అందరికీ పాలన నీతులు చెప్పే బ్రిటన్ బల్లి… మళ్లీ కుడితె తొట్టెలో పడింది…

పెరిగిన ధరలు, ద్రవ్యోల్బణం రోజు రోజుకి పెరుగుతుండడం వలన బ్రిటన్ ప్రజలలో తీవ్ర అసహనం వ్యక్తమవుతున్నది. తను ప్రవేశపెట్టిన మినీ బడ్జెట్ లో ధనికులు కడుతున్న ఆదాయపన్ను ని తగ్గించాలని ప్రతిపాదించింది లిజ్ ట్రస్ ! అయితే లిజ్ ట్రస్ తో ప్రధాని పదవికి పోటీపడ్డ ఋషి శునాక్ మాత్రం తాను అధికారంలోకి వస్తే కార్పొరేట్ టాక్స్ మీద సంస్కరణలు తెచ్చి బ్రిటన్ ఆర్ధిక వ్యవస్థ ని గాడిలో పెడతాను అంటూ హామీ ఇచ్చాడు, కానీ కన్జర్వేటివ్ పార్టీ సభ్యులు లిజ్ ట్రస్ మీద విశ్వాసం చూపించారు. అది నెల రోజులు తిరగకముందే బాక్ ఫైర్ అయ్యింది. 100 మంది బ్రిటన్ పార్లమెంట్ సభ్యులు లిజ్ ట్రస్ మీద అవిశ్వాస తీర్మానం పెట్టాలని నిర్ణయించుకున్నారు ఇప్పటికే. లేదా లిజ్ ట్రస్ తనంత తానుగా రాజీనామా చేయాలని కోరుతున్నారు.

Graham Brady [గ్రాహం బ్రాడీ], కన్జర్వేటివ్ పార్టీ కమిటీ హెడ్ కి 100 మంది పార్లమెంట్ సభ్యులు లిజ్ ట్రస్ ని రాజీనామా చేయాలని కోరుతూ లెటర్లు ఇవ్వడానికి సిద్ధంగా ఉన్నట్లు తెలుస్తున్నది. లిజ్ ట్రస్ అవిశ్వాస తీర్మానాన్ని ఎదుర్కోవాల్సి ఉంటుంది లేదా రాజీనామా చేయాల్సి ఉంటుంది. అయితే 1922 లో అప్పటి పార్లమెంట్ చేసిన చట్టం ప్రకారం కొత్తగా ఎన్నిక అయిన బ్రిటన్ ప్రధాని మంత్రి మీద అవిశ్వాస తీర్మానం పెట్టాలంటే కనీసం ఒక సంవత్సరం పదవీ కాలం పూర్తయి ఉండాలి అనే నిబంధన ఉంది. అలా చూస్తే లిజ్ ట్రస్ మీద అవిశ్వాస తీర్మానం పెట్టడం కుదరదు ! దానికోసం 1922 లో చేసిన చట్టాన్ని సవరించాల్సిందిగా 100 మంది పార్లమెంట్ సభ్యులు కోరుతున్నారు లేదా లిజ్ ట్రస్ ని రాజీనామా చేయాల్సినగా కోరుతున్నారు.

1922 లో అప్పటి పార్లమెంట్ చేసిన చట్టాన్ని సవరించి అయినా సరే లిజ్ ట్రస్ ని ప్రధాని పదవి నుండి దించాలనే పట్టుదల ఎందుకు వచ్చింది ? ప్రస్తుతం బ్రిటన్ ఎదుర్కుంటున్న ఆర్ధిక సంక్షోభం నుండి లిజ్ ట్రస్ ఏ మాత్రం గట్టేకించ లేదు అన్న బలమయిన నిర్ణయానికి రావడమే… అయితే లిజ్ ట్రస్ మాత్రం తాను రాజీనామా చేయడానికి సిద్ధంగా ఉన్నానని, కాకపోతే తాజాగా ప్రజల అభిప్రాయాన్ని కోరుతూ ఎన్నికలకి వెళ్ళడానికి మాత్రమే తాను రాజీనామా చేస్తానని పట్టుపడుతున్నది.

