హేమిటీ… అంతటి పరిటాలను బహిరంగంగా చెంపదెబ్బ కొట్టాడా… ఎవరాయన..?

జాతి రత్నాలు అంటూ ఎన్టీఆర్ ఫోటో చూపించి రెండవ స్థానంలో పరిటాల రవి ఫోటో చూపిస్తారు కొందరు. వన భోజనాలు, సమావేశాల్లో ఎన్టీఆర్ కటౌట్ తరువాత పరిటాల కటౌట్ కు అంతటి ప్రాధాన్యత ఉంటుంది . అలాంటి పరిటాలను ఒక అధికారి చెంపదెబ్బ కొడితే ఎలా ఉంటుంది ?

ఏం మాట్లాడుతున్నావు ? పరిటాలను అధికారి చెంపదెబ్బ కొట్టడమా ?

95 ఆగస్టులో ఎన్టీఆర్ చైతన్య రథంపై పార్వతితో కలిసి వైస్రాయ్ హోటల్ కు వచ్చారు . లోపలికి వెళ్లి తమ్ముళ్ళతో మాట్లాడాలి అనుకున్నారు . కనిపిస్తే చాలు కాళ్ల మీద పడి పోతారు, ఉపన్యాసం ఇస్తే కాళ్ల మీద పడి కన్నీళ్లతో కాళ్ళు కడుగుతారు అనుకొని ఉండ వచ్చు బహుశా. కానీ వాళ్ళు రాజకీయ నాయకులు ఎన్టీఆర్ లా కళాకారులు కాదు .

ఎన్టీఆర్ తన వాహనంతో పాటు వైస్రాయ్ లోకి రావడానికి ప్రయత్నిస్తే పోలీసులు అడ్డుకున్నారు . ఇంద్రారెడ్డి లోనికి వెళ్ళడానికి ప్రయత్నిస్తే పోలీసులు అడ్డుకొని తోసేశారు . నేను ఇంకా హోం మంత్రినే అని ఇంద్రారెడ్డి పోలీసులకు చెబుతున్నాడు . అక్కడ ముఖ్యమంత్రినే ఆపేశారు , హోం మంత్రి ఓ లెక్కనా అని అంత ఉద్రిక్త పరిస్థితిలోనూ నవ్వు వచ్చింది .

అప్పుడు కార్మిక శాఖ మంత్రిగా ఉన్న పరిటాల రవి గేటు తోసుకొని లోనికి వెళ్ళడానికి ప్రయత్నించారు . అక్కడ ఉన్న పోలీసు అధికారి ఇక్భాల్ పరిటాల రవిని చెంపదెబ్బ కొట్టి లోనికి వెళ్లకుండా అడ్డుకున్నారు . ప్రభుత్వం పడిపోయిన కీలక సంఘటనలో ఇది భాగమే కానీ ప్రత్యేక వార్తగా నిలువ లేదు . మొత్తం వార్తలో ఓ వాక్యంగా మాత్రమే కవర్ అయింది .

అనంతరం చంద్రబాబు సీఎంగా కుదురుకున్న తరువాత ఇక్బాల్ ను తన సెక్యూరిటీ అధికారిగా నియమించారు . చెంపదెబ్బ కొట్టినప్పటి నుంచి ఇక్బాల్ దశ తిరిగింది . బాబు ది యూస్ అండ్ త్రో పాలసీ వాడుకుని వదిలేస్తారు అంటారు కానీ కీలక సమయంలో తనకు అండగా నిలిచిన అధికారులు , మీడియా, వామపక్షాల నాయకుల సహాయం ఉంచుకోలేదు . సహాయానికి మించిన మేలు చేశారు .

ఇక్బాల్ కు ప్రమోషన్ కూడా వచ్చింది . బాబు సీఎంగా ఉన్నప్పుడు ఓ వెలుగు వెలిగారు … ఆ తరువాత పరిణామాలు , లోపలి వ్యవహారాలు తెలియవు కానీ రాష్ట్ర విభజన తరువాత ఇక్బాల్ హఠాత్తుగా ysr కాంగ్రెస్ కండువా కప్పుకున్నారు . జగన్ అతనికి శాసన మండలి సభ్యత్వం కల్పించారు .

ఈ స్ఫూర్తితో గత ఏడాది మహానాడులో ఒకరిద్దరు మహిళలు మైకు ముందు తొడగొట్టి సవాల్ చేస్తూ ప్రసంగాలు చేసినా పెద్దగా గుర్తింపు రాలేదు . ఒక్కో సీజన్ లో ఒకరిద్దరే ఒక్క చర్యతో పాపులర్ అవుతారు . తొడగొట్టే టెక్నిక్ అన్ని సార్లు ఫలితం చూపదేమో … ఇక ఇక్బాల్ కు చెంప దెబ్బతో దశ తిరిగింది . ఆ రోజు అలా చేసి ఉండకపోతే అందరు పోలీసుల్లా వయసు రాగానే రిటైర్ అయి పెన్షన్ తో కాలక్షేపం చేసేవారు . దెబ్బతో బాబు దృష్టిలో పడి, తరువాత కాలం కలిసొచ్చి జగన్ దృష్టిలోనూ పడ్డారు . ఏమో… ఏదో ఓ రోజు మంత్రి కూడా కావచ్చు ….

పరిటాలను తొలిసారి హిమాయత్ నగర్ లోని టీడీపీ కార్యాలయంలో చూశా . నలుగురైదుగురు రిపోర్టర్లం ఆయనతో మాట్లాడుతుంటే… రెండంచెలుగా మా చుట్టూ లుంగీ బ్యాచ్ ఉంది . ఏదో రాజకీయాలు మాట్లాడుకుంటాం, మీరేంటి అంటుకొని నిలబడతారు అని చిరాగ్గా అన్నా సరే, తరువాత తెలిసింది సదరు లుంగీ బ్యాచ్ పరిటాల ప్రైవేటు సెక్యూరిటీ అని …

2004 లో టీడీపీ ఓడిపోయి కాంగ్రెస్ అధికారంలోకి వచ్చాక, ఓసారి అసెంబ్లీ ఆవరణలో పరిటాల కనిపిస్తే ఇది బైఎలక్షన్ కేసే అని గుంపులో ఒకరు అనడం వినిపించింది . తన ప్రాణాలకు ముప్పు ఉందని పరిటాల కూడా గ్రహించారు . అనంతపురంలో జరిగిన టీడీపీ సమావేశంలోనే మొద్దు శీను పరిటాలను హతమార్చారు .! బావ కళ్ళల్లో ఆనందం చూడాలి అని టీవీ 9 ఇంటర్వ్యూలో మొద్దు శీను చెప్పిన డైలాగు ఆ రోజుల్లో పూరి జగన్నాద్ పోకిరి సినిమా డైలాగును మించి పాపులర్ అయింది . కొన్ని సినిమాల్లో మొద్దు శీను డైలాగులను కూడా ఉపయోగించుకున్నారు ….