ఈ కృష్ణ హీరోయిన్ మళ్లీ ఏ తెలుగు సినిమాలోనూ కనిపించినట్టు లేదు..!!

అంతా మన మంచికే సినిమా అంతా ఆమే … కధ , స్క్రీన్ ప్లే , మాటలు , సంగీత దర్శకత్వం , సినిమా దర్శకత్వం , ప్రధాన పాత్ర అంతా ఆవిడే . ఆడటానికి ఏదో వంద రోజులు ఆడిందేమో నాకు ఐడియా లేదు , కమర్షియల్ గా అంత సక్సెస్ కాలేదని గుర్తు . 13 వారాలు ఆడినట్లు సాక్ష్యం అయితే ఉంది .

భానుమతి కంఠంతో చెవుల్లోని తుప్పు వదిలిపోతుంది . నీవేరా నా మదిలో దేవా తిరుమల వాసా ఓ శ్రీనివాసా , నేనె రాధనోయి గోపాలా అందమైన ఈ బృందావనిలో , సరిగమ పాట పాడాలి పాటలోనే పాఠాలన్నీ , చల్లగా హాయిగా లాలించు లాలి నేనేరా , మానస సంచరరే బ్రహ్మణి మానస సంచరరే పాటలు ఆమే అద్భుతంగా పాడారు . నాకు గుర్తుండి భానుమతి పాడిన పాటల్లో శ్రావ్యంగా లేని పాట ఒక్కటయినా గుర్తు లేదు . మాట చాలదా మనసు చాలదా , నవ్వవే నా చెలీ చల్ల గాలి పిలిచేను పాటలు కూడా శ్రావ్యంగా ఉంటాయి . భానుమతి సొంత సినిమా, భరణీ పిక్చర్స్… అన్ని పాటలూ తనే పాడకుండా ఒకటి వసంతకు, మరొకటి సుశీలకు దయతో ఇచ్చింది…

డి వి నరసరాజు మాటలు తూటాల్లాగా పేలుతాయి . ఈ సినిమాలో కృష్ణకు జోడీగా టి పద్మిని అనే నటి నటించింది . ఆమె తెలుగులో మరే ఇతర సినిమాల్లో నటించినట్లు లేదు . నాగయ్య , కృష్ణంరాజు , నాగభూషణం , పద్మనాభం , మిక్కిలినేని , బాలక్రిష్ణ , సూరేకాంతం , ఛాయాదేవి , రుష్యేంద్రమణి ప్రభృతులు నటించారు .