డిప్యూటీ చీఫ్ మినిస్టర్ ఆశల్లో ఓ లీడర్… అప్పటి ఓ జ్ఞాపకం…

సీఎం .. సీఎం అనే నినాదాలను ఆపమని పవన్ చెప్పినా సరే, అభిమానులు వినరు తెలుసు కదా … ఇక ఈటెల , బండి , ప్రవీణ్ కుమార్… ఇలా ఎవరి ఉపన్యాసం ఐనా సీఎం సీఎం అంటూ అభిమానులు ఇచ్చే నినాదాలతోనే మొదలవుతుంది … కేఏ పాల్ , షర్మిల మాత్రం వీరికన్నా భిన్నంగా… కాబోయే సీఎం నేనే అని చెబుతుంటారు … ఇప్పుడు దాదాపు అందరు నాయకులకు సీఎం సీఎం అనేది ఇంటి పేరుగా మారిపోయింది … 95 లో అలా కాదు ..

మల్యాల రాజయ్యను అందరూ డిప్యూటీ సీఎం అంటుంటే ఆయనతో ఉన్న చనువుతో నేను ‘‘ఏంటీ, అందరూ నిన్ను అలా బనాయిస్తున్నారు ( వెటకారం చేస్తున్నారు ) అని అడిగితే …. ఆయన ఒక్కసారిగా సీరియస్ ముఖం పెట్టి … ఇందులో బనాయించడం ఏముంది నేను డిప్యూటీ సీఎం అవుతాను అన్నారు …

మల్యాల రాజయ్య మేజిస్ట్రేట్ గా చేసేవారు . టీడీపీలో చేరి ఆందోల్ నుంచి mla అయ్యారు. బడ్జెట్ లీక్ అని 88 లో ఎన్టీఆర్ 32 మంది మంత్రులతో రాజీనామా చేయించి కొత్తవారితో మంత్రివర్గం ఏర్పాటు చేశారు గుర్తుంది కదా .. అలా రాజయ్యకు ఆర్థిక శాఖ మంత్రి పదవి లభించింది … Mla గా ఆయన, రిపోర్టర్ గా నేను సికింద్రాబాద్ నుంచి సంగారెడ్డికి బస్సులో వెళ్లే వాళ్ళం .. పరిచయం బాగానే ఉంది ..

డిప్యూటీ సీఎం అనే పిలుపును ఆయన అంత సీరియస్ గా తీసుకోవడం వింతగా అనిపించింది … ఇంతకూ మీరు డిప్యూటీ సీఎం అవుతున్నారని ఎవరు చెప్పారు ? బాబు చెప్పారా ? అని అడిగితే వంద కాపీలు ముద్రించే ఓ చిన్న పత్రికలో జగన్మోహన్ అనే జర్నలిస్ట్ రాశాడుట … ఆశ్చర్యపోవడం నా వంతయింది…

ఇలాంటి పత్రికలు మార్కెట్ లో కనిపించవు … వంద కాపీలు ముద్రించి అవసరం అయిన చోట ఉచితంగా పంపిణీ చేస్తారు … అలా టీడీపీ mla లకు పంచారు …. మరీ ఎక్కువగా ఆశపడుతున్నావు , డిప్యూటీ సీఎం ఇవ్వరు అని కారణాలు చాలా వివరంగా చెప్పాను … అంతా విన్నాక ఆయన నువ్వు ఎన్నయినా చెప్పు, జగన్ మోహన్ రాసింది నాకు నచ్చింది … ఐనా కాకపోయినా డిప్యూటీ సీఎం అనే పలకరింపు హాయిగా ఉందని సంతోషంగా చెప్పాడు … చివరకు అతను మళ్లీ మంత్రి కూడా కాలేదు ..

నిజం ఎవడికి కావాలి … చెవులకు ఇంపుగా ఉండే మాటలు కావాలి కానీ …. (ఇది జరిగిన చాన్నాళ్లకు ఇంకో రాజయ్య, అనగా తాటికొండ రాజయ్య ఉపముఖ్యమంత్రి అయ్యాడు…)