.
Subramanyam Dogiparthi … BalaKrishna-centric commercial , action , mass masala entertainer . 1987 సంక్రాంతి సంబరాల్లో వచ్చిన మరో హిట్ సినిమా ఈ భార్గవరాముడు . రావు గోపాలరావు నిర్మాత కూడా .
కొమ్మనాపల్లి గణపతిరావు గారి కధకు మెరుగులు దిద్ది డైలాగ్స్ వ్రాసారు పరుచూరి బ్రదర్స్ . అంతే కాదు పరుచూరి గోపాలకృష్ణ అరుపులు కూడా దండిగానే ఉంటాయి సినిమాలో . స్క్రీన్ ప్లే , దర్శకత్వం వహించిన కోదండరామిరెడ్డి పాటల్లో తన మార్కుని ప్రస్ఫుటంగా చూపారు .
Ads
వీళ్ళందరి తర్వాత మెచ్చుకోవలసింది కాస్ట్యూమ్స్ కృష్ణని … విజయశాంతి , మందాకిని డాన్స్ కాస్ట్యూమ్సులను చాలా చాలా ఆకర్షణీయంగా డిజైన్ చేసారు . వరూధినిగా కానివ్వండి , క్లైమాక్సులో ఇద్దరు హీరోయిన్ల డాన్సులో కానివ్వండి చాలా చక్కటి కాస్ట్యూమ్స్ . ఆ తర్వాత నృత్య దర్శకుడు సలీంని మెచ్చుకోవాలి . డాన్సుల్ని అద్భుతంగా కంపోజ్ చేసారు .
కధ ఎప్పటిలాగే రివెంజ్… ఇంజనీరుగా ప్రభుత్వ విభాగంలో జాయినయ్యి ఓ కేంద్ర మంత్రి గారిని , ఓ వ్యాపారస్తుడిని , వారిద్దరి చెంచా గాళ్ళని ఎదుర్కొంటాడు హీరో బాలకృష్ణ భార్గవరాముడి పాత్రలో . ఆ క్రమంలో జైలుకు వెళ్లి అక్కడ తండ్రిని కలిసి ఇద్దరికీ విలన్లు కామనే అని తెలుసుకుంటాడు . జైలు నుంచి బయటకొచ్చాక రెబెల్ హీరో అయిపోయి విలన్లను తుదముట్టిస్తాడు . ఈ యజ్ఞంలో మరో హీరోయిన్ మందాకిని సహాయపడుతుంది . అందరూ కలిసి విలన్లను తుదముట్టించేస్తారు .
పరుచూరి బ్రదర్స్ డైలాగ్స్ పదునుగా ఉంటాయి . గాంధీ సంఖ్యల్ని పెంచాలి గానీ గాడ్సే సంఖ్యల్ని కాదు పెంచాల్సింది వంటి డైలాగుల్ని 1987 కాబట్టి పెట్టారు . ఇప్పుడు పెట్టాలంటే కాస్త వెనకాముందు చూసుకోవాల్సిందే . విజయశాంతి , మందాకిని మధ్య ప్రేమాభిషేకంలో జయసుధ , శ్రీదేవిల సంవాదం వంటిది ఉంటుంది . అంతగా పేలలేదు కానీ , బాగానే ఉంటుంది .
కేంద్ర మంత్రిని చాలా సులువుగా ఉతుకుతుంటాడు హీరో . ఇప్పుడు MLA మీదకు పోవాలన్నా చుట్టూ మందీ మార్బలం చాలామంది ఉంటారు . కోట శ్రీనివాసరావు డైలాగ్ డెలివరీ అదుర్స్ . గొల్లపూడి మారుతీరావుని డామినేట్ చేసి పడేసాడు .
వేటూరి వారి పాటల్ని చక్రవర్తి సంగీత దర్శకత్వంలో బాలసుబ్రమణ్యం , సుశీలమ్మ , జానకమ్మ , శైలజలు శ్రావ్యంగా పాడారు . ఆనందం బ్రహ్మ అనురాగం బ్రహ్మ అంటూ సాగే నృత్య గీతం వరూధిని ప్రవరాఖ్యుల మీద చాలా బాగుంటుంది . అలాగే క్లైమాక్సులో విజయశాంతి , మందాకినిల మీద విలన్ల బంగళాలో డాన్స్ పాట కాలచక్రమున అంటూ సాగుతుంది . బాగుంటుంది .
బాలకృష్ణ , విజయశాంతి డ్యూయెట్ మన్మధ నామ సంవత్సరం నా మదిలో పుట్టెను ప్రేమ జ్వరం బాగా చిత్రీకరించాడు కోదండరామిరెడ్డి . అల్లుకోరా అందగాడా , వయ్యారమా నీ యవ్వారమేమో అనే రెండు డ్యూయెట్లు బాలకృష్ణ , మందాకిని మీద అదిరిపోతాయి .
ఇతర ప్రధాన పాత్రల్లో రావు గోపాలరావు , జగ్గయ్య , చలపతిరావు , రమణారెడ్డి , చంద్రమోహన్ , ముచ్చెర్ల అరుణ , రంగనాధ్ , సుత్తి వేలు , ఈశ్వరరావు , హరనాధరావు , ప్రభృతులు నటించారు . చంద్రమోహనుకు తగిన పాత్ర లభించలేదు .
మొత్తం మీద సినిమాలో ఆలస్యంగా ప్రత్యక్షమయినా మందాకిని విజయశాంతితో పోటీ పడుతుంది . బాలకృష్ణ-సెంట్రిక్ సినిమాల పరంపరలో వచ్చిన ఈ హిట్ సినిమా యూట్యూబులో ఉంది . తరచూ టివిలో వస్తూనే ఉంటుంది . బాలకృష్ణ అభిమానులు చూసి ఉన్నా మళ్ళా చూడొచ్చు . #తెలుగు_సినిమాల_సింహావలోకనం #సినిమా_కబుర్లు #తెలుగు_సినిమాలు #సినిమా_స్కూల్
Share this Article