పాకిస్థాన్ ఫిలమెంట్ ఎగిరిపోయింది… ఎన్నడూ ఎరగని రీతిలో విద్యుత్ పొదుపు…

పాకిస్థాన్ నేషనల్ అసెంబ్లీలో విద్యుత్ మరియు ఇంధన పొదుపు చర్యల మీద తీసుకోవాల్సిన విధివిధానాల మీద ఒక తీర్మానం చేసింది. కాబినెట్ దానిని ఆమోదించింది. పాకిస్థాన్ రక్షణ మంత్రి ఖవాజ ఆసిఫ్ తన ఇతర మంత్రివర్గ సహచరులతో కలిసి ప్రెస్ మీట్ పెట్టి కాబినెట్ ఆమోదించిన తీర్మానం తక్షణమే అమలులోకి వస్తుంది అని స్పష్టం చేశారు…

1. పాకిస్థాన్ ప్రస్తుతం తీవ్ర ఆర్ధిక సంక్షోభంలో ఉంది. ప్రభుత్వం దగ్గర లిక్విడ్ కాష్ తగినంతగా అందుబాటులో లేదు. క్రూడ్ ఆయిల్ దిగుమతి బిల్లు రోజురోజుకి పెరిగిపోతున్నది. దేశంలో డాలర్ రిజర్వ్ తగినంత లేదు. కాబట్టి పెట్రోల్, డీజిల్ వాడకం మీద ఆంక్షలు విధించాల్సిన పరిస్థితి రావొచ్చు.

2. ఈ రోజు కాబినెట్ మీటింగ్ పెట్టిన సమయంలో విద్యుత్ సరఫరా లేదు. బయట వెలుతురులో నిర్వహించాల్సి వచ్చింది. ప్రస్తుత పాకిస్తాన్ ఆర్ధిక పరిస్థితి ఎలా ఉందో ప్రజలకి తెలియాలని ఈ విషయం చెప్తున్నాను.

3. అన్ని మార్కెట్లు రాత్రి 8.30 గంటలకి మూసివేయాలి ! దీని వల్ల విద్యుత్ ఆదా అవుతుంది. ఈ నిబంధన ఈ రోజు నుండే అమలులోకి వస్తుంది. ప్రజలందరూ ప్రభుత్వంతో సహకరించాలి. దీనివలన PKR (పాకిస్థానీ రూపాయలు) 60 బిలియన్ ఆదా అవుతుంది.

4. పెళ్ళిళ్ళు జరిపే ఫంక్షన్ హాల్స్ రాత్రి 8.30 కి పూర్తి చేసుకొని, హాల్స్ అన్ని మూసివేయాలి. మార్కెట్లు, ఫంక్షన్ హాళ్లు రాత్రి 8.30 కి మూసివేయడం వలన PKR 20 బిలియన్లు ఆదా అవుతుంది.

5. ఎక్కువ వెలుగుని ఇచ్చే బల్బుల తయారీ ఫిబ్రవరి 1 నుండి ఆపేస్తున్నాము. అంటే వీటి తయారీ మరియు అమ్మకాల వలన ఎక్కువ విద్యుత్ ఖర్చు అవుతున్నది కనుక వీటి తయారీ మీద నిషేధం విధిస్తున్నాము. అలాగే ఎక్కువ విద్యుత్ వినియోగించుకునే సీలింగ్ మరియు పెడస్టల్ ఫ్యాన్ల తయారీని నిషేధిస్తున్నాము. దీనివల్ల PKR 22 బిలియన్లు ఆదా అవుతుంది.

6. స్టోరేజ్ వాటర్ హీటర్స్ 2023 చివరికల్లా తయారీ, వాడకం మీద నిషేధం విధిస్తున్నాము. ప్రజలు అందరూ తక్కువ విద్యుత్ వినియోగం అయ్యే ఇన్స్టంట్ వాటర్ హీటర్స్ మాత్రమే వాడాలి. అలాగే గ్యాస్ ద్వారా వాడబడే వాటర్ హీటర్స్ మీద కూడా నిషేధం విధిస్తున్నాము తద్వారా గ్యాస్ ఆదా అవుతుంది. దీనివల్ల మరో PKR 90 బిలియన్లు ఆదా అవుతాయి.

7. స్ట్రీట్ లైట్స్ వరసగా వెలిగించకుండా, ఒక స్ట్రీట్ లైట్ తరువాత ఉన్న దానిని ఆపేసి, దాని పక్కన ఉన్న దానిని వెలిగేట్లుగా చేస్తున్నాము. దీని వల్ల PKR 4 బిలియన్లు ఆదా అవుతాయి.

8. అన్ని ప్రభుత్వ కార్యాలయాలలో విద్యుత్ పొదుపు చర్యలు తీసుకుంటున్నాము దీనివల్ల మరో 30% విద్యుత్ ఆదా అవుతుంది మరియు PKR 32 బిలియన్లు ఆదా అవుతాయి.

9. వీలున్నంతవరకు ప్రభుత్వ ఉద్యోగులు వర్క్ ఫ్రమ్ హోమ్ చేయాల్సి ఉంటుంది. ఇది ఆయా ఉద్యోగుల పెట్రోల్, డీజీల్ వాడకం తగ్గుతుంది మరియు విద్యుత్ కూడా ఆదా అవుతుంది..

10. ఇప్పటికే గత సంవత్సరం నుండి లోడ్ షెడ్డింగ్  అమలు చేస్తున్నాము దేశంలో. తీవ్ర విద్యుత్ కొరత వలన పారిశ్రామిక ప్రగతి కుంటుపడ్డది కానీ తప్పట్లేదు.

