ఇది గుంటూరు జిల్లా వాళ్ళ సినిమా . ఈ టైటిల్ని ఎంచుకున్నందుకు హీరో కృష్ణని , నిర్మాత దర్శకులను మెచ్చుకోవాలి . బుర్రిపాలెం నుండి బయలుదేరిన హీరో కృష్ణ తాను పుట్టిపెరిగిన ఊరి పేరు కలకాలం సినిమా ప్రపంచంలో నిలిచిపోయేలా ఈ టైటిల్ని ఎంచుకున్నారు .
బుర్రిపాలెం గుంటూరు జిల్లాలోని తెనాలి పక్కన . అష్టకష్టాలు పడి ఈ సినిమాను దర్శకుడిగా పూర్తి చేసిన బీరం మస్తాన్ రావు గుంటూరు వాడు . సినిమా ఔట్ డోర్ షూటింగ్ చాలా వరకు బుర్రిపాలెంలో తీసారు . ఇంక ఈ బుర్రిపాలెం బుల్లోడు సినిమా గుంటూరు జిల్లా వాళ్ళది కాక మరి ఎవరిది అవుతుంది చెప్పండి .
కృష్ణ శ్రీదేవిల జోడీ ప్రభంజనం ఈ సినిమాతోనే మొదలయింది . ఈ సినిమా తర్వాత 30 సినిమాలలో కలిసి నటించారు . నవంబర్ 16 , 1979 న వచ్చిన ఈ సినిమా పూర్తి వినోదాత్మక చిత్రంగా హిట్టయింది . వంద రోజులు ఆడింది . కృష్ణ చాలా హుషారుగా , ఫుల్ జోషులో నటించిన సినిమా . శ్రీదేవి అల్లరి పిల్లగా చాలా హుషారుగా నటించింది . కృష్ణతో జోడి అందంగా ఉంటుంది .
Ads
ఈ సినిమా ప్లాట్ లైనుని బీరం మస్తాన్ రావు అందిస్తే జంధ్యాల , సత్యానందులు కధను తయారు చేసారు . జంధ్యాల డైలాగులను కూడా వ్రాసారు . చక్రవర్తి సంగీత దర్శకత్వంలో పాటలన్నీ హిట్టే . పాటలను అన్నింటినీ వేటూరే వ్రాసారు .
బాలసుబ్రమణ్యం , సుశీలమ్మలు పాడిన నా జీవన బృందావనిలో ఆమని హృదయంలో నిను చూసిన తొలి ఆశలు పాట చాలా శ్రావ్యంగా ఉంటుంది . బుర్రిపాలెం బుల్లివాణ్ణి నేనే , చిన్నది కాదమ్మో భల్ చిచ్చర పిడుగమ్మో పాటల్లో ఇద్దరూ ఇరగతీసారు .
ఈ సినిమాలో కృష్ణ లెక్చరర్ . శ్రీదేవి గేంగ్ టీజ్ చేసే పాట బాగా అల్లరిగా ఉంటుంది . పంతులు పంతులు పావు శేరు మెంతులు పాట హుషారుగా ఉంటుంది . ఈ సినిమాలో నాగభూషణం , అల్లు రామలింగయ్యలు మాడాలుగా మాయదారి సచ్చినోళ్ళు మా ఎంట పడతారు మా దగ్గర ఏముందో మీది మీదికొస్తారు అంటూ డాన్స్ చేసే గ్రూప్ డాన్స్ పాట ప్రత్యేకం . ఇంక జయమాలిని , కృష్ణల పాట లంగరు చిన లింగయ్య కూతుర్ని అబ్బయ్యా కోటిలింగాల రేవు కాడ జాతర్ని అబ్బయ్యా . ఇద్దరూ అదరగొట్టేస్తారు .
బీరం మస్తాన్ రావు కె బాపయ్య , కె రాఘవేంద్రరావుల శిష్యుడు . ఆ సెగ పాటల చిత్రీకరణలో ప్రస్ఫుటంగా కనిపిస్తుంది . ముఖ్యంగా నా జీవన బృందావనిలో ఆమని హృదయం పాట చిత్రీకరణలో రాఘవేంద్రరావు స్టైల్ కనిపిస్తుంది . సినిమాకు ఐకాన్ పాట .
కృష్ణ , శ్రీదేవిలతో పాటు సత్యనారాయణ , నాగభూషణం , పండరీబాయి , అల్లు రామలింగయ్య , గిరిబాబు , జయమాలిని ప్రభృతులు నటించారు . ఈ సినిమాలో సత్యనారాయణ పాత్ర కీలకం . చాలా బాగా నటించారు . సినిమా , పాటలు యూట్యూబులో ఉన్నాయి .
కృష్ణ , శ్రీదేవి అభిమానులు చూసి ఉండకపోతే తప్పక చూడండి . పాటలన్నీ చాలా హుషారుగా ఉంటాయి . కృష్ణ అభిమానులు డాన్స్ చేస్తారు . A complete entertaining , feel good and musical hit . #తెలుగుసినిమాలసింహావలోకనం #తెలుగుసినిమాలు (దోగిపర్తి సుబ్రహ్మణ్యం)
Share this Article