బోరిస్ జాన్సన్ , లిజ్ ట్రస్ లు ఋషి శునాక్ ని ప్రధాన మంత్రిగా చేయడానికి సిద్ధంగా లేరు. కానీ ఇప్పడు మళ్ళీ ఎన్నికలకి వెళ్ళేకంటే సమర్ధులు ఎవరన్నా ఉంటే వాళ్ళకే ప్రధాని పదవి అప్పచెప్పాలని మెజారిటీ పార్లమెంట్ సభ్యుల అభిప్రాయం. అలా చూస్తే గత నెలలో లిజ్ ట్రస్ తో పోటీ పడ్డ ఋషి శునాక్ ప్రధాని పదవికి ముందు ఉంటాడు కానీ బోరిస్ జాన్సన్ మాత్రం తన రాజీనామాకి కారణం ఋషి శునాక్ అని ఆరోపిస్తూ ఋషి శునాక్ ఎట్టి పరిస్థితులలోనూ బ్రిటన్ ప్రధాని కాకుండా చూడాలని బహిరంగంగానే లిజ్ ట్రస్ కి విజ్ఞప్తి చేశాడు !

మరి కొద్ది రోజుల్లో ఉత్కంఠకీ తెర పడబోతున్నది కానీ ప్రధానిగా ఎవరు పదవి స్వీకరించినా బ్రిటన్ ని ఆర్ధికంగా ఒక దారిలోకి తీసుకురాలేరు ఇప్పట్లో ! బ్రిటన్ వైఖరి ఎలా ఉన్నది అంటే ‘ఉపస్థిమినహా కన్యాదానం ‘ ఇస్తాను అనేట్లుగా ఉంది ! భారత్ తో బ్రిటన్ ‘స్వేచ్చా వాణిజ్యం ‘ [Free Trade ] పేరుతో ఒప్పందం చేసుకున్నది. ఈ ఒప్పందంలో బ్రిటన్ లో తయారయ్యే వస్తువులని భారత్ ఎలాంటి పన్నులు విధించకుండా కొనాలి అలాగే భారత్ నుండి కొన్ని వస్తువులని ఎలాంటి పన్నులు లేకుండా బ్రిటన్ కొంటుంది .. కానీ .. సెమీ కండక్టర్ పరిశ్రమ విషయంలో మాత్రం టెక్నాలజీ ని భారత్ కి బదలాయించి భారత్ లో తయారుచేయడానికి మాత్రం ఒప్పుకోలేదు. ప్రధానంగా భారత్ ‘ARM’ చిప్ టెక్నాలజీని బదలాయిస్తే ఆ సెమీ కండక్టర్ చిప్ ని భారత్ లో పెద్ద మొత్తంలో తయారుచేస్తే, చాలా చవకగా ఇతర దేశాలకి అమ్మవచ్చు అనే ప్రతిపాదన చేస్తే దానిని తిరస్కరించింది బ్రిటన్.

కీలకమయిన సెమీ కండక్టర్ చిప్ అయిన ‘ARM’ పేటెంట్ హక్కులు బ్రిటన్ దగర ఉన్నాయి. కానీ స్వేచ్చా వాణిజ్యం పేరుతో భారత్ తో ఒప్పందం చేసుకుని, సెమీ కండక్టర్ చిప్ తయారీ టెక్నాలజీ ని మాత్రం ఇవ్వదుట ! ఇక స్వేచ్చా వాణిజ్య ఒప్పందం దేనికి ? చిల్లర సామాన్లు కొనడానికా ?

1980 వ దశకంలో బ్రిటన్ లోని కేంబ్రిడ్జ్ లో Acorn RISC Machine పేరుతో కంప్యూటర్ చిప్ డిజైన్ ని ప్రారంభించింది. చిప్ పేరు ARM అని పిలిచేవారు. తరువాతి దశలో Acorn RISC Machine కాస్తా Advanced RISC Machine గా మార్చినా ARM పేరు అలాగే ఉన్నది. మొదట్లో ARM కి డిమాండ్ ఉన్నా క్రమంగా మార్కెట్ కోల్పోవడంతో నష్టాలలోకి వెళ్ళిపోయింది. 2016 లో జపాన్ కి చెందిన సాఫ్ట్ బ్యాంక్ గ్రూప్ ARM ని కొన్నది. ప్రస్తుతం మొబైల్ ఫోన్లలో ARM చిప్ ని వాడుతున్నా, ఎక్కువ శాతం ఎంబెడెడ్ సిస్టమ్ల లో ఉపయోగిస్తున్నారు ఈ చిప్ ని.

