జగ్గయ్యని ప్రజలు చంపేయడం , రాణి గారు విలన్ చేతిలో చనిపోవడం , రాజా వారు తన జమీన్ని ప్రజలకే అప్పచెప్పి సన్యాసిగా కొనసాగడంతో సినిమా ముగుస్తుంది .

మనవారికి ఎందుకు నచ్చలేదు !? రాణిగా వాణిశ్రీ నటించింది . ఆమెను విలన్ లోబరుచుకొనడం జనానికి నచ్చలేదు . ఎంతయినా వాణిశ్రీ కదా ! ఒక ప్రేక్షకుడిగా ఇప్పటికీ నాకెందుకో నచ్చదు . బహుశా మన తెలుగు సినిమా కమర్షియల్ గా సక్సెస్ కాకపోవటానికి ఇదే కారణం అయిఉండాలి . అంతే కాదు . వాణిశ్రీ ఆహార్యం కూడా సరిగ్గా డిజైన్ చేసుకోలేదు . కర్ణుడి చావుకి ఎన్నో కారణాలు . అలాగే ఏదయినా .

కె వి మహదేవన్ సంగీత దర్శకత్వంలో పాటలు చాలా బాగుంటాయి . హిట్టయ్యాయి కూడా . పాటలూ మాటలూ ఆత్రేయే వ్రాసారు . బాలసుబ్రహ్మణ్యం , సుశీలమ్మలు పాడారు . నేల మీది జాబిలి నింగిలోని సిరిమల్లి , వాయించు ఆదితాళం , చంద్రుడు కనపడలేదని పాటలు బాగా హిట్టయ్యాయి .

నెల్లూరి నెరజాణ పాట అక్కినేని , జయమాలినిల మీద చాలా హుషారుగా ఉంటుంది . అలాగే చంద్రుడు కనపడలేదని పాట అక్కినేని , కాంచనల మీద కూడా హుషారుగా ఉంటుంది . దర్శకుడు వి మధుసూధనరావు కదా ! కాంచన లేకుండా ఎలా ?! అందుకే ఉన్నది . అందమైన నాట్యం కూడా చేస్తుంది .

సినిమాలో విజయలలిత అంతఃపురంలో పెద్ద చెలికత్తెగా జనం మతి పోగొడుతుంది . పాత్ర పేరు విలాసవతి . చాలా విలాసంగా నటించింది . ఇతర పాత్రల్లో మిక్కిలినేని , పి జే శర్మ , హలం , శ్రీధర్ , కె వి చలం , పి యల్ నారాయణలు నటించారు . ఇంత చక్కటి మ్యూజికల్ హిట్ ప్రేక్షకులకు నచ్చకపోవడం నిర్మాతల దురదృష్టం .

ఈ సినిమా కధ నాకు ముందే తెలుసు . 1971-72 లో బికాం ఫైనల్ విద్యార్ధిని . మాకు Mercantile Law అనే సబ్జెక్ట్ ఉండేది . K V L N ప్రసాద్ గారు అనే లెక్చరర్ బోధించేవారు . ఆయన ఈ సంచలనాత్మక వాస్తవ కధని మాకు క్లాసులో చెప్పారు . ఆ తర్వాత ఆరేళ్ళకు ఈ సినిమా వచ్చింది .

నిర్మాత బాపట్ల విద్యాసంస్థల వ్యవస్థాపకులలో ముఖ్యులు ముప్పలనేని శేషగిరిరావు గారు . బహుశా అందువలనే ఏమో మా గుంటూరు జిల్లాలోని బాపట్ల , పిట్టలవారి పాలెంలో ఔట్ డోర్ షూటింగ్ జరిపారు . మొత్తం మీద సినిమా చూడబులే . పాటలు చాలా శ్రావ్యంగా ఉంటాయి . నృత్యాలు చాలా అందంగా ఉంటాయి . ముఖ్యంగా అక్కినేని అభిమానులకు బాగానే నచ్చుతుంది . యూట్యూబులో ఉంది . #తెలుగుసినిమాలసింహావలోకనం #తెలుగుసినిమాలు……. (దోగిపర్తి సుబ్రహ్మణ్యం)