అనుకుంటూ ఉన్నదే… కార్తీకదీపం చివరి ఎపిసోడ్ మీద ప్రేక్షకుల్లో బాగా ఆసక్తి ఉంటుందని..! బిగ్‌బాస్ ఎంత భ్రష్టుపట్టిపోయినా ఫినాలే ఫంక్షన్‌ను చూస్తారు చాలామంది… అలాగే ఇదీ… కార్తీకదీపం సీరియల్‌ను కొన్నిరోజులు భ్రష్టుపట్టించారు… ఐనా సరే, చివరి ఎపిసోడ్ కథ ఎలా ఎండ్ చేస్తారనే ఆసక్తి నెలకొంది… రకరకాల కథనాలు, రూమర్స్ ఉన్నా సరే, ఇన్నేళ్లు ఆదరించి, మధ్యలో వదిలేసిన వాళ్లు సైతం చివరి ఎపిసోడ్ కోసం ఆసక్తిగా ఎదురు చూశారు…
15.42 ఇదీ చివరి ఎపిసోడ్‌కు రేటింగ్స్… ఇవి హైదరాబాద్ బార్క్ రేటింగ్స్… తెలంగాణ, ఏపీ కలిపితే 18 వరకూ ఉండొచ్చు… ఈరోజుల్లో ఇది సూపర్ హిట్ అన్నమాటే… అలా ప్రేక్షకులు తమకు ఇష్టమైన వంటలక్కకు వీడ్కోలు పలికారు… నిజానికి ఈ సీరియల్ ప్రేమి విశ్వనాథ్‌దే… ఆమె లేకపోతే సీరియల్ లేదు, అంతగా జనాన్ని కట్టిపడేసింది…
అందమా… యావరేజ్…! చామనఛాయ కలర్… కాస్త ముదురు మొహం… నో ఎక్స్‌పోజింగ్… కనీసం చూపులో, కదలికలో, మాటలో కూడా వెగటుతనాన్ని ఛాయామాత్రంగా కూడా కనిపించనివ్వదు…! తెలుగు రాదు..! అంతకుముందు ఏమైనా సీరియల్స్ చేసిందా… లేదు..! పోనీ, కార్తీకదీపం వస్తున్నప్పుడు మరో సీరియల్‌లో నటించిందా… లేదు…! టీవీ షోలు, ఇంటర్వ్యూలతో పాపులారిటీని పెంచుకునే ప్రయాస ఉందా… లేదు…!
Ads
అయితేనేం… తెలుగునాట ప్రతి ఇంటికీ ఆడపడుచు అయిపోయింది… ఆమెను గుర్తుపట్టనివాళ్లు లేరు… బోలెడు మంది సినిమా తారలు వస్తుంటారు, పోతుంటారు… వాళ్లందరికన్నా ప్రేమి విశ్వనాథ్ బాగా తెలుగు జనానికి కనెక్టయిందంటే అతిశయోక్తి కాదు… కాకపోతే ఆ దర్శకుడెవరో సీరియల్‌ను ఇంకా ఇంకా సాగదీయాలనే కక్కుర్తితో, తలతిక్క ట్విస్టులు పెట్టి సీరియల్‌ను, ప్రేమి ఇమేజీని దెబ్బతీశాడు…
మధ్యలో ఆమెను మాయం చేసి కథ నడిపించాలని అనుకున్నాడు… ఆమే లేకపోతే ఆ సీరియల్ లేదనే విషయం లేటుగా అర్థమైంది… పడిన సీరియల్ రేటింగ్స్ మళ్లీ లేవలేదు… స్టార్ మాటీవీ కదా, బాగానే పంపు కొట్టింది, ఐనా రేటింగ్స్ పెద్దగా పెరగలేదు… పలుసార్లు ఆ సీరియల్‌ను వేరే సీరియళ్లు దాటిపోయాయి… దాంతో బుద్దితెచ్చుకున్న దర్శకుడు, నిర్మాత ఇక ఫుల్ స్టాప్ పెట్టేయాలని నిర్ణయించారు… అలా ఫైనల్ ఎపిసోడ్ పడింది… వంటలక్క వెళ్లిపోయింది…
ఎవరు ఏం రాసుకున్నా సరే… కార్తీకదీపం రేటింగ్స్ చరిత్ర బహుశా మరొక సీరియల్‌కు రాదు… దాని ఫినిషింగ్ టచ్ కూడా అదిరిపోయింది… టీవీల వీక్షణం దారుణంగా తగ్గిపోతున్న ఈ స్థితిలో, ఆల్‌రెడీ భ్రష్టుపట్టించబడిన సీరియల్ చివరి భాగానికి ఈ రేటింగ్స్ రావడం ఒకరకంగా గ్రేటే… బంపర్ హిట్ సినిమా కాంతారకు పదిలోపు రేటింగ్స్ వస్తే కార్తీకదీపానికి 15 దాటింది… అదీ వంటలక్క సత్తా… ఏమాటకామాట… విలన్‌గా చేసిన శోభాశెట్టి, హీరోగా చేసిన పరిటాల నిరుపమ్ ఈ సీరియల్‌కు అదనపు బలాలు… ప్రత్యేకించి శోభాశెట్టి, ఇక ఇలాంటి పాత్ర ఆమెకు రాకపోవచ్చు… ఆ ఇద్దరు పిల్లలు సరేసరి… ఏదైతేనేం… వంటలక్కకు ఘనంగా వీడ్కోలు పలికారు తెలుగు ప్రేక్షకులు… గుడ్ బై ప్రేమీ…!! చాన్స్ వస్తే తెలుగులో మళ్లీ వచ్చెయ్… వెల్‌కమ్… కానీ ఈ తలతిక్క దర్శకుడి జోలికి వెళ్లకు… మధ్యలోనే సీరియల్‌ను నాశనం చేస్తాడు..!!
Share this Article