పాకిస్థాన్ రక్షణ మంత్రి తన ఇతర మంత్రివర్గ సహచరులతో కలిసి ప్రెస్ మీట్ పెట్టి ప్రజలకి విజ్ఞప్తి చేశారు పైన చెప్పిన విషయాలని. పాకిస్థాన్ తో పాటు శ్రీలంక, బంగ్లాదేశ్ కూడా పైన పేర్కొన్న పొదుపు చర్యలని అమలు చేస్తున్నాయి. బంగ్లాదేశ్ లో అయితే శుక్రవారం పెట్రోల్ డీజిల్ అమ్మడం మీద నిషేధం అమలులో ఉంది గత సంవత్సరం నుండి.

పాకిస్థాన్ తీసుకుంటున్న పొదుపు చర్యల వలన ప్రస్తుతం వాడుతున్న విద్యుత్ మొత్తంలో 30% తగ్గుతుంది లేదా 9 వేల మెగా వాట్ల విద్యుత్ ఆదా అవుతుంది అని పేర్కొన్నారు. ప్రస్తుతం పాకిస్థాన్ దగ్గర ఫారిన్ ఎక్స్చేంజ్ నిల్వలు ఉన్నది 6.7 బిలియన్ డాలర్లు మాత్రమే. ఈ మొత్తం ఒక నెల దిగుమతుల చెల్లింపులకి మాత్రమే సరిపోతాయి.

మరో వైపు ప్రపంచ బాంక్ తన తదుపరి లోన్ ఇన్‌స్టాల్మెంట్ ఇవ్వడానికి ఆలస్యం చేస్తున్నది తన షరతులకి లోబడి పెంచాల్సిన పన్నులు పెంచడం లేదు అంటూ ! అయితే పన్నులు పెంచితే అది ఇంకా తీవ్ర ద్రవ్యోల్బణానికి దారి తీయవచ్చు, కానీ పెన్నులు పెంచకపోతే మా అప్పు తీర్చడం కష్టం అవుతుంది అని ప్రపంచ బాంక్ అధికార్లు హెచ్చరిస్తున్నారు.

గత సంవత్సరం పాకిస్థాన్ లో వచ్చిన భారీ వరదల వల్ల మూడోవంతు భూభాగం వరద నీటిలో చిక్కుకొని పాకిస్థాన్ ను 37 బిలియన్ డాలర్ల నష్టానికి గురిచేసింది. వరద బాధితుల కోసం ప్రపంచ బాంక్ ఇచ్చిన తాత్కాలిక ఆర్ధిక సహాయం సంబంధించి సరి అయిన లెక్కలు ఇవ్వలేదు పాకిస్థాన్ ప్రభుత్వం బాంక్ కి… ప్రపంచ బాంక్ తాను చేసిన ఆర్ధిక సహాయం వరద బాధితులకి చెరలేదని వాటిని ఇతర వాటికి ప్రభుత్వం మళ్లించినది అని అనుమానిస్తున్నది. దాంతో అప్పు కింద ఇవ్వాల్సిన తరువాతి ఇన్‌స్టాల్‌మెంట్ ఆపేసింది ప్రపంచ బాంక్ !

సాక్షాత్తు పాకిస్థాన్ ఆర్ధిక మంత్రి ఒక ప్రకటనలో శ్రీలంక లాగా పాకిస్థాన్ కూడా దివాళా తీసే రోజు దగ్గరలో ఉంది అని అన్నాడంటే పరిస్థితి ఎలా ఉందో అర్ధం చేసుకోవచ్చు పాకిస్థాన్ లో ! ప్రస్తుతం పాకిస్థాన్ లో గాస్ సిలిండర్ ధర 3,600 పాకిస్తానీ రూపాయలుగా ఉంది. అదీ బుక్ చేసిన వెంటనే డెలివరీ ఇవ్వడం లేదు. కనీసం 15 రోజుల నుండి 30 రోజులు పడుతున్నది గాస్ సిలిండర్ డెలివరీ అవ్వాలంటే ! అదే బ్లాక్ మార్కెట్ లో అయితే 6 వేల రూపాయాలకి దొరుకుతున్నది! నోట్ దిస్ పాయింట్ యువర్ ఆనర్! వినడానికి విచిత్రంగానే ఉన్నా సంచుల్లో గ్యాస్ నింపి అమ్ముతున్నారు…

పాకిస్థాన్ ఆక్రమిత కాశ్మీర్ మీద భారత్ దాడి చేస్తే పాకిస్థాన్ తనంత తానుగానే POK ని అప్పచెప్పే పరిస్థితి వచ్చే వరకు భారత్ వేచి చూడవచ్చు!

భారత్ మీద నిత్యం ద్వేషం నూరిపోస్తూ ఉగ్రవాదాన్ని భారత్ లోకి ఎగుమతి చేస్తున్న సైనిక జనరల్స్ పెత్తనం పోయే వరకు పాకిస్థాన్ బాగుపడదు. పాకిస్థాన్ ప్రజలు ఎన్ని కష్టాలు పడుతున్నా పాక్ సైనిక జనరల్స్ మాత్రం రియల్ ఎస్టేట్ వ్యాపారం చేసుకుంటూ సుఖంగానే ఉంటున్నారు. పాక్ ప్రభుత్వం ఇంత కష్టంలో ఉన్నా కానీ సైన్యం మాత్రం బడ్జెట్ లో తమకి కేటాయించిన దానికంటే ఇంకా ఎక్కువగానే పౌర ప్రభుత్వాన్ని బెదిరించి మరీ లాక్కుంటూ వస్తున్నది. పోనీ భారత్ తో యుద్ధం చేసే సత్తా ఉందా అంటే అదీ లేదు, కానీ పౌరుషానికి తక్కువ లేదు…