.
Ashok Kumar Vemulapalli … ‘GDN’ … ఆర్. మాధవన్ టైటిల్ రోల్లో దర్శకుడు కృష్ణకుమార్ రామకుమార్ తెరకెక్కించిన ‘GDN’.., భారతదేశపు అసాధారణ ఆవిష్కర్త, “ఎడిసన్ ఆఫ్ ఇండియా”గా పిలవబడే గోపాల్స్వామి దొరైస్వామి నాయుడు… జి.డి. నాయుడు జీవితాన్ని దృశ్యరూపంలో ఆవిష్కరించే చిత్తశుద్ధితో కూడిన ప్రయత్నం. పాఠ్యపుస్తకాలు మర్చిపోయిన ఒక దేశీయ మేధావి కథను వెండితెరకు ఎక్కించాలన్న తపన ప్రతీ ఫ్రేమ్లోనూ కనిపిస్తుంది.
కథ విషయానికి వస్తే, అక్షరజ్ఞానం పెద్దగా లేని ఒక గ్రామీణ యువకుడు యంత్రాల పట్ల ఉన్న అనిర్వచనీయమైన వ్యామోహంతో తన ప్రయాణాన్ని ఎలా ప్రారంభించాడన్నదే సినిమా మూలధాతువు. ఒక్క పాత మోటార్సైకిల్తో మొదలైన ఆసక్తి… ఆ తర్వాత కాలంలో ప్రయాణికులకు సమయపాలన నేర్పిన UMS బస్సు సర్వీసుగా, భారతదేశపు తొలి స్వదేశీ ఎలక్ట్రిక్ మోటార్గా, అనేక విప్లవాత్మక ఆవిష్కరణలుగా ఎలా పరిణామం చెందిందో తొలి భాగం వేగంగా, ఆసక్తికరంగా నడిపిస్తుంది.
Ads
దర్శకుడు కేవలం ఒక వ్యక్తి విజయగాథను మాత్రమే కాకుండా, నాటి చారిత్రక పరిణామాలతో ఆయనకున్న అనుబంధాన్ని హుందాగా కథలోకి తీసుకొచ్చారు. తమిళనాడులో సామాజిక సంస్కర్త పెరియార్తో నాయుడి ఆలోచనల సాన్నిహిత్యం, కార్మిక నేత వి.వి. గిరితో పరిచయాలు, మరోవైపు విజ్ఞాన రంగంలో నోబెల్ విజేత సర్ సి.వి. రామన్ నాయుడి ఆవిష్కరణలను చూసి అబ్బురపడే సన్నివేశాలు కథకు జాతీయ స్థాయి హుందాతనాన్ని తెచ్చిపెట్టాయి.
- ఇక ప్రపంచ పర్యటనల క్రమంలో 1930ల నాటి జర్మనీలో అడాల్ఫ్ హిట్లర్ను నాయుడు కలిసే ఆ అరుదైన ఘట్టం అంతర్జాతీయ స్థాయిలో ఆయన సాంకేతిక ప్రతిభకు లభించిన గుర్తింపును ప్రతిబింబిస్తూ స్క్రీన్పై హైలైట్గా నిలుస్తుంది.
అయితే, ఈ సినిమా ఒక రొటీన్ గ్లోరిఫికేషన్ కథలా కాకుండా, వ్యవస్థతో ఒక మేధావి చేసిన నిస్సహాయ పోరాటాన్ని ప్రధాన సంఘర్షణగా తీసుకుంటుంది.
బ్రిటీష్ కాలం నుంచి స్వతంత్ర భారతదేశం వరకు నాయుడు ఎదుర్కొన్న అధికార యంత్రాంగపు అలసత్వం రెడ్టేపిజం… ముఖ్యంగా పరిశోధనలను అర్థం చేసుకోలేని ఆదాయపు పన్ను అధికారుల నిరంతర వేధింపులు, ఆడిట్లు, లీగల్ నోటీసులతో ఆయన పడిన మానసిక క్షోభ సినిమా రెండో భాగాన్ని భావోద్వేగంగా మార్చాయి.
దీనికితోడు యంత్రాలపై ప్రాణం పెట్టిన ఒక వ్యక్తి సంసార జీవితంలో సంభవించిన ఒడిదుడుకులు, మొదటి భార్యకు దూరమవడం, కుమార్తె బాధ్యతలను సున్నితంగా నిర్వర్తించడం వంటి వ్యక్తిగత అంశాలను ఎక్కడా నాటకీయతకు తావులేకుండా వాస్తవ దృక్పథంతో స్పృశించారు.
నటీనటుల పనితీరులో ఆర్. మాధవన్ నటన తిరుగులేనిది. 20 ఏళ్ల యువకుడి నుంచి 70 ఏళ్ల వృద్ధుడి వరకు ఆయన ప్రదర్శించిన శరీర భాష, గొంతులోని మార్పులు, కళ్లలోని నిరాశ- ఆత్మవిశ్వాసాలు పాత్రకు ప్రాణం పోశాయి. ఐటీ అధికారిగా జయరామ్, నాయుడి వెన్నంటి నిలిచే మిత్రుడిగా సత్యరాజ్ తమ పరిణతి చెందిన నటనతో బలాన్ని చేకూర్చారు. గోవింద్ వసంత అందించిన నేపథ్య సంగీతం సన్నివేశాలను మెలోడ్రామా వైపు జారనీయకుండా గంభీరంగా నడిపించింది.
బయోపిక్ అయినందున కొన్ని చోట్ల డాక్యుడ్రామా ఛాయలు కనిపించడం, ఆవిష్కరణల సంతోషం కంటే పన్ను వివాదాల డ్రామాపై ఎక్కువ సమయం కేటాయించడం సాధారణ ప్రేక్షకుడికి కొంత భారంగా అనిపించవచ్చు. అయినప్పటికీ, మన దేశం ఎవరినైతే తగినంతగా గుర్తించలేకపోయిందో, ఆ అసాధారణ జీనియస్ జీవితాన్ని, ఆయన పడిన వేదనను గౌరవప్రదంగా వెండితెరపై చూసేందుకు ‘GDN’ తప్పక చూడాల్సిన ఒక ఉత్తమ బయోపిక్… అశోక్ వేములపల్లి
(NETFLIX లో ఉంది ఈ సినిమా )
Share this Article