జపాన్ కి చెందిన సాఫ్ట్ బ్యాంక్ గ్రూప్ ARM ని కొనకముందే భారత్ ప్రతిపాదన చేసింది. సంయుక్తంగా ARM ప్రాజెక్ట్ ని భారత్ లోనే అభివృద్ధి మరియు తయారీ చేయడానికి ‘ఫాబ్’ ని నెలకొలుపుదాం అంటూ కానీ బ్రిటన్ తిరస్కరించి, చివరకి సాఫ్ట్ బాంక్ గ్రూపు కి అమ్మింది! 2016 లో సాఫ్ట్ బ్యాంక్ గ్రూప్ కొన్నప్పటి నుండి ఇతర పెట్టుబడుల మీద నష్టాలు వస్తుండడంతో జపాన్ సాఫ్ట్ బాంక్ గ్రూప్ 2020 లో ARM ని తిరిగి అమ్మకానికి పెట్టింది. ప్రస్తుతం అమెరికాకి చెందిన nVidia సంస్థ కొనే ప్రయత్నంలో ఉంది.

గత దశాబ్ద కాలంగా బ్రిటన్ ఇలాంటి తప్పు నిర్ణయాలు తీసుకుంటూ ఇప్పుడు ఈ స్థితికి వచ్చింది. టెక్నాలజీని అభివృద్ధి చేసి దానిని బ్రిటన్ లో కాకుండా తైవాన్, చైనాలలో తయారుచేయించి ఇతర దేశాలకి ఎగుమతి చేస్తున్నది కానీ భారత్ క్ టెక్నాలజీ బదలాయించి భారత్ లో తయారు చేయింది ఇతర దేశాలకి అమ్మడానికి ఆసక్తి చూపలేదు.

ఏది ఏమయినా ప్రపంచానికి మేలు చేసే విధంగా ఒక్కో యూరోపు దేశం క్రమంగా కష్టాలపాలు అవుతున్నాయి! ఆర్ధికంగా కావొచ్చు లేదా రాజకీయంగా కావొచ్చు అస్థిర పరిస్థితులు నెలకొంటున్నాయి యూరోపులో. తమ తమ దేశాలలో నెలకొంటున్న ఆర్ధిక, రాజకీయ అస్థిరతల నుండి ప్రజల దృష్టి మళ్లించడానికి ఎప్పుడూ చేసే ప్రయత్నమే ఇప్పుడూ చేస్తున్నాయి అవి: భారత్ ఆర్ధికంగా కష్టాలలో ఉందా ? భారత్ ఆర్ధిక వ్యవస్థ కుప్పకూలిపోనుందా ? ఇలా హెడ్ లైన్స్ పెడుతూ విషప్రచారం చేయడం మొదలు పెట్టాయి ఇప్పటికే. ఇలాంటి ప్రచారమే చైనా విషయంలో 2010 నుండి చేస్తూ వచ్చాయి కానీ గత 12 ఏళ్లలో చైనా అలాగే నిలబడి ఉంది !

యూరోపు వాళ్ళ అవకాశ వాద రాజకీయం ఎలా ఉంటుందో ఒక ఉదాహరణ చెప్తాను. రెండేళ్ల క్రితం ప్రస్తుత బ్రిటన్ ప్రధాని లిజ్ ట్రస్ ఇలా అన్నది : చైనాని చూసి బ్రిటన్ నేర్చుకోవాల్సినది చాలా ఉంది. చైనా ప్రజల కష్టపడి పనిచేసే విధానాన్ని మనం కూడా అలవరచుకోవాలి. బ్రిటన్ పాఠశాలలలో చైనా భాష అయిన ‘మాండరీన్‘ నేర్పాలి. తద్వారా బ్రిటన్ విద్యార్ధులు చైనా నుండి స్ఫూర్తిని పొందుతారు. ఇదే లిజ్ ట్రస్ ప్రధాని కాగానే చేసిన వ్యాఖ్య : చైనా చాలా నీచమయిన,ప్రమాదకార దేశం ! బహుశా రెండేళ్ల క్రితం చైనా నుండి రాజకీయ అవసరాల కోసం నిధులు బాగా అంది ఉంటాయి, అవి ఇప్పుడు ఆగిపోయి ఉంటాయి… మన దేశంలోనే ఇలాంటి రాజకీయ వేత్తలు ఉంటారు అనే భ్రమల నుండి బయటపడాలి మనం….