నయనతార మీద చర్యలా..? ఇంపాజిబుల్..! స్టాలిన్ వల్ల కాదు… అంతే…

రెండుమూడు చోట్ల చూసి నవ్వొచ్చింది… సరోగసీ కవలల్ని కని నయనతార అడ్డగోలుగా బుక్కయిందట… తమిళనాడు ప్రభుత్వం సీరియస్‌గా ఉందట… అంత సీన్ ఏమీ లేదు గానీ గాభరాపడకండి… ఏరకంగా చూసినా సరే, నయనతార మీద చర్యలు తీసుకోలేదు ప్రభుత్వం… అందుకే ఏదో తూతూమంత్రంగా మీడియా కళ్ల గప్పడానికి ఆ జంట నుంచి వివరణ కోరతామని తమిళనాడు మంత్రి సుబ్రమణియన్ ప్రకటించాడు…

నిజానికి నయనతార చర్య అనైతికం కాదు, చట్టవిరుద్ధం కాదు, అధర్మం కాదు, వక్రమూ కాదు… సంప్రదాయికం కాకపోవచ్చుగాక, అది వేరే చర్చ… 1) వాళ్లదేమీ అక్రమ సంబంధం కాదు, చాన్నాళ్లుగా సహజీవనంలో ఉన్నారు… 2) ఇరు కుటుంబాల్లో అందరికీ తెలుసు… 3) సరోగసీ చట్టబద్ధమే… కాకపోతే ఏదో ఫ్యాక్టరీకి ఆర్డరిచ్చి , సరుకును డెలివరీ చేసుకున్నట్టుగా సాగిన తంతు మాత్రం సంప్రదాయవాదుల్ని చివుక్కుమనిపించింది…

సరోగసీ నిబంధనల ప్రకారం …. 21 నుంచి 35 ఏళ్ల వయస్సుండీ, పెళ్లయిన మహిళ తన అండాల్ని దానం చేయాలంటే ఆమె తల్లిదండ్రులు లేదా భర్త అంగీకారం కావాలి… అందుకే మెడికల్ సర్వీసెస్ డైరెక్టర్ ఎంక్వయిరీ చేస్తాడని మంత్రి ప్రకటించాడు… ఇవేమీ నిలవవు… ఇక్కడ ఆమె దాత కాదు.., తన స్వీయ అవసరం… తను కడుపు మోసేంత బలంగా, ఆరోగ్యంగా లేనని చెబుతుంది… పేరెంట్స్, భర్త కూడా అవసరమైతే సంతకాలు చేస్తారు… పెళ్లయిన మహిళకు మాత్రమే సరోగసీ చాన్స్ కల్పించాలనే రూల్ ఏమీ లేదు.. ఆల్రెడీ పెళ్లయి ఐదేళ్లు అయి ఉండాలని మరో రూల్ ఉందట.. వాళ్లకు ఐదేళ్ల క్రితమే పెళ్లయింది… ఎక్కడా అనకండి…