ఎదురు లేని మనిషి . కరెక్ట్ టైటిల్ . NTR కు ఎదురేముంది ?! 1970s తర్వాత ఫుల్ ఆయనిష్టం . నిప్పులాంటి మనిషి తర్వాత ఆయన్ని ఏంగ్రీ మేన్ , వెంజెన్స్ ఇమేజి లోకి తెచ్చేసారు తెలుగు సినిమా కధా రచయితలు , దర్శకులు , నిర్మాతలు .
ప్రముఖ నిర్మాత అశ్వినీదత్ స్వంత బేనర్ వైజయింతి మూవీస్ బేనర్ పై నిర్మించిన మొదటి సినిమా 1975 లో వచ్చిన ఈ ఎదురు లేని మనిషి సినిమా . హిందీలో హిట్టయిన జానీ మేరా నామ్ కు రీమేక్ మన తెలుగు సినిమా . హిందీలో దేవానంద్ , హేమమాలిని , ప్రాణ్ ప్రధాన పాత్రల్లో నటించారు .
రొటీన్ కధే . హీరో తండ్రిని అన్యాయంగా చంపుతారు . హంతకుల నుంచి అన్నదమ్ములు తప్పించుకుని పారిపోతూ విడిపోతారు . ఒకడు ఎదురు లేని మనిషి అవుతాడు , మరొకడు పోలీసు ఆఫీసర్ అవుతాడు . తమ తండ్రిని చంపిన హంతకులను తుదముట్టించి తన పగ తీర్చుకుంటాడు .
Ads
ఈ క్రమంలో ఓ హీరోయిన్ . వాణిశ్రీ ఇతర హీరోలతో నటించిన ఆల్మోస్ట్ అన్ని సినిమాల్లో తానే డామినేట్ చేస్తుంది . ఆమెకే ఎక్కువ పేరు వచ్చింది . ఒక్క NTR తో మాత్రం డామినేట్ చేయలేకపోయింది . కాస్త ఈ సినిమాలో సాంగ్సులో ధీటుగా నిలబడింది . యమగోల , అడవిరాముడు సినిమాల్లో హీరోయిన్ జయప్రద షూటింగ్ అయిపోయి ఇంటికి వెళ్ళాక , కాపు పెట్టించుకునేది . బహుశా ఈ సినిమాలో వాణిశ్రీ కూడా కాపు పెట్టించుకుని ఉండి ఉండాలి .
కె వి మహదేవన్ సంగీత దర్శకత్వంలో రెండు మూడు పాటలు వీర హిట్టయ్యాయి . కసిగా ఉంది కసికసిగా ఉంది కలవక కలవక కలిసినందుకు కస్సుమంటుంది అనే పాట నిజంగానే కస్సు కస్సుమంటుంది . మిగిలిన పాటలు హే కృష్ణా ముకుందా మురారీ , ఎంతవాడు ఎంతవాడు , ఎక్కడో ఎక్కడో తగలరాని , కంగారు ఒకటే కంగారు కూడా హుషారుగా ఉంటాయి . పాటలన్నీ ఆత్రేయే వ్రాసారు .
NTR , వాణిశ్రీ , జగ్గయ్య , పద్మప్రియ , ప్రభాకరరెడ్డి , కాంతారావు , సత్యనారాయణ , రాజబాబు హేమలత , అల్లు రామలింగయ్య , నిర్మలమ్మ ప్రభృతులు నటించారు . మమిడిపాటి రాధాకృష్ణ మూర్తి డైలాగ్స్ బాగుంటాయి . కె బాపయ్య దర్శకులు .
కమర్షియల్ గా సక్సెస్ అయిన ఈ సినిమా అయిదు సెంటర్లలో వంద రోజులు ఆడింది . యూట్యూబులో ఉంది . చూడని NTR , వాణిశ్రీ అభిమానులు ఎవరయినా ఉంటే తప్పక చూడండి . డ్యూయెట్లు మిస్ కాకండి . అడవిరాముడు , యమగోల సినిమాల్లో పాటల్లాగా హుషారుగా ఉంటాయి . #తెలుగుసినిమాలసింహావలోకనం #తెలుగుసినిమాలు…… [ దోగిపర్తి సుబ్రహ్మణ్యం ]
Share this Article