శోభన్ బాబు – శారద జోడీలో 1975 లో వచ్చిన మరో చక్కటి ఎమోషనల్ సినిమా ఈ దేవుడు చేసిన పెళ్ళి . సినిమాకు శారద ద్విపాత్రాభినయమే కీలకం . ఏక్సిడెంట్ల ద్వారా కధలో మలుపులను సృష్టించిన రచయిత గొల్లపూడి మారుతీరావుని అభినందించాలి .
అలాగే పదునైన మాటలను వ్రాసిన సత్యానంద్ ని , శ్రావ్యమైన సంగీతాన్ని అందించిన టి చలపతిరావుని అభినందించాలి . బిర్రయిన స్క్రీన్ ప్లేను తయారు చేసుకుని , సినిమాను గోదావరి జిల్లాల గ్రామీణ నేపధ్యంలో తీసి , సహజత్వాన్ని చొప్పించిన దర్శకుడు తాతినేని రామారావుని అభినందించాలి .
సాయికుమార్ బాలనటుడిగా అరంగేట్రం చేసిన మొదటి సినిమా కూడా ఇది . బాపు తీసిన స్నేహం రెండో సినిమా సాయికుమార్ కి . ఈ సినిమాలో గుడ్డి పిల్లాడుగా బాగా నటించాడు .
Ads
హీరో శోభన్ బాబు పోస్ట్ మేన్ . ఊళ్ళో అందరికీ తల్లో నాలికలా ఉంటాడు . శారద ఆ ఊరి స్కూలుకి టీచరమ్మగా వస్తుంది . టీచరమ్మ అక్క మూగది . హీరో టీచరమ్మ ప్రేమించుకుంటారు . టీచరమ్మ మూగ అక్కని పెళ్ళి పీటల మీద కూర్చొబెట్టి పెళ్లి చేసేస్తుంది . పెళ్లి అయ్యాక ప్రయాణం చేస్తున్న గుర్రపు బండి బోల్తా కొడుతుంది . ఏక్సిడెంట్లో మాట పడిపోయిందని అబధ్ధం చెపుతారు హీరోకి .
మూగ హీరోయిన్ తో కాపురం చేసి , ఒక కొడుకుని కూడా కంటారు . మరోసారి ఏక్సిడెంట్లో మూగ శారద చనిపోతుంది . ఆమె స్థానంలోకి టీచరమ్మ వచ్చేస్తుంది . ఇదంతా ఫ్లాష్ బేక్ లో చూపిస్తారు దర్శకుడు .
శోభన్ బాబు పాత్ర బాగుంటుంది . చాలా బాగా నటించారు కూడా . శారద గురించి చెప్పేది ఏముంది ? జీవించింది . ఇతర పాత్రల్లో చంద్రమోహన్ , లక్ష్మి , నాగభూషణం , ప్రభాకరరెడ్డి , రావు గోపాలరావు , కాకరాల , మాస్టర్ సాయికుమార్ , గిరిబాబు ప్రభృతులు నటించారు . సి యస్ రావు ఓ అతిధి పాత్రలో తళుక్కుమంటారు .
టి చలపతిరావు సంగీత దర్శకత్వంలో పాటలన్నీ చాలా శ్రావ్యంగా ఉంటాయి . జ్యోతిలక్ష్మి డాన్సులో సూదిలో దారం సందులో బేరం పాట సూపర్ హిట్టయింది . అలాగే టీచరమ్మ శారద పాడే పాట ఓ చిట్టి పొట్టి పాపల్లారా పాట , మిగిలిన పాటలు చాలా శ్రావ్యంగా ఉంటాయి .
దసరా సమయంలో స్కూల్ పిల్లల్ని తీసుకుని టీచరమ్మ బయలుదేరుతుంది . మా తరం వాళ్ళకు మా చిన్నప్పటి దసరా రోజులు , ఇంటింటికీ తిరగటం , పప్పుబెల్లాలు , పిల్లలు పాడే అయ్య వారికి చాలు అయిదు వరహాలు పాట గుర్తుకొస్తాయి .
వెరశి మంచి సినిమా . మూడు సెంటర్లలో వంద రోజులు ఆడింది . మహిళలకు నచ్చితే ఆడించేస్తారు కదా ! టివిలో కూడా చూసా . యూట్యూబులో ఉంది . చూడనివారు వాచ్ లిస్టులో పెట్టేసుకోవచ్చు . A feel good movie . #తెలుగుసినిమాలసింహావలోకనం #తెలుగుసినిమాలు ……… By దోగిపర్తి సుబ్రహ్మణ్యం
Share this Article