.
కంటి చూపు లేకపోవడం అంటే చీకటి మాత్రమే అనుకుంటాం. కానీ ఆ చీకట్లోనే ఉండి, వేలమంది కళ్లలో వెలుగులు నింపే అద్భుతమైన రూపాలను సృష్టించవచ్చని నిరూపిస్తున్నాడు రాంపాల్. రంగుల ప్రపంచాన్ని కనీసం ఊహించలేని ఆయన, తన చేతివేళ్ల స్పర్శతోనే సాక్షాత్తు అమ్మవారికి రూపం ఇస్తున్నాడు.
శ్రమతో కూడిన బాల్యం – పట్టుదలతో సాగిన ప్రయాణం … రాంపాల్ పుట్టుకతోనే అంధుడు. ఆయన తన జీవితంలో ఎప్పుడూ ఒక రంగును, ఒకరి ముఖాన్ని, చివరికి తన స్వంత చేతులను కూడా చూసి ఎరుగడు. అయినా విధి ఆయనను అణచివేయలేకపోయింది. ఆయన వయసు కేవలం నాలుగేళ్లు ఉన్నప్పుడు, తండ్రి ఆయన చేతుల్లో తడి మట్టిని పెట్టి శిల్పాలు చేయడం నేర్పించడం మొదలుపెట్టాడు.
Ads
ఈ ప్రయాణం ఏమాత్రం సులభం కాదు. విద్య నేర్చుకోవడానికి ఆయనకు దాదాపు పదేళ్లు పట్టింది. ఆ క్రమంలో ఆయన చేతులు లెక్కలేనన్ని సార్లు గాయపడ్డాయి. నలుగురిలో నవ్వులపాలయ్యాడు. ఎన్నో అవమానాలు ఎదురయ్యాయి. కానీ, ఆయన మనసులోని పట్టుదల ఏమాత్రం తగ్గలేదు. అడుగు ముందుకు వేస్తూనే ఉన్నాడు.
వేళ్లే ఆయన కళ్లు … నేడు సుమారు 50 సంవత్సరాల వయసున్న రాంపాల్, పశ్చిమ బెంగాల్ నుంచి ఉత్తరప్రదేశ్ లోని బస్తీ జిల్లా, ఛావనీ ప్రాంతంలోని బాబుర్హవా చౌరహాకు వచ్చి ప్రతి పండుగ సీజన్‌లో ప్రతిమలు తయారు చేస్తుంటాడు.
ఆయనకు మట్టితో విచిత్రమైన అనుబంధం ఉంది. కేవలం మట్టిని తాకడం ద్వారానే అది ఏపాటిదో, శిల్ప తయారీకి పనికొస్తుందో లేదో ఇట్టే చెప్పేస్తాడు. పర్యావరణానికి హాని కలగకుండా, పండుగ ముగిసిన తర్వాత ప్రతిమలు నీటిలో సులభంగా కరిగిపోయేలా కేవలం పొలం మట్టిని, సహజ సిద్ధమైన రంగులను మాత్రమే ఉపయోగిస్తాడు. ఈ అద్భుత సృష్టిలో ఆయనకు ఆయన భార్య, కుమారుడు, కోడలు కూడా తోడుగా నిలిచి శ్రమిస్తున్నారు.
నమ్మకానికి ప్రతిరూపం …. తన జీవిత కాలంలో ఇప్పటివరకు రాంపాల్ 700 కన్నా ఎక్కువ ప్రతిమలను రూపొందించాడు. ఆయన చేతిలో రూపుదిద్దుకున్న అమ్మవారి విగ్రహాల కోసం భక్తులు నెలల ముందే బుకింగ్‌లు చేసుకుంటారు…
ఈ దుర్గా పూజ సమయంలో మనం ఎంతోమంది అమ్మవారి విగ్రహాల ముందు నిలబడి చేతులు జోడించి ప్రార్థిస్తాం. కానీ ఆ పూజకు ముందు, ఆ దేవత ముఖాన్ని ఎన్నడూ కళ్లారా చూడని ఒక అంధుడు, తన చేతుల స్పర్శతో, అచంచలమైన నమ్మకంతో ఆ అమ్మకు ఆ రూపాన్ని ప్రాణం పోశాడన్న సత్యం మనసును ఎంతగానో తాకుతుంది.
రూపాలు కంటికి కనబడకపోయినా, హృదయానికి హత్తుకునే అంకితభావం ఉంటే అద్భుతాలు సృష్టించవచ్చు అనడానికి రాంపాల్ ఒక సజీవ సాక్ష్యం…
Share this Article