Subramanyam Dogiparthi…. మల్లీశ్వరి సినిమాలాగా మరో క్లాసిక్… 1969 ఉగాదికి విడుదలయింది ఈ బంగారు పంజరం సినిమా . ఇదే బీ యన్ రెడ్డి దర్శకత్వం వహించిన ఆఖరి సినిమా . ఈ సినిమా గురించి చెప్పాలంటే ముగ్గురి గొప్పతనం గురించి చెప్పాలి . మొదటి వారు బి యన్ రెడ్డి , రెండవవారు ఈ సినిమాకు షీరో ( Shero ) అయిన వాణిశ్రీ , మూడవవారు దేవులపల్లి వారు .
గట్టు కాడ ఎవరో చెట్టు నీడ నీడ ఎవరో, నల్ల కనుల నాగస్వరం ఊదేరెవరో ,.. మనిషే మారేరా రాజా మనసే మారేరా, మనసులో నా మనసులో … పగలైతే దొరవేరా రాతిరి నా రాజువురా ,.. కొండల కోనల సూరీడు కురిసే బంగారం నీరు విరిసి ఉరకేసే ఏరు …, శ్రీశైల భవనా భ్రమరాంబా రమణా .., నీ పదములె చాలు రామ నీ పద ధూళులే పదివేలు … పాటలలోని హాయి, సాహిత్యం ఒక ఎత్తయితే సంగీతం ఒక ఎత్తు . ఈ భావ సాహిత్యానికి కుదిరిన సరయిన సంగీతం …
Ads
మా నరసరావుపేటలో కుర్రాడిగా చూసినప్పుడు బోర్ కొట్టింది . వయసు పెరిగేకొద్దీ ఈ సినిమా భావత్వం , హాయిత్వం అర్థం కావడం మొదలయింది . మల్లీశ్వరి కూడా అంతే . ఢిష్యూం ఢిష్యూం సినిమాల్లాగా స్పీడుగా పరుగెత్తదు . కొండల్లో కోనల్లో సన్నసన్నగా చిన్నచిన్నగా సాగే సెలయేరులాగా ఉంటుంది . నాకయితే కళా ఖండమే .
వాణిశ్రీ షీరోయిన్ అయ్యాక తనకొచ్చిన ప్రతీ అవకాశాన్ని చాలా సిన్సియర్ గా ఉపయోగించుకుంది . ఈ సినిమా కూడా అంతే . మొదట్లో చలాకీగా , తర్వాత బాధ్యత కలిగిన స్త్రీగా మరో సావిత్రిగా నటించింది . శోభన్ బాబు , శ్రీరంజని , రమణారెడ్డి , గీతాంజలి , రావి కొండలరావు , బేబీ రాణి ప్రభృతులు నటించారు .
ఉత్తమ చిత్రంగా ఫిలిం ఫేర్ అవార్డ్ , తృతీయ ఉత్తమ చిత్రంగా నంది అవార్డులు వచ్చాయి . నాలుగవ అంతర్జాతీయ ఫిలిం ఫెస్టివల్లో ప్రదర్శించబడింది . మా ఊళ్ళో వెంకటేశ్వర పిక్చర్ పేలసులో ఆడింది . స్లో అయినా ఫరవాలేదు, హాయయిన సినిమా చూద్దామని అనుకునేవారు యూట్యూబులో చూడవచ్చు . మనసు బాలేనప్పుడో , బాగా ఉన్నప్పుడో తప్పక చూడండి . #తెలుగుసినిమాలసింహావలోకనం #తెలుగుసినిమాలు
మచ్చుకు ఈ పాట వినండి… పగలైతే దొరవేరా… పక్కనా నువ్వుంటే ప్రతి రాత్రీ పున్నమిరా… అంటూ పండు వెన్నెలగా హాయిని కురిపించే పాట… https://www.youtube.com/watch?v=QZA4mCIG7AI&ab_channel=iDreamMedia
Share